വടക്കൻ ആന്ധ്രാപ്രദേശിനും തെക്കൻ ഒഡീഷയ്ക്കും ഇടയിൽ ഗോപാൽപൂരിന് സമീപം ‘അക്വാൻ’ ചുഴലിക്കാറ്റ് തീരം തൊടുന്നു; തീരദേശങ്ങളിൽ നിന്ന് 1.2 ലക്ഷത്തിലധികം പേരെ സുരക്ഷിത കേന്ദ്രങ്ങളിലേക്ക് മാറ്റിപ്പാർപ്പിച്ചു. 65-ലധികം ട്രെയിനുകൾ റദ്ദാക്കി. അതിതീവ്ര മഴയ്ക്കും മണിക്കൂറിൽ 110 കിലോമീറ്റർ വരെ വേഗതയുള്ള കാറ്റിനും സാധ്യതയെന്ന് കാലാവസ്ഥാ വകുപ്പിന്റെ റെഡ് അലർട്ട്

ഭുവനേശ്വര്: വടക്കന് ആന്ധ്രാപ്രദേശിനും തെക്കന് ഒഡീഷയ്ക്കും ഇടയില് ഗോപാല്പൂരിന് സമീപം ‘അക്വാന്’ചുഴലിക്കാറ്റ് തീരം തൊടുന്ന പ്രക്രിയ പുരോഗമിക്കുകയാണെന്ന് കാലാവസ്ഥാ വകുപ്പ് അറിയിച്ചു.
70 മുതല് 80 കിലോമീറ്റര് വരെ വേഗതയില് വീശിയടിക്കുന്ന കാറ്റിനൊപ്പം മണിക്കൂറില് 90 കിലോമീറ്റര് വരെ വേഗതയുള്ള ശക്തമായ കാറ്റിനും സാധ്യതയുണ്ടെന്നും, തീരം കടക്കുന്ന നടപടികള് അടുത്ത രണ്ട് മണിക്കൂര് കൂടി തുടരുമെന്നും കാലാവസ്ഥാ വകുപ്പ് വ്യക്തമാക്കി.
ചുഴലിക്കാറ്റിന്റെ പശ്ചാത്തലത്തില് തീരദേശത്തെ അപകടസാധ്യതയുള്ള മേഖലകളില് നിന്ന് 1.2 ലക്ഷത്തിലധികം ആളുകളെ സുരക്ഷിത കേന്ദ്രങ്ങളിലേക്ക് മാറ്റിപ്പാര്പ്പിച്ചു. 65-ലധികം ട്രെയിന് സര്വീസുകള് റദ്ദാക്കിയിട്ടുണ്ട്; കടല് പ്രക്ഷുബ്ധമാകുകയും ശക്തമായ കാറ്റ് വീശുകയും ചെയ്യുന്നതിനാല് തുറമുഖങ്ങളില് ജാഗ്രതാ നിര്ദ്ദേശവും നല്കിയിട്ടുണ്ട്.
അതിതീവ്ര മഴയ്ക്ക് സാധ്യതയുള്ളതിനാല് കാലാവസ്ഥാ വകുപ്പ് റെഡ് അലര്ട്ട് പ്രഖ്യാപിച്ചിട്ടുണ്ട്; മണിക്കൂറില് 100 മുതല് 110 കിലോമീറ്റര് വരെ വേഗതയില് കാറ്റ് വീശിയടിക്കാനും സാധ്യതയുണ്ട്.
ദുര്ബലമായ ജില്ലകളില് ദേശീയ ദുരന്ത നിവാരണ സേനയുടെയും സംസ്ഥാന ദുരന്ത നിവാരണ സേനയുടെയും സംഘങ്ങളെ വിന്യസിച്ചിട്ടുണ്ട്. സ്കൂളുകളും വിദ്യാഭ്യാസ സ്ഥാപനങ്ങളും വിനോദസഞ്ചാര കേന്ദ്രങ്ങളും അടച്ചു; മത്സ്യത്തൊഴിലാളികള് കടലില് പോകരുതെന്ന് കര്ശന നിര്ദ്ദേശവും നല്കിയിട്ടുണ്ട്.
ഗോപാല്പൂരിന് സമീപം ചുഴലിക്കാറ്റ് തീരം തൊടുന്ന പ്രക്രിയ ആരംഭിച്ചതായും അടുത്ത ഏതാനും മണിക്കൂറുകള്ക്കുള്ളില് ഇത് പൂര്ത്തിയാകുമെന്നും വിശാഖപട്ടണം കാലാവസ്ഥാ വകുപ്പ് ഡയറക്ടര് പി.എല്.എന് മൂര്ത്തി പറഞ്ഞു.
കഴിഞ്ഞ രാത്രിയെ അപേക്ഷിച്ച് ചുഴലിക്കാറ്റിന്റെ ശക്തി കുറഞ്ഞിട്ടുണ്ട്. കഴിഞ്ഞ ആറ് മണിക്കൂറിനിടെ 21 കിലോമീറ്റര് വേഗതയിലാണ് ഇത് സഞ്ചരിച്ചത്.
ഒഡീഷ തീരത്തേക്ക് ചുഴലിക്കാറ്റ് അടുക്കുന്നതിന്റെ ഭാഗമായി ഈസ്റ്റ് കോസ്റ്റ് റെയില്വേ 41 ട്രെയിനുകള് റദ്ദാക്കുകയും 29 ട്രെയിനുകളുടെ സമയം പുനഃക്രമീകരിക്കുകയും ചെയ്തു. വെള്ളിയാഴ്ച പുരിയിലേക്ക് സര്വീസ് നടത്തുകയോ ഇതുവഴി കടന്നുപോകുകയോ ചെയ്യേണ്ടിയിരുന്ന 28-ഓളം എക്സ്പ്രസ് ട്രെയിനുകള് സൗത്ത് ഈസ്റ്റേണ് റെയില്വേയും റദ്ദാക്കിയിട്ടുണ്ട്.
അക്വാന് മണിക്കൂറില് 13 കിലോമീറ്റര് വേഗതയില് ഒഡീഷയിലേക്ക് നീങ്ങുകയാണെന്നും വെള്ളിയാഴ്ച ഉച്ചകഴിഞ്ഞതോടെ തീരം കടക്കുമെന്നും കാലാവസ്ഥാ വകുപ്പ് ഉദ്യോഗസ്ഥന് നേരത്തെ വ്യക്തമാക്കിയിരുന്നു. ചുഴലിക്കാറ്റ് തീരവുമായി അടുക്കുന്നതോടെ ഒഡീഷയിലെ ഗോപാല്പൂര് തീരത്ത് കടല്ക്ഷോഭവും ശക്തമായ കാറ്റും അനുഭവപ്പെടുകയാണ്.




