ബോയ്‌സ് സ്‌കൂൾ ഗ്രൗണ്ടിനു ചുറ്റും പുല്ലും കാടും : ക്രിക്കറ്റ് ടീം അംഗങ്ങൾക്ക് കടന്നൽ കുത്തേറ്റു ; നഗരസഭയ്ക്ക് കത്ത് നൽകി യൂത്ത് ഫ്രണ്ട്

ഇരിങ്ങാലക്കുട : ഗവ. മോഡൽ ബോയ്സ് ഹയർ സെക്കൻഡറി സ്കൂൾ ഗ്രൗണ്ടിനു ചുറ്റും വലിയ രീതിയിൽ പുല്ലും കാടും വളർന്ന നിലയിൽ. ഇതിനിടയിൽ കടന്നൽ കൂടുകളും ഉണ്ടെന്നത് അപകട ഭീഷണി ഉയർത്തുന്നു.

രാവിലെ സ്‌കൂൾ ഗ്രൗണ്ടിൽ കളിക്കാനെത്തുന്ന മോർണിംഗ് ക്രിക്കറ്റ് ടീമിലെ പലർക്കും കടന്നൽ കുത്തേൽക്കുന്നത് ഇപ്പോൾ പതിവായിരിക്കുകയാണ്. ഇതുവരെ അഞ്ചോളം പേർക്കാണ് കടന്നൽ കുത്തേറ്റത്.

സ്‌കൂൾ തുറക്കാൻ ഇനി രണ്ടു ദിവസങ്ങൾ കൂടി മാത്രമേ ബാക്കിയുള്ളൂ. സ്‌കൂൾ തുറന്നാൽ കുട്ടികളും കളിക്കാൻ ഈ ഗ്രൗണ്ടിലെത്തും.

അതിനാൽ എത്രയും വേഗം ഗ്രൗണ്ടിനു ചുറ്റുമുള്ള പുല്ലും കാടും വെട്ടിത്തെളിക്കുകയും കടന്നൽ ശല്യത്തിന് ശാശ്വത പരിഹാരം കാണുകയും ചെയ്യണം എന്നാവശ്യപ്പെട്ട് യൂത്ത് ഫ്രണ്ട് പ്രവർത്തകർ നഗരസഭാ സെക്രട്ടറിക്ക് കത്ത് നൽകി.