സ്ത്രീകളിൽ ഏറ്റവും കൂടുതൽ കണ്ടുവരുന്ന സ്തനാർബുദം, മുമ്പ് പ്രായമായവരിലാണ് കൂടുതലായി കണ്ടിരുന്നതെങ്കിൽ ഇപ്പോൾ 40 വയസ്സിന് താഴെയുള്ളവരിലും ഗണ്യമായി വർധിച്ചുവരികയാണ്. കോശങ്ങളുടെ അനിയന്ത്രിതമായ വളർച്ച മൂലം സ്തനത്തിലെ കോശങ്ങളെ ബാധിക്കുന്ന ഈ രോഗം തുടക്കത്തിൽ തിരിച്ചറിഞ്ഞാൽ 100 ശതമാനവും ഭേദമാക്കാൻ സാധിക്കുമെന്ന് ആരോഗ്യ വിദഗ്ധർ ചൂണ്ടിക്കാട്ടുന്നു. ആരോഗ്യകരമായ ശരീരഭാരം നിലനിർത്തുക, വ്യായാമം ശീലമാക്കുക, ലഹരി പദാർത്ഥങ്ങൾ ഒഴിവാക്കുക, സമീകൃതാഹാരം കഴിക്കുക തുടങ്ങിയ മുൻകരുതലുകൾ അനിവാര്യമാണ്. ഹോർമോണുകളെ ബാധിക്കുന്ന രാസവസ്തുക്കളുമായുള്ള സമ്പർക്കം കുറയ്ക്കുന്നതും രോഗപ്രതിരോധത്തിന് അത്യാവശ്യമാണെന്ന് റിപ്പോർട്ടുകൾ വ്യക്തമാക്കുന്നു.
സ്തനാർബുദം നേരത്തെ കണ്ടെത്താൻ സ്ത്രീകൾ മാസത്തിലൊരിക്കൽ സ്വയം പരിശോധന നടത്തേണ്ടത് അത്യാവശ്യമാണ്. ആർത്തവ ചക്രം കൃത്യമായവർ മാസമുറ കഴിഞ്ഞാലുടനും മറ്റുള്ളവർ കൃത്യമായ ഇടവേളകളിലും കണ്ണാടിക്ക് മുന്നിൽ നിന്ന് സ്തനങ്ങളിലും കക്ഷഭാഗങ്ങളിലും പ്രകടമായ വ്യത്യാസങ്ങളുണ്ടോ എന്ന് പരിശോധിക്കണം. സ്തനത്തിലുണ്ടാകുന്ന മുഴകൾ, വലിപ്പത്തിലെ മാറ്റം, മുലക്കണ്ണുകളിലെ സ്രവങ്ങൾ, നിറവ്യത്യാസം തുടങ്ങിയ ലക്ഷണങ്ങൾ ശ്രദ്ധയിൽപ്പെട്ടാൽ ഒട്ടും വൈകാതെ വിദഗ്ധ ചികിത്സ തേടണം. വേദനയില്ലാത്ത മുഴകളാണ് സാധാരണയായി അർബുദത്തിന്റെ ലക്ഷണമെന്നതിനാൽ വേദനയില്ലല്ലോ എന്ന് കരുതി പലരും പരിശോധന മാറ്റിവെക്കാറുണ്ട്; ഇത് രോഗം നാലോ അഞ്ചോ ഘട്ടങ്ങളിലേക്ക് നീങ്ങാനും മരണകാരണമാകാനും ഇടയാക്കും.
Also Read: ബേക്കറിയിലെ ആ രുചി ഇനി വീട്ടിലും; ഓവനില്ലാതെ പഞ്ഞിപോലുള്ള ക്രീം ബൺ തയ്യാറാക്കാം
രോഗനിർണ്ണയത്തിനായുള്ള പരിശോധനകൾ ഇന്ന് സങ്കീർണ്ണമല്ല. ഡോക്ടറുടെ ശാരീരിക പരിശോധനയ്ക്ക് പുറമെ രോഗിയുടെ പ്രായം കണക്കിലെടുത്ത് മാമോഗ്രാം, അൾട്രാസൗണ്ട് സ്റ്റഡി, എം.ആർ.ഐ തുടങ്ങിയവയിലൂടെ രോഗം സ്ഥിരീകരിക്കാം. മുഴയിലെ കോശങ്ങൾ എടുത്തുള്ള എഫ്.എൻ.എ.സി, ബയോപ്സി പരിശോധനകളിലൂടെയും രോഗത്തിന്റെ തീവ്രത മനസ്സിലാക്കാം. ആദ്യ ഘട്ടങ്ങളിൽ രോഗം തിരിച്ചറിയുകയാണെങ്കിൽ സ്തനം പൂർണ്ണമായി നീക്കം ചെയ്യാതെ തന്നെ ശസ്ത്രക്രിയ നടത്താൻ സാധിക്കുമെന്നത് വലിയൊരു ആശ്വാസമാണ്. ഇത് റേഡിയേഷൻ, കീമോതെറാപ്പി എന്നിവയുടെ തീവ്രത കുറയ്ക്കാനും ശാരീരികമായ അംഗവൈകല്യം ഒഴിവാക്കാനും രോഗിയെ സഹായിക്കുന്നു.
സ്തനാർബുദ ചികിത്സ എന്നത് സർജൻ, ഓങ്കോളജിസ്റ്റ്, പാത്തോളജിസ്റ്റ്, റേഡിയോളജിസ്റ്റ് എന്നിവരടങ്ങുന്ന ഒരു സംഘടിത പ്രവർത്തനമാണ്. ശസ്ത്രക്രിയയ്ക്ക് ശേഷം ആവശ്യാനുസരണം റേഡിയേഷൻ, കീമോതെറാപ്പി എന്നിവ നൽകുന്നു. രോഗം ശാരീരികമായെന്ന പോലെ മാനസികമായും തളർത്തുന്ന ഒന്നായതിനാൽ മാനസിക സംഘർഷം അനുഭവപ്പെടുന്നവർക്ക് സൈക്യാട്രിസ്റ്റിന്റെ സേവനവും ഉറപ്പാക്കണം. മാറിടങ്ങളിൽ കാണുന്ന 80 ശതമാനം മുഴകളും അർബുദമാകണമെന്നില്ലെങ്കിലും, ഒരു സർജനെ കണ്ട് അത് കാൻസർ അല്ലെന്ന് ഉറപ്പുവരുത്തേണ്ടത് ഓരോ സ്ത്രീയുടെയും ആരോഗ്യത്തിന് അനിവാര്യമാണ്.
The post 40 വയസ്സിന് താഴെയുള്ളവരിൽ സ്തനാർബുദം വർധിക്കുന്നു; നേരത്തെയുള്ള കണ്ടെത്തലാണ് അതിജീവനത്തിന് കരുത്ത് appeared first on Express Kerala.