കുതിരശക്തിയുടെ കരുത്തുമായി ട്രയംഫിന്റെ പുത്തൻ അവതാരങ്ങൾ! ഇത് വെറുമൊരു അപ്ഡേറ്റല്ല

ട്രയംഫിന്റെ ഏറ്റവും പുതിയ 2026 മോഡൽ ട്രൈഡന്റ് 660, ടൈഗർ സ്‌പോർട്ട് 660 ബൈക്കുകൾ വൻ മാറ്റങ്ങളോടെ വിപണിയിൽ എത്തിയിരിക്കുകയാണ്. കമ്പനി ഇതുവരെ നടത്തിയതിൽ വച്ച് ഏറ്റവും വലിയ നവീകരണങ്ങളാണ് ഈ രണ്ട് ബൈക്കുകളിലും വരുത്തിയിരിക്കുന്നത്. പുതിയ കളർ ഓപ്ഷനുകൾക്കും ഗ്രാഫിക്സിനും പുറമെ എൻജിൻ കരുത്തിലും ഡിസൈനിലും വലിയ മെച്ചപ്പെടുത്തലുകൾ ഈ മോഡലുകൾക്കുണ്ട്. വരും മാസങ്ങളിൽ തന്നെ ഈ രണ്ട് കരുത്തൻ ബൈക്കുകളും ഇന്ത്യൻ വിപണിയിലും ചുവടുറപ്പിക്കുമെന്നാണ് പ്രതീക്ഷിക്കുന്നത്.

ടൂറിംഗ് യാത്രകൾക്ക് മുൻഗണന നൽകുന്നവർക്കായി പ്രത്യേകം രൂപകൽപ്പന ചെയ്തതാണ് പുതിയ ടൈഗർ സ്‌പോർട്ട് 660. ദീർഘദൂര യാത്രകൾ ആയാസരഹിതമാക്കാൻ 18.6 ലിറ്ററിന്റെ വലിയ ഇന്ധന ടാങ്കാണ് ഇതിൽ ഉൾപ്പെടുത്തിയിരിക്കുന്നത്. കാറ്റിൽ നിന്നും കാലാവസ്ഥയിൽ നിന്നും റൈഡർക്ക് കൂടുതൽ സംരക്ഷണം നൽകുന്നതിനായി ബോഡി വർക്കിലും വിൻഡ്‌സ്‌ക്രീനിലും മാറ്റങ്ങൾ വരുത്തിയിട്ടുണ്ട്. മുന്നിൽ ഷോവ യുഎസ്ഡി ഫോർക്കുകളും പിന്നിൽ റിമോട്ട് പ്രീലോഡ് അഡ്ജസ്റ്റ്‌മെന്റുള്ള മോണോഷോക്കുമാണ് നൽകിയിരിക്കുന്നത്. ലഗേജോ പില്യൺ യാത്രക്കാരോ ഉള്ളപ്പോൾ സസ്പെൻഷൻ എളുപ്പത്തിൽ ക്രമീകരിക്കാൻ ഈ പുതിയ സംവിധാനം സഹായിക്കും.

Also Read: ഇനി കളി മാറും! പുത്തൻ ലുക്കിൽ സ്കോഡ കുഷാഖ് 2026 എത്തി; ക്രെറ്റയും സെൽറ്റോസും വിയർക്കുമോ?

മറുഭാഗത്ത് ട്രൈഡന്റ് 660-നെ കൂടുതൽ സ്പോർട്ടിയും ആകർഷകവുമാക്കാനാണ് ട്രയംഫ് ശ്രമിച്ചിരിക്കുന്നത്. വിശാലമായ ഇന്ധന ടാങ്കും പുനർരൂപകൽപ്പന ചെയ്ത സീറ്റും റൈഡർക്ക് മികച്ച കംഫർട്ട് നൽകുന്നു. വലിയ മോഡലായ ട്രൈഡന്റ് 800-നെ ഓർമ്മിപ്പിക്കുന്ന തരത്തിലുള്ള പുതിയ ഹെഡ്‌ലൈറ്റ് ഡിസൈൻ ബൈക്കിന് കൂടുതൽ പ്രീമിയം ലുക്ക് നൽകുന്നുണ്ട്. 195 കിലോഗ്രാം ഭാരമുള്ള ഈ ബൈക്കിന് മികച്ച ബാലൻസിംഗിനായി പുതിയ റിയർ ഷോക്ക് അബ്സോർബറുകളും ഷാസിയിൽ ആവശ്യമായ മാറ്റങ്ങളും വരുത്തിയിട്ടുണ്ട്.

രണ്ട് ബൈക്കുകളിലും നൽകിയിരിക്കുന്ന 660 സിസി ഇൻലൈൻ ത്രീ-സിലിണ്ടർ എൻജിൻ ഇപ്പോൾ മുമ്പത്തേക്കാൾ ശക്തമാണ്. 14 എച്ച്പി വർദ്ധനയോടെ 95 എച്ച്പി പവർ ഉത്പാദിപ്പിക്കാൻ ഈ എൻജിനാകും. വെറും 3,000 ആർപിഎമ്മിൽ തന്നെ 80 ശതമാനം ടോർക്കും ലഭ്യമാകുമെന്നത് നഗരങ്ങളിലെ യാത്രകളും ഹൈവേകളിലെ കുതിപ്പും കൂടുതൽ സുഗമമാക്കും. റെഡ്‌ലൈൻ ലിമിറ്റ് ഉയർത്തിയതും കൂളിംഗ് സിസ്റ്റത്തിലും ത്രോട്ടിൽ സിസ്റ്റത്തിലും വരുത്തിയ മാറ്റങ്ങളും ഈ ബൈക്കുകളെ പെർഫോമൻസിന്റെ കാര്യത്തിൽ ഒരു പടി മുന്നിലെത്തിക്കുന്നു.

The post കുതിരശക്തിയുടെ കരുത്തുമായി ട്രയംഫിന്റെ പുത്തൻ അവതാരങ്ങൾ! ഇത് വെറുമൊരു അപ്ഡേറ്റല്ല appeared first on Express Kerala.