ചരിത്രനേട്ടവുമായി സ്പേസ് എക്സ്; ഭ്രമണപഥത്തിൽനിന്ന് മടങ്ങിയ സ്റ്റാർഷിപ്പിനെ ലോഞ്ച് ടവറിന്റെ യന്ത്രക്കരങ്ങൾ പിടിച്ചെടുത്തു | SpaceX Starship
ബഹിരാകാശ പര്യവേഷണ രംഗത്ത് ചരിത്രനേട്ടവുമായി സ്പേസ് എക്സിന്റെ (SpaceX Starship) സ്റ്റാർഷിപ്പ്. 15-ാം പരീക്ഷണ ദൗത്യത്തിനിടെ ഭ്രമണപഥത്തിലെ യാത്ര പൂർത്തിയാക്കി ഭൂമിയിലേക്ക് മടങ്ങിയ സ്റ്റാർഷിപ്പ് റോക്കറ്റിനെ വിക്ഷേപണ കേന്ദ്രത്തിലെ ലോഞ്ച് ടവറിന്റെ യന്ത്രക്കരങ്ങൾ വിജയകരമായി പിടിച്ചെടുത്തു. ഭ്രമണപഥത്തിൽനിന്ന് തിരിച്ചെത്തിയ റോക്കറ്റിനെ ലോഞ്ച് ടവറിൽ വെച്ച് പിടിച്ചെടുക്കുന്നത് ബഹിരാകാശ ചരിത്രത്തിൽ ആദ്യമായാണ്.
ടെക്സസിലെ സ്റ്റാർബേസ് കേന്ദ്രത്തിൽനിന്ന് വിക്ഷേപിച്ച സ്റ്റാർഷിപ്പ് 22 മണിക്കൂറിലധികം നീണ്ട ബഹിരാകാശ യാത്രയ്ക്കിടെ ഭൂമിയെ 14 തവണ വലംവെച്ചു. തുടർന്ന് ഇന്ത്യൻ സമയം പുലർച്ചെ 2.52ഓടെയാണ് റോക്കറ്റ് വിക്ഷേപണ കേന്ദ്രത്തിലേക്ക് തിരിച്ചെത്തിയത്. ലോഞ്ച് ടവറിൽ സ്ഥാപിച്ചിട്ടുള്ള കൂറ്റൻ യന്ത്രക്കരങ്ങൾ റോക്കറ്റിനെ കൃത്യമായി പിടിച്ചെടുക്കുകയായിരുന്നു.
ലോകത്തിലെ ഏറ്റവും ശക്തമായ റോക്കറ്റ് പൂർണമായും പുനരുപയോഗിക്കാൻ കഴിയുന്ന സംവിധാനമാക്കി മാറ്റുകയെന്ന സ്പേസ് എക്സിന്റെ ലക്ഷ്യത്തിലേക്കുള്ള നിർണായക ചുവടുവയ്പായാണ് ഈ നേട്ടം വിലയിരുത്തപ്പെടുന്നത്. റോക്കറ്റുകൾ വീണ്ടും ഉപയോഗിക്കാൻ കഴിയുന്നതിലൂടെ ഭാവിയിലെ ബഹിരാകാശ ദൗത്യങ്ങളുടെ ചെലവ് ഗണ്യമായി കുറയ്ക്കാനാകുമെന്നാണ് പ്രതീക്ഷ.
ഇന്ത്യൻ സമയം ഇന്നലെ പുലർച്ചെയാണ് സൗത്ത് ടെക്സസിലെ സ്റ്റാർബേസിൽനിന്ന് ഷിപ്പ് 42 ദൗത്യത്തിന് തുടക്കമായത്. ദൗത്യത്തിന്റെ ഭാഗമായി സ്റ്റാർലിങ്ക് വി3 ഉപഗ്രഹങ്ങളും ഭ്രമണപഥത്തിൽ വിന്യസിച്ചു.
അതേസമയം, സ്റ്റാർഷിപ്പിന്റെ രണ്ട് ഘട്ടങ്ങളും വീണ്ടെടുക്കാനായിരുന്നു സ്പേസ് എക്സിന്റെ ലക്ഷ്യമെങ്കിലും താഴത്തെ ഘട്ടമായ സൂപ്പർ ഹെവി ബൂസ്റ്ററിനെ ലോഞ്ച് ടവറിൽ തിരിച്ചെത്തിക്കാനായില്ല. ഗൈഡൻസ് സംവിധാനത്തിലുണ്ടായ തകരാറിനെത്തുടർന്ന് ബൂസ്റ്ററിന്റെ എൻജിനുകൾ നേരത്തെ പ്രവർത്തനം അവസാനിപ്പിച്ചു. തുടർന്ന് ബൂസ്റ്റർ തീഗോളമായി മെക്സിക്കൻ കടലിൽ പതിച്ച് തകർന്നു.
ചന്ദ്രനിലേക്കും ചൊവ്വയിലേക്കുമുള്ള ഭാവി മനുഷ്യ ദൗത്യങ്ങൾ ലക്ഷ്യമിട്ട് സ്പേസ് എക്സ് വികസിപ്പിക്കുന്ന ലോകത്തിലെ ഏറ്റവും വലിയ റോക്കറ്റാണ് സ്റ്റാർഷിപ്പ്. ദൗത്യത്തിന്റെ ഒരു ഘട്ടത്തിൽ തിരിച്ചടി നേരിട്ടെങ്കിലും സ്റ്റാർഷിപ്പിനെ വിജയകരമായി വീണ്ടെടുക്കാനായത് പുനരുപയോഗിക്കാവുന്ന റോക്കറ്റ് സാങ്കേതികവിദ്യയിലെ സുപ്രധാന മുന്നേറ്റമാണ്.
Story Summary:
SpaceX achieved a historic milestone by successfully catching its returning Starship spacecraft with the mechanical arms of its launch tower in Texas. The spacecraft completed a journey lasting over 22 hours and orbited Earth 14 times. However, the Super Heavy booster failed to return safely due to a guidance system issue and crashed into the Gulf of Mexico.




