ഇരിങ്ങാലക്കുട : നാഷണൽ ഹയർ സെക്കൻഡറി സ്കൂളിലെ സ്റ്റുഡൻ്റ് പൊലീസ് കേഡറ്റ് പദ്ധതിയുടെ ക്രിസ്തുമസ് ത്രിദിന ക്യാമ്പിന് തുടക്കമായി.
ബുധനാഴ്ച രാവിലെ അസംബ്ലിയോടു കൂടിയാണ് ക്യാമ്പ് ആരംഭിച്ചത്.
ഇരിങ്ങാലക്കുട പൊലീസ് സ്റ്റേഷൻ എസ്എച്ച്ഒ എം.കെ. ഷാജി പതാക ഉയർത്തി.
കൗൺസിലർ സ്മിത കൃഷ്ണകുമാർ ക്യാമ്പ് ഉദ്ഘാടനം ചെയ്തു.
എസ്പിസി പദ്ധതിയുടെ അധ്യാപക – രക്ഷാകർതൃ സമിതി അധ്യക്ഷൻ ബേബി അധ്യക്ഷത വഹിച്ചു.
സ്കൂൾ മാനേജർ വി.പി.ആർ. മേനോൻ, രാമചന്ദ്രൻ എന്നിവർ ആശംസകൾ അർപ്പിച്ചു.
ക്യാമ്പിൽ വച്ച് ജൂനിയർ കുട്ടികൾക്ക് ക്യാപ്പ് സെറിമണി നടത്തി.
ഇരിങ്ങാലക്കുട സർക്കിൾ ഇൻസ്പെക്ടർ ഷാജി എസ്പിസി ക്യാമ്പ് നടത്തിപ്പിനെ പറ്റിയും എസ്പിസി പദ്ധതി രൂപീകരിക്കുന്നതിനുണ്ടായ സാഹചര്യങ്ങൾ, എസ്പിസി പദ്ധതിയുടെ ആവശ്യകത, എങ്ങനെയാകണം എസ്പിസി കേഡറ്റ് എന്നിങ്ങനെയുള്ള കാര്യങ്ങൾ വിശദമാക്കി.
പ്രധാന അധ്യാപിക കെ.പി. സീന സ്വാഗതവും സിപിഒ ശ്രീകൃഷ്ണൻ നന്ദിയും പറഞ്ഞു.
ഉദ്ഘാടന സമ്മേളനത്തിനുശേഷം സംസ്ഥാന കളരിപ്പയറ്റ് മത്സരത്തിൽ സുവർണ്ണമെഡൽ നേടിയ സ്കൂൾ പൂർവ വിദ്യാർഥിനി അയന സന്തോഷ് കളരിപ്പയറ്റ് പരിശീലനം നൽകി.
ക്രൈസ്റ്റ് കോളെജ് ക്ലിനിക്കൽ സൈക്കോളജി വിഭാഗത്തിലെ ബിരുദാനന്തര ബിരുദ വിദ്യാർഥിനികളായ അതുല്യയും സാന്ദ്രയും ചേർന്ന് ‘എന്താണ് ജെൻഡർ ഇക്വാലിറ്റി’ എന്നും ‘എങ്ങനെയാണ് ജെൻഡർ ഇക്വാലിറ്റി പരിശീലിക്കേണ്ടത്’ എന്നും കുട്ടികൾക്ക് ക്ലാസ്സ് എടുത്തു.
തുടർന്ന് സീനിയർ, ജൂനിയർ കുട്ടികൾ ക്യാമ്പസ് ക്ലീനിങ് പ്രവർത്തനം നടത്തി.
