“പാപനാശത്ത് വിനോദസഞ്ചാരികൾക്ക് നേരെ അതിക്രമം”: വാനിൽ എത്തിയ തമിഴ്‌നാട് സ്വദേശികളെ ഓട്ടോ ഡ്രൈവറും പ്രദേശവാസിയും ചേർന്ന് മർദിച്ചു | Varkala tourist assault
വർക്കല: പാപനാശം വിനോദസഞ്ചാര മേഖലയിലെത്തിയ തമിഴ്‌നാട് സ്വദേശികളായ വിനോദസഞ്ചാരികൾക്ക് നേരെ ആക്രമണം (Varkala tourist assault). പാപനാശം ഹെലിപ്പാട് കൊച്ചുവിള ജംഗ്ഷനിൽ തിങ്കളാഴ്ച വൈകിട്ട് ഏഴുമണിയോടെയാണ് സംഭവം. ഗതാഗതക്കുരുക്കിനെ തുടർന്നുണ്ടായ വാക്കുതർക്കമാണ് കയ്യാങ്കളിയിലേക്ക് നീങ്ങിയത്.
ഓട്ടോ ഡ്രൈവറും പ്രദേശവാസിയായ മറ്റൊരാളും ചേർന്ന് വിനോദസഞ്ചാരികളെ ആക്രമിക്കുന്നതിന്റെ ദൃശ്യങ്ങൾ സമീപത്തെ സി.സി.ടി.വി. ക്യാമറയിൽ പതിഞ്ഞിട്ടുണ്ട്. പെട്ടെന്ന് വാഹനം നിർത്തിയതിനെ തുടർന്ന് ഓട്ടോ വാനിൽ ഇടിക്കുമായിരുന്നുവെന്ന ആരോപണമാണ് തർക്കത്തിന് തുടക്കമിട്ടത്.
വാനിന് പിന്നാലെയെത്തിയ ഓട്ടോ ഡ്രൈവർ പ്രകോപിതനായി വിനോദസഞ്ചാരികളുമായി വാക്കുതർക്കത്തിലേർപ്പെടുകയായിരുന്നു. തർക്കം രൂക്ഷമായതോടെ ഇയാൾ സഞ്ചാരികളെ കയ്യേറ്റം ചെയ്തു. ഇതിനിടെ പ്രദേശവാസിയായ മറ്റൊരാളും ആക്രമണത്തിൽ പങ്കുചേർന്നു. ഇരുവരും ചേർന്ന് വിനോദസഞ്ചാരികളെ മർദിക്കുകയായിരുന്നു.
സംഘത്തിൽ സ്ത്രീകളും
സ്ത്രീകൾ ഉൾപ്പെടെയുള്ളവരാണ് വിനോദസഞ്ചാരികളുടെ സംഘത്തിലുണ്ടായിരുന്നത്. ആക്രമണം പ്രതിരോധിക്കാൻ സംഘത്തിലുണ്ടായിരുന്ന യുവാക്കളും ശ്രമിച്ചതോടെ സ്ഥലത്ത് സംഘർഷാവസ്ഥയുണ്ടായി. തുടർന്ന് നാട്ടുകാർ ഇടപെട്ടാണ് സ്ഥിതിഗതികൾ ശാന്തമാക്കിയത്.
സംഭവസമയത്ത് സ്ഥലത്ത് പൊലീസ് സാന്നിധ്യമില്ലാതിരുന്നതാണ് സംഘർഷം രൂക്ഷമാകാൻ കാരണമായതെന്ന് നാട്ടുകാർ ആരോപിക്കുന്നു. സംഭവത്തിൽ തുടർനടപടികൾ സംബന്ധിച്ച വിവരങ്ങൾ ലഭ്യമായിട്ടില്ല.
Story Summary : Tamil Nadu tourists visiting the Papanasam tourism area in Varkala were allegedly assaulted following a dispute over a traffic incident. An autorickshaw driver and another local resident reportedly attacked the tourists near Kochuvila Junction at around 7 pm on Monday. CCTV footage captured the incident, and local residents intervened to bring the situation under control.
