ജന്തർമന്തർ പോരാട്ടത്തിന് ഐക്യദാർഢ്യം പ്രഖ്യാപിച്ച് ആളൂരിൽ നവംബർ 3ന് പ്രതിഷേധ സംഗമം
- എസ്.ഐ.ആർ. റദ്ദാക്കുക, ജ്ഞാനേഷ് കുമാർ രാജിവെക്കുക എന്നീ ആവശ്യങ്ങൾ ഉന്നയിച്ച് സമരം
- തോമസ് ഉണ്ണിയാടൻ എം.എൽ.എ., ഡോ. ആർ. ബിന്ദു തുടങ്ങിയവർ പങ്കെടുക്കും
ആളൂർ: കേന്ദ്ര സർക്കാരിന്റെ ജനദ്രോഹ നയങ്ങൾക്കെതിരെ ഡൽഹി ജന്തർമന്തറിൽ നടക്കുന്ന പോരാട്ടത്തിന് ഐക്യദാർഢ്യം പ്രഖ്യാപിച്ച് ജന്തർമന്തർ ഐക്യദാർഢ്യ സമിതി ആളൂർ പഞ്ചായത്തിന്റെ നേതൃത്വത്തിൽ നവംബർ 3ന് പ്രതിഷേധ സംഗമം സംഘടിപ്പിക്കുന്നു. ആളൂർ ജംഗ്ഷനിൽ വൈകീട്ട് 3 മണിക്കാണ് പരിപാടി നടക്കുക. എസ്.ഐ.ആർ. (SIR) റദ്ദാക്കുക, ജ്ഞാനേഷ് കുമാർ രാജിവെക്കുക തുടങ്ങിയ ആവശ്യങ്ങൾ ഉന്നയിച്ചാണ് പ്രതിഷേധം.
സംഗമത്തിൽ അഡ്വ. തോമസ് ഉണ്ണിയാടൻ എം.എൽ.എ., മുൻ മന്ത്രി ഡോ. ആർ. ബിന്ദു, ആളൂർ ഗ്രാമപഞ്ചായത്ത് പ്രസിഡന്റ് റോസിലി ഫ്രാൻസിസ് എന്നിവർക്കൊപ്പം പി.എൻ. ഗോപീകൃഷ്ണൻ, പ്രൊഫ. കുസുമം ജോസഫ്, പി.സി. ഉണ്ണിച്ചെക്കൻ എന്നിവരും പങ്കെടുക്കും.
പ്രതിഷേധ പ്രഭാഷണങ്ങൾ, കവിയരങ്ങ്, കരിന്തലക്കൂട്ടം അവതരിപ്പിക്കുന്ന നാടൻപാട്ടുകൾ, പ്രതിഷേധ ജ്വാല തെളിയിക്കൽ എന്നിവയും പരിപാടിയുടെ ഭാഗമായി അരങ്ങേറുമെന്ന് സംഘാടകർ അറിയിച്ചു.
