2026 ടി20 ലോകകപ്പിൽ ഇന്ത്യക്കെതിരായ മത്സരം ബഹിഷ്കരിക്കാനുള്ള തീരുമാനത്തിൽ നിന്ന് പിന്മാറണമെന്ന് പാകിസ്ഥാൻ ക്രിക്കറ്റ് ബോർഡിനോട് ബംഗ്ലാദേശ് ക്രിക്കറ്റ് ബോർഡ് നേരിട്ട് ആവശ്യപ്പെട്ടു. ലോകകപ്പിൽ നിന്ന് വിട്ടുനിൽക്കുന്ന തങ്ങളോടുള്ള ഐക്യദാർഢ്യം പ്രഖ്യാപിച്ചാണ് ഇന്ത്യയുമായുള്ള പോരാട്ടം ഉപേക്ഷിക്കാൻ പാകിസ്ഥാൻ നേരത്തെ തീരുമാനിച്ചിരുന്നത്. എന്നാൽ ഈ നിലപാട് മാറ്റണമെന്ന് ആവശ്യപ്പെട്ട് ബിസിബി പ്രസിഡന്റ് അമീനുൾ ഇസ്ലാം പാകിസ്ഥാൻ ക്രിക്കറ്റ് ബോർഡിനെ സമീപിച്ചതായാണ് ദേശീയ മാധ്യമങ്ങൾ റിപ്പോർട്ട് ചെയ്യുന്നത്.
പിസിബി അധ്യക്ഷൻ മൊഹ്സിൻ നഖ്വിയും ഐസിസി വൈസ് ചെയർമാൻ ഇമ്രാൻ ഖവാജയുമായി ലാഹോറിൽ നടത്തിയ കൂടിക്കാഴ്ചയിലാണ് ബംഗ്ലാദേശ് തങ്ങളുടെ നിലപാട് വ്യക്തമാക്കിയത്. തങ്ങളോടുള്ള പിന്തുണയ്ക്ക് നന്ദിയുണ്ടെങ്കിലും ഫെബ്രുവരി 15ന് നിശ്ചയിച്ചിട്ടുള്ള ഇന്ത്യ-പാക് മത്സരം മുടക്കമില്ലാതെ നടക്കണമെന്നാണ് ബംഗ്ലാദേശിന്റെ പുതിയ ആവശ്യം. ബംഗ്ലാദേശിനെ ലോകകപ്പിൽ നിന്ന് പുറത്താക്കിയതിലുള്ള പ്രതിഷേധം എന്ന നിലയ്ക്കായിരുന്നു പാകിസ്ഥാന്റെ ബഹിഷ്കരണ ഭീഷണി.
Also Read:ഒമാനെ എട്ട് വിക്കറ്റിന് തകർത്തു; ട്വന്റി20 ലോകകപ്പിൽ സിംബാബ്വെക്ക് വിജയത്തുടക്കം
അതേസമയം ഇന്ത്യക്കെതിരെ കളിക്കാൻ ഐസിസിക്ക് മുന്നിൽ പാകിസ്ഥാൻ ചില നിബന്ധനകൾ വെച്ചിട്ടുണ്ട്. ബംഗ്ലാദേശിന് കൂടുതൽ സാമ്പത്തിക സഹായം ഉറപ്പാക്കുക, ലോകകപ്പിൽ നിന്ന് പുറത്തായെങ്കിലും ബംഗ്ലാദേശിന് ലഭിക്കേണ്ട പങ്കാളിത്ത ഫീസ് അനുവദിക്കുക, ഭാവിയിലെ ഐസിസി ടൂർണമെന്റുകൾക്ക് ആതിഥേയത്വം വഹിക്കാൻ പാകിസ്ഥാന് അവസരം നൽകുക എന്നിവയാണ് പ്രധാന ആവശ്യങ്ങൾ. ഈ ഉപാധികൾ അംഗീകരിച്ചാൽ മാത്രമേ കളിക്കാനിറങ്ങൂ എന്ന നിലപാടിലാണ് പിസിബി. എന്നാൽ ഇതിനോട് ഐസിസി ഇതുവരെ ഔദ്യോഗികമായി പ്രതികരിച്ചിട്ടില്ല.
The post ഇന്ത്യ-പാക് പോരാട്ടം നടക്കണം; ബഹിഷ്കരണത്തിൽ നിന്ന് പിന്മാറാൻ പാകിസ്ഥാനോട് ബംഗ്ലാദേശ് appeared first on Express Kerala.