മതവിശ്വാസത്തിന്റെ പേരിൽ മുസ്ലീം ഭൂരിപക്ഷ രാജ്യങ്ങളിൽ തനിക്ക് യാതൊരുവിധ ബുദ്ധിമുട്ടുകളും നേരിടേണ്ടി വന്നിട്ടില്ലെന്ന് പ്രമുഖ മലയാളി പ്രവാസി വ്യവസായി രവി പിള്ള. മുസ്ലീങ്ങൾ വളരെ സ്നേഹമുള്ളവരും നല്ലവരുമാണെന്ന് അഭിമുഖത്തിൽ അദ്ദേഹം വ്യക്തമാക്കി. ജീവിതത്തിലും ബിസിനസിലും വിശ്വാസം പ്രധാനമാണെങ്കിലും, അതിനേക്കാൾ പ്രധാനം വ്യക്തികളുടെ നല്ല മനോഭാവമാണെന്ന് അദ്ദേഹം ചൂണ്ടിക്കാട്ടി. നമ്മൾ കളങ്കമില്ലാത്തവരാണെങ്കിൽ അവസരങ്ങൾ നമ്മെ തേടിയെത്തുമെന്നും, ഉന്നത സ്ഥാനങ്ങളിലുള്ള വ്യക്തികൾ മതം നോക്കിയല്ല ഒരാളെ പരിഗണിക്കുന്നതെന്നും അദ്ദേഹം കൂട്ടിച്ചേർത്തു.
അറബ് ഷെയ്ഖുമാർ ഇന്ത്യയെയും ഇന്ത്യക്കാരെയും വലിയ രീതിയിൽ ബഹുമാനിക്കുന്നവരാണെന്നും രവി പിള്ള പറഞ്ഞു. ഇന്ത്യക്കാർ ഇപ്പോൾ സമ്പന്നരാണെന്ന് ലോകം തിരിച്ചറിഞ്ഞിരിക്കുന്നു. ലോകശ്രദ്ധ നേടിയ മുകേഷ് അംബാനിയുടെ മകന്റെ ആഡംബര വിവാഹം പോലും അറബ് ലോകത്തുള്ളവർക്ക് ഇന്ത്യക്കാരെക്കുറിച്ചുള്ള മുൻധാരണകൾ തിരുത്താൻ സഹായിച്ചിട്ടുണ്ട്. ഗൾഫ് കുടിയേറ്റം ഇല്ലായിരുന്നുവെങ്കിൽ ഇന്ന് കാണുന്ന രീതിയിലുള്ള സാമ്പത്തിക പുരോഗതി കേരളത്തിന് ഉണ്ടാകുമായിരുന്നില്ലെന്നും, കേരളത്തിന്റെ വളർച്ചയിൽ പ്രവാസികൾ വഹിച്ച പങ്ക് വലുതാണെന്നും അദ്ദേഹം ഓർമ്മിപ്പിച്ചു.
Also Read: 12,000 കിലോമീറ്റർ അകലെനിന്ന് ശസ്ത്രക്രിയ; ലോക റെക്കോർഡ് കുറിച്ച് കുവൈത്ത്
പ്രമുഖ വ്യവസായിയും ലുലു ഗ്രൂപ്പ് ചെയർമാനുമായ എം.എ. യൂസഫലിയുമായി തനിക്ക് സഹോദര തുല്യമായ ബന്ധമാണുള്ളതെന്നും രവി പിള്ള വെളിപ്പെടുത്തി. തങ്ങൾക്കിടയിൽ ബിസിനസ് ബന്ധങ്ങളില്ലെങ്കിലും അദ്ദേഹത്തോട് വലിയ ബഹുമാനമാണുള്ളത്. സമൂഹത്തിനായി നിരവധി നല്ല കാര്യങ്ങൾ ചെയ്യുന്ന വ്യക്തിയാണ് യൂസഫലിയെന്നും, അദ്ദേഹം രാജ്യത്തിന് തന്നെ വലിയൊരു മുതൽക്കൂട്ടാണെന്നും രവി പിള്ള പറഞ്ഞു. വ്യക്തിബന്ധങ്ങൾക്കും മനുഷ്യത്വത്തിനുമാണ് താൻ പ്രാധാന്യം നൽകുന്നതെന്ന് വ്യക്തമാക്കുന്നതായിരുന്നു രവി പിള്ളയുടെ വാക്കുകൾ.
The post “മുസ്ലീങ്ങൾ ഏറ്റവും നല്ലവർ, വളരെ സ്നേഹമുള്ളവർ”; മതവിശ്വാസവും ബിസിനസ്സും ചർച്ച ചെയ്ത് രവി പിള്ള appeared first on Express Kerala.