ഷാർജ: എമിറേറ്റിലെ റിയൽ എസ്റ്റേറ്റ് മേഖലയിൽ കഴിഞ്ഞവർഷം അഭൂതപൂർവമായ വളർച്ച രേഖപ്പെടുത്തിയതായി ഷാർജ റിയൽ എസ്റ്റേറ്റ് രജിസ്ട്രേഷൻ വകുപ്പ്. വ്യാവസായിക റിയൽ എസ്റ്റേറ്റ് മേഖലയിൽ മാത്രം 924 കോടി ദിർഹത്തിന്റെ ഇടപാടുകളാണ് നടന്നത്. 2024-ൽ ഇത് 490 കോടി ദിർഹമായിരുന്നു. ഒരൊറ്റ വർഷം കൊണ്ട് 88.7 ശതമാനം വർധനവാണ് ഈ രംഗത്ത് ഉണ്ടായതെന്ന് അധികൃതർ വ്യക്തമാക്കി.
ഷാർജ റിയൽ എസ്റ്റേറ്റ് എക്സിബിഷന്റെ ഭാഗമായി സംഘടിപ്പിച്ച ‘വ്യാവസായിക റിയൽ എസ്റ്റേറ്റിന്റെ ഭാവി’ എന്ന പാനൽ ചർച്ചയിലാണ് ഈ കണക്കുകൾ പുറത്തുവിട്ടത്.
നിക്ഷേപകരുടെ ആത്മവിശ്വാസം വർധിക്കുന്നു
എമിറേറ്റിലെ നിക്ഷേപ സൗഹൃദ അന്തരീക്ഷവും മികച്ച നിയമനിർമ്മാണങ്ങളുമാണ് ഈ വളർച്ചയ്ക്ക് പിന്നിലെന്ന് റിയൽ എസ്റ്റേറ്റ് പ്രോജക്ട്സ് റെഗുലേഷൻ വകുപ്പ് ഡയറക്ടർ ഒബൈദ് അൽ മസ്ലൂം പറഞ്ഞു.
കഴിഞ്ഞവർഷം ആകെ 4,416 ഇടപാടുകൾ നടന്നു.
വ്യാവസായിക ഭൂമി, വെയർഹൗസുകൾ, കെട്ടിട സമുച്ചയങ്ങൾ എന്നിങ്ങനെ 14 വിഭാഗങ്ങളിലായി നിക്ഷേപം വ്യാപിച്ചു കിടക്കുന്നു.
ഡിജിറ്റൽവത്കരണവും അടിസ്ഥാന സൗകര്യ വികസനവും പ്രവർത്തനച്ചെലവ് കുറയ്ക്കാൻ സഹായിച്ചു.
Also Read: മെലീഹ നാഷണൽ പാർക്കിൽ അനുമതിയില്ലാതെ പ്രവേശിച്ചാൽ കനത്ത പിഴ; കർശന നിയമനടപടിയുമായി ഷാർജ
വ്യാവസായിക ഹബ്ബായി ഷാർജ
യുഎഇയിലെ ആകെ വ്യാവസായിക സ്ഥാപനങ്ങളിൽ 40 ശതമാനവും ഷാർജയിലാണെന്ന് ടൗൺ പ്ലാനിങ് ആൻഡ് സർവേ ഡിപ്പാർട്ട്മെന്റ് ഡയറക്ടർ എൻജിനിയർ അബ്ദുൾ റഹ്മാൻ അൽ സുവൈദി പറഞ്ഞു. 21 വ്യാവസായിക മേഖലകളിലായി 2,800-ലേറെ യൂണിറ്റുകൾ നിലവിൽ പ്രവർത്തിക്കുന്നുണ്ട്.
ലോകത്തിലെ 120-ലേറെ രാജ്യങ്ങളിലേക്ക് ഷാർജയിൽ നിന്നുള്ള ഉത്പന്നങ്ങൾ കയറ്റുമതി ചെയ്യുന്നുണ്ടെന്ന് ഷാർജ ചേംബർ ഓഫ് കൊമേഴ്സ് ഡയറക്ടർ ജമാൽ ബൗസഞ്ജൽ ചൂണ്ടിക്കാട്ടി. ‘ഷാർജ വിഷൻ-2030’ ലക്ഷ്യമിട്ടുള്ള വലിയ നിക്ഷേപ പദ്ധതികളാണ് വരും വർഷങ്ങളിൽ എമിറേറ്റ് വിഭാവനം ചെയ്യുന്നത്.
The post ഷാർജ റിയൽ എസ്റ്റേറ്റ് മേഖലയിൽ വൻ കുതിപ്പ്; വ്യാവസായിക ഇടപാടുകൾ 924 കോടി കടന്നു appeared first on Express Kerala.
