ഇരിങ്ങാലക്കുട : ലോകമെമ്പാടുമുള്ള എംപറർ ഇമ്മാനുവൽ
ചർച്ച് (സിയോൺ ) വിശ്വാസികളുടെ മുഖ്യ തീർത്ഥാടന കേന്ദ്രമായ മുരിയാട് സീയോനിലെ ഈ വർഷത്തെ കൂടാര തിരുനാൾ സമാപിച്ചു.
ഈ മാസം 18ന് തിരുനാൾ ആരംഭിച്ചതു മുതൽ പതിനായിരക്കണക്കിന് വിശ്വാസികൾ എല്ലാ ദിവസവും സിയോനിൽ എത്തിയിരുന്നതായി ഭാരവാഹികൾ അറിയിച്ചു.
സമാപന ദിവസം സഭാ അധ്യക്ഷൻ മോസ്റ്റ് റവ. ബിനോയ് മണ്ഡപത്തിലിന്റെ മുഖ്യ കാർമ്മികത്വത്തിൽ കുർബാനയും വചന പ്രഘോഷണവും നടന്നു.
തുടർന്ന് സിയോൺ പതാകകളും കുരുത്തോലയും വഹിച്ചുകൊണ്ട് ദേവാലയത്തിന് ചുറ്റും നടത്തിയ പ്രദക്ഷിണം ഭക്തിനിർഭരവും ആകർഷകവുമായി.
കുടുംബ സമേതം തിരുനാളിൽ പങ്കെടുത്ത എല്ലാ വിശ്വാസികളും വെള്ള വസ്ത്രങ്ങളും സിയോൺ തൊപ്പിയുമാണ് ധരിച്ചിരുന്നത്.
സമാപന ചടങ്ങിൽ ജനപ്രതിനിധികളും രാഷ്ട്രീയ – സാമൂഹിക മേഖലകളിൽ നിന്നുള്ള നിരവധി പ്രമുഖ വ്യക്തികളും പങ്കെടുത്തു.
