ബെംഗളൂരുവിൽ 18-കാരനെ ചുറ്റികകൊണ്ട് അടിച്ചും കുത്തിയും കൊലപ്പെടുത്തി; അമ്മയെ നാല് ദിവസം പൂട്ടിയിട്ടതായി പരാതി | Bengaluru murder case

ബെംഗളൂരു: ബെംഗളൂരുവിലെ വാടക ഫ്ലാറ്റിൽ 18-കാരനായ മകനെ പിതാവ് ചുറ്റികകൊണ്ട് അടിച്ചും കുത്തിയും കൊലപ്പെടുത്തിയതായി പരാതി (Bengaluru murder case). ഭാര്യയെ കൊലപ്പെടുത്താൻ ശ്രമിച്ചെങ്കിലും പരാജയപ്പെട്ടതിനെ തുടർന്ന് അവരെ നാല് ദിവസത്തോളം മുറിയിൽ പൂട്ടിയിട്ടതായും റിപ്പോർട്ടുകളുണ്ട്. സംഭവത്തിൽ ബനശങ്കരി പൊലീസ് കൊലപാതകം, കൊലപാതകശ്രമം എന്നീ വകുപ്പുകൾ പ്രകാരം കേസെടുത്തു.
നവംബർ 16-ന് രാത്രി പത്മനാഭനഗറിലെ രാഘവേന്ദ്ര ലേഔട്ടിലുള്ള എസ്.ആർ.ആർ.കെ തുളസി അപ്പാർട്ട്മെന്റിലാണ് സംഭവം നടന്നത്. 2024 ഒക്ടോബർ മുതൽ ദമ്പതികൾ ഇവിടെ വാടകയ്ക്ക് താമസിച്ചുവരികയാണെന്ന് വീട്ടുടമസ്ഥൻ പറഞ്ഞു.
കഴിഞ്ഞ ആറുമാസമായി വീട്ടിൽ പതിവായി വഴക്കുകൾ നടക്കുന്നതായി അയൽവാസികളിൽനിന്ന് നിരന്തരം പരാതികൾ ലഭിച്ചിരുന്നുവെന്ന് വീട്ടുടമസ്ഥൻ പൊലീസിന് നൽകിയ പരാതിയിൽ പറയുന്നു. നവംബർ 16-ന് രാത്രിയും വീട്ടിൽ വഴക്കുണ്ടാകുന്നതായി പരാതി ലഭിച്ചു. എന്നാൽ അപ്പാർട്ട്മെന്റിലെ സെക്യൂരിറ്റി ജീവനക്കാരനോട് അന്വേഷിച്ചപ്പോൾ ബഹളങ്ങളൊന്നും നടക്കുന്നില്ലെന്നായിരുന്നു മറുപടി.
നാല് ദിവസത്തിന് ശേഷം ഫ്ലാറ്റ് തുറന്നപ്പോൾ കണ്ടെത്തിയത് രക്തക്കറകൾ
നാല് ദിവസത്തിന് ശേഷം വീട്ടുടമസ്ഥൻ ഫ്ലാറ്റിലെത്തി ഏറെ നേരം ബെല്ലടിക്കുകയും വാതിലിൽ മുട്ടുകയും ചെയ്തെങ്കിലും പ്രതികരണമുണ്ടായില്ല. തുടർന്ന് പൊലീസിനെ വിവരമറിയിച്ചു. പൊലീസ് എത്തി താക്കോൽപ്പണിക്കാരന്റെ സഹായത്തോടെ രാത്രി 11 മണിയോടെ വാതിൽ തുറന്നു.
ഫ്ലാറ്റിന്റെ തറയിലും ചുവരുകളിലും രക്തക്കറകൾ കണ്ടെത്തി. പൂട്ടിയിട്ട മുറിക്കുള്ളിൽനിന്ന് സ്ത്രീയുടെ നിലവിളിയും കേട്ടു. തുടർന്ന് നടത്തിയ പരിശോധനയിലാണ് കുളിമുറിയിൽ 18-കാരനായ സോഹം ദാസിന്റെ മൃതദേഹം കണ്ടെത്തിയത്.
ഭർത്താവ് കത്തിയും ചുറ്റികയും ഉപയോഗിച്ച് ആക്രമിച്ചതായി ഭാര്യ
ഭർത്താവ് സുദീപ് കത്തിയും ചുറ്റികയും ഉപയോഗിച്ച് തന്നെയും മകൻ സോഹം ദാസിനെയും ആക്രമിച്ചതായി ഭാര്യ സീമ പൊലീസിനോട് മൊഴി നൽകിയെന്നാണ് റിപ്പോർട്ട്. നവംബർ 16-ന് രാത്രി ഒൻപതിനും 11നും ഇടയിലാണ് ആക്രമണം നടന്നതെന്നും മകനെ കൊലപ്പെടുത്തിയ ശേഷം തന്നെയും വധിക്കാൻ ശ്രമിച്ചെന്നും അവർ ആരോപിച്ചു.
സംഭവത്തിൽ ബനശങ്കരി പൊലീസ് കൊലപാതകം, കൊലപാതകശ്രമം എന്നീ വകുപ്പുകൾ പ്രകാരം കേസെടുത്ത് അന്വേഷണം ആരംഭിച്ചു.
Story Summary :
An 18-year-old boy, Soham Das, was allegedly murdered by his father, Sudeep, inside their rented apartment in Bengaluru. The victim’s mother, Seema, told police that her husband attacked both of them with a knife and hammer before locking her in a room for four days. Police found the boy’s body in the bathroom after breaking open the apartment door. Banashankari Police have registered a case of murder and attempted murder.




