തിരഞ്ഞെടുപ്പിൽ ഇടപെടൽ ആരോപണം; നെതന്യാഹുവിന് പ്രധാനമന്ത്രി സ്ഥാനത്ത് തുടരാൻ അർഹതയില്ലെന്ന് ഐസൻകോട്ട് | Gadi Eisenkot Netanyahu dispute

ഇസ്രയേൽ തിരഞ്ഞെടുപ്പിൽ ഇടപെടാൻ പ്രധാനമന്ത്രി ബെഞ്ചമിൻ നെതന്യാഹുവിന്റെ ഓഫീസ് ശ്രമിച്ചെന്ന ആരോപണങ്ങൾക്കിടെ അദ്ദേഹത്തിനെതിരെ രൂക്ഷ വിമർശനവുമായി പ്രതിപക്ഷ നേതാവ് ഗാഡി ഐസൻകോട്ട്. നെതന്യാഹുവിന് ഒരു നിമിഷം പോലും സർക്കാർ തലപ്പത്ത് തുടരാൻ അർഹതയില്ലെന്ന് അദ്ദേഹം പ്രതികരിച്ചു. സംഭവത്തിൽ അടിയന്തര അന്വേഷണം വേണമെന്നും ആവശ്യപ്പെട്ടു. ഞായറാഴ്ചയാണ് നെതന്യാഹുവിനും അദ്ദേഹത്തിന്റെ അടുത്ത വൃത്തങ്ങൾക്കുമെതിരെ ഐസൻകോട്ട് രംഗത്തെത്തിയത്. ഇസ്രയേൽ ജനാധിപത്യത്തിന് നേരിട്ടുള്ള ഭീഷണിയാണ് ഇവരുടെ നടപടികളെന്ന് അദ്ദേഹം എക്സിൽ കുറിച്ചു. രാജ്യത്ത് പുതിയ സർക്കാർ രൂപീകരിക്കാൻ ചുമതല ലഭിച്ച ഐസൻകോട്ടിന്റെ പ്രതിനിധികളും നെതന്യാഹുവിന്റെ സംഘവും ദേശീയ ഐക്യസർക്കാർ രൂപീകരിക്കുന്നതുമായി ബന്ധപ്പെട്ട ചർച്ചകൾ നടത്തിയതിന് പിന്നാലെയായിരുന്നു വിമർശനം. (Gadi Eisenkot Netanyahu dispute)
ഒക്ടോബർ 27ന് നടന്ന തിരഞ്ഞെടുപ്പിന് തൊട്ടുമുമ്പ് നെതന്യാഹുവിന്റെ ചീഫ് ഓഫ് സ്റ്റാഫ് ഇഡോ നോർഡൻ, യുണൈറ്റഡ് അറബ് ലിസ്റ്റ് (റാം) പാർട്ടി അംഗങ്ങൾക്കെതിരെ പൊലീസിൽ പരാതി നൽകിയെന്നാണ് ഇസ്രയേലി ചാനൽ 12 റിപ്പോർട്ട് ചെയ്തത്. നെതന്യാഹുവിന്റെ ഓഫീസിൽ മുൻപ് ജോലി ചെയ്തിരുന്ന ഒരാളിൽനിന്ന് ലഭിച്ച രഹസ്യവിവരത്തിന്റെ അടിസ്ഥാനത്തിലായിരുന്നു നടപടിയെന്നും റിപ്പോർട്ടിലുണ്ട്.
വോട്ട് ചെയ്യാൻ പ്രേരിപ്പിക്കുന്നതിനായി കൈക്കൂലി നൽകിയെന്ന സംശയത്തിൽ റാം പാർട്ടിയിലെ മൂന്ന് അംഗങ്ങളുടെ വീടുകളിൽ വാറന്റില്ലാതെ 14ഓളം പൊലീസുകാർ പരിശോധന നടത്തുകയും ഇവരെ അറസ്റ്റ് ചെയ്യുകയും ചെയ്തെന്നാണ് റിപ്പോർട്ട്. എന്നാൽ വിവരങ്ങൾ അടിസ്ഥാനരഹിതമാണെന്ന് കണ്ടെത്തിയതിനെ തുടർന്ന് പൊലീസ് ഇവരെ വിട്ടയച്ചു. തിരഞ്ഞെടുപ്പിൽ അറബ് പാർട്ടികൾ റെക്കോർഡ് 19 സീറ്റുകൾ നേടിയതിനു പിന്നാലെ നെതന്യാഹു തിരഞ്ഞെടുപ്പ് ക്രമക്കേട് ആരോപിച്ചിരുന്നതായും റിപ്പോർട്ടിൽ പറയുന്നു.
തിരഞ്ഞെടുപ്പ് ദിവസം അഞ്ച് പലസ്തീൻ വംശജരായ ഇസ്രയേലി പാർലമെന്റ് അംഗങ്ങളുടെ ഫോൺ ചോർത്താൻ ആഭ്യന്തര രഹസ്യാന്വേഷണ ഏജൻസിയായ ഷിൻ ബെറ്റിന്റെ മേധാവി ഡേവിഡ് സിനി അറ്റോർണി ജനറലിന്റെ ഓഫീസിനോട് അനുമതി തേടിയെന്നും ചാനൽ 12 റിപ്പോർട്ട് ചെയ്തു. എന്നാൽ ഈ ആവശ്യം നിരസിക്കപ്പെട്ടെന്നാണ് വിവരം. പുറത്തുവന്ന ആരോപണങ്ങളിൽ പൊലീസും ഷിൻ ബെറ്റും വിശദീകരണം നൽകണമെന്ന് ഐസൻകോട്ട് ആവശ്യപ്പെട്ടു. അതേസമയം, ഐസൻകോട്ടിന്റെ പ്രസ്താവനയെ നെതന്യാഹുവിന്റെ ലിക്കുഡ് പാർട്ടി പ്രധാനമന്ത്രിക്കെതിരായ പ്രകോപനമെന്ന് വിശേഷിപ്പിച്ചു. ദേശീയ ഐക്യസർക്കാർ രൂപീകരിക്കാൻ നെതന്യാഹു വീണ്ടും ക്ഷണിച്ചെങ്കിലും അത് വെറും നാടകമാണെന്നാണ് ഐസൻകോട്ടിന്റെ പ്രതികരണം. ഇരുപക്ഷവും ചർച്ചകൾ നടത്തിയിട്ടുണ്ടെങ്കിലും സർക്കാർ രൂപീകരണത്തിന് ആവശ്യമായ 61 സീറ്റുകൾ ഒരു വിഭാഗത്തിനും ഇതുവരെ ഉറപ്പാക്കാനായിട്ടില്ല.
Summary: Israeli opposition leader Gadi Eisenkot has accused Benjamin Netanyahu’s office of electoral interference and called for an immediate investigation. The allegations include the arrest of three Arab party members based on information later found to be unfounded.




