ഊണിന് മാറ്റുകൂട്ടാൻ ‘മലബാർ ഫിഷ് കറി’; രുചിക്കൊപ്പം ആരോഗ്യവും

ഉച്ചയൂണിന് വിഭവങ്ങൾ എത്രയുണ്ടെങ്കിലും നല്ലൊരു മീൻകറി ഉണ്ടെങ്കിൽ അതിന്റെ മാറ്റൊന്ന് വേറെ തന്നെയാണ്. അതും നല്ല എരിവും പുളിയും തേങ്ങാപ്പാലിന്റെ മണവുമുള്ള നാടൻ മലബാർ ഫിഷ് കറി കൂടിയാണെങ്കിൽ പറയുകയും വേണ്ട. രുചിക്ക് പുറമെ ആരോഗ്യ കാര്യത്തിലും മീൻ വിഭവങ്ങൾ മുന്നിലാണ്. പ്രോട്ടീനുകളാലും ഒമേഗ ത്രീ ഫാറ്റി ആസിഡുകളാലും സമ്പന്നമായ കടൽ മത്സ്യങ്ങൾ നിത്യവും ഭക്ഷണത്തിൽ ഉൾപ്പെടുത്തുന്നത് ഗുണകരമാണെന്ന് ആരോഗ്യവിദഗ്ധർ ചൂണ്ടിക്കാട്ടുന്നു.

രുചിയേറും ഈ മലബാർ മീൻകറി വീട്ടിൽ എങ്ങനെ എളുപ്പത്തിൽ തയ്യാറാക്കാം എന്ന് നോക്കാം.

Also Read: അലിഞ്ഞുചേരട്ടെ അനുരാഗം; ചോക്ലേറ്റ് ഡേ സ്പെഷ്യലായി വീട്ടിലൊരുക്കാം 5 ചോക്ലേറ്റ് വൈവിധ്യങ്ങൾ

ആവശ്യമായ സാധനങ്ങൾ

കടൽ മത്സ്യം (മുള്ളില്ലാത്തത്): 120 ഗ്രാം

തേങ്ങാപ്പാൽ: ഒരു കപ്പ്

മല്ലി: 40 ഗ്രാം

വറ്റൽമുളക്: 60 ഗ്രാം

സവാള (നുറുക്കിയത്): ഒന്ന്

പുളി പൾപ്പ്: 5 മില്ലി

കറിവേപ്പില: മൂന്ന് തണ്ട്

കടുക്: ഒരു ഗ്രാം

മല്ലിയില: ഒരു ടീസ്പൂൺ

എണ്ണ, ഉപ്പ്: ആവശ്യത്തിന്

തയ്യാറാക്കുന്ന വിധം

ആദ്യം മല്ലിയും വറ്റൽമുളകും കുറച്ചു സമയം വെള്ളത്തിൽ കുതിർത്തു വെക്കുക. ശേഷം ഇവ നന്നായി അരച്ചെടുത്ത് തിളപ്പിച്ച് ഒരു പേസ്റ്റ് പരുവത്തിലാക്കി മാറ്റിവെക്കണം.

അടുത്തതായി, ഒരു പാനിൽ വെളിച്ചെണ്ണ ഒഴിച്ച് കടുകും കറിവേപ്പിലയും സവാളയും ചേർത്ത് നന്നായി വഴറ്റുക. സവാള പാകത്തിന് വെന്തുവരുമ്പോൾ നേരത്തെ തയ്യാറാക്കി വെച്ചിരിക്കുന്ന മല്ലി-മുളക് പേസ്റ്റ് ഇതിലേക്ക് ചേർക്കാം. ഇതിലേക്ക് മീൻ കഷണങ്ങൾ കൂടി ചേർത്ത് നന്നായി വേവിക്കുക.

മീൻ വെന്തു കഴിഞ്ഞാൽ തേങ്ങാപ്പാലും പുളി പൾപ്പും ചേർത്ത് ചെറുതായി തിളപ്പിക്കുക. കറി പാകമായി വരുമ്പോൾ തീ അണച്ച് മല്ലിയില കൊണ്ട് അലങ്കരിക്കാം. നല്ല ചൂടോടെ ചോറിനൊപ്പം ഈ മലബാർ മീൻകറി വിളമ്പാം.

The post ഊണിന് മാറ്റുകൂട്ടാൻ ‘മലബാർ ഫിഷ് കറി’; രുചിക്കൊപ്പം ആരോഗ്യവും appeared first on Express Kerala.