ഇന്ത്യയും ന്യൂസിലൻഡും തമ്മിലുള്ള മൂന്നാം ടി20 മത്സരം ഇന്ന് രാത്രി ഏഴിന് ഗുവാഹത്തിയിൽ നടക്കും. ആദ്യ രണ്ട് മത്സരങ്ങളും ജയിച്ച് തകർപ്പൻ ഫോമിലുള്ള ഇന്ത്യൻ ടീമിന് ഇന്നത്തെ കളി കൂടി ജയിച്ച് പരമ്പര സ്വന്തമാക്കുകയാണ് ലക്ഷ്യം. ഓപ്പണർമാർ നേരത്തെ പുറത്തായിട്ടും കൂറ്റൻ സ്കോറുകൾ പിന്തുടർന്ന് ജയിക്കാനാകുന്നത് ടീമിന് വലിയ ആത്മവിശ്വാസം നൽകുന്നുണ്ട്. ഫോമിലേക്ക് തിരിച്ചെത്തിയ ക്യാപ്റ്റൻ സൂര്യകുമാർ യാദവും ഇഷാൻ കിഷനും നയിക്കുന്ന ബാറ്റിംഗ് നിര കിവീസ് ബൗളർമാർക്ക് വലിയ വെല്ലുവിളിയാകും.
ബൗളിംഗ് നിരയിലേക്ക് ജസ്പ്രീത് ബുമ്ര തിരിച്ചെത്തുന്നത് ഇന്ത്യയുടെ കരുത്ത് വർദ്ധിപ്പിക്കും. പരിക്കേറ്റ അക്സർ പട്ടേൽ കൂടി ടീമിലെത്തുമെന്നാണ് പ്രതീക്ഷിക്കുന്നത്. മറുവശത്ത്, പരമ്പരയിൽ ജീവൻ നിലനിർത്താൻ ന്യൂസിലൻഡിന് ഇന്ന് ജയം അനിവാര്യമാണ്. ഇന്ത്യയെ പ്രതിരോധിക്കണമെങ്കിൽ മികച്ച സ്കോർ കണ്ടെത്തണമെന്നും ഫീൽഡിങ്ങിലെ പിഴവുകൾ തിരുത്തണമെന്നും ക്യാപ്റ്റൻ മിച്ചൽ സാന്റ്നർ വ്യക്തമാക്കിയിട്ടുണ്ട്. പേസർ കെയ്ൽ ജാമിസൺ ഇന്ന് കിവീസ് നിരയിൽ തിരിച്ചെത്തിയേക്കും.
Also Read: ടി20 ലോകകപ്പിൽ ബംഗ്ലാദേശിന് പാകിസ്ഥാന്റെ പിന്തുണ; ഐസിസിക്കെതിരെ ആഞ്ഞടിച്ച് മൊഹ്സിൻ നഖ്വി
മത്സരത്തിൽ ടോസ് നിർണ്ണായക ഘടകമാകാനാണ് സാധ്യത. രാത്രിയിലെ കനത്ത മഞ്ഞുവീഴ്ച രണ്ടാമത് പന്തെറിയുന്ന ടീമിന് വെല്ലുവിളിയായേക്കാം എന്നതിനാൽ ടോസ് നേടുന്നവർ ബൗളിംഗ് തിരഞ്ഞെടുക്കാനാണ് സാധ്യത. ബാറ്റിംഗിനെ തുണയ്ക്കുന്ന ഗുവാഹത്തിയിലെ പിച്ചിൽ ഒരു റൺവേട്ട തന്നെയാണ് ആരാധകർ പ്രതീക്ഷിക്കുന്നത്. സ്റ്റാർ സ്പോർട്സിലും ജിയോ സിനിമയിലും മത്സരം തത്സമയം കാണാം.
The post പരമ്പര ലക്ഷ്യമിട്ട് ഇന്ത്യ, അതിജീവനം തേടി ന്യൂസിലന്ഡ്; മൂന്നാം ടി20 ഇന്ന് ഗുവാഹത്തിയിൽ appeared first on Express Kerala.
