കുവൈത്തിൽ ടെലഗ്രാം പ്ലാറ്റ്ഫോമുകൾ കേന്ദ്രീകരിച്ച് നടക്കുന്ന വൻ നിക്ഷേപ തട്ടിപ്പുകൾക്കെതിരെ സെൻട്രൽ ബാങ്ക് പൊതുജനങ്ങൾക്ക് കർശന മുന്നറിയിപ്പ് നൽകി. ചുരുങ്ങിയ സമയം കൊണ്ട് വൻ സാമ്പത്തിക ലാഭം വാഗ്ദാനം ചെയ്യുന്ന വ്യാജ ഗ്രൂപ്പുകളിലും ചാനലുകളിലും വീഴരുതെന്ന് അധികൃതർ അറിയിച്ചു. സൈബർ തട്ടിപ്പ് സംഘങ്ങളുടെ ആകർഷകമായ വാഗ്ദാനങ്ങൾ വിശ്വസിച്ച് നിരവധി പേർക്ക് ഇതിനോടകം പണം നഷ്ടമായ സാഹചര്യത്തിലാണ് ബാങ്കിന്റെ അടിയന്തര ഇടപെടൽ.
നിക്ഷേപകരെന്ന വ്യാജേന പണം ശേഖരിക്കുകയും അത് വിവിധ അക്കൗണ്ടുകളിലൂടെ കൈമാറി ഉറവിടം മറച്ചുവെക്കുകയും ചെയ്യുന്ന രീതിയാണ് തട്ടിപ്പുകാർ പിന്തുടരുന്നത്. പ്രധാനമായും പണം വെളുപ്പിക്കലിനാണ് ഇത്തരം പ്ലാറ്റ്ഫോമുകൾ ഉപയോഗിക്കുന്നത്. ഔദ്യോഗിക നിയന്ത്രണമില്ലാത്ത ട്രേഡിംഗ് പ്ലാറ്റ്ഫോമുകൾ വഴിയും അനൗദ്യോഗിക മാർഗങ്ങളിലൂടെയും നിക്ഷേപകരുടെ തുക തട്ടിയെടുക്കുന്ന സംഘങ്ങൾ രാജ്യത്ത് സജീവമാണെന്ന് അന്വേഷണത്തിൽ വ്യക്തമായിട്ടുണ്ട്.
Also Read: സ്വയം ചികിത്സ അപകടം! കർശന മുന്നറിയിപ്പുമായി യുഎഇ
ഇത്തരം തട്ടിപ്പുകളിൽ ഭാഗമാകുന്നവർക്ക് സാമ്പത്തിക നഷ്ടം മാത്രമല്ല, അറിയാതെ തന്നെ പണം വെളുപ്പിക്കൽ പോലുള്ള അതീവ ഗുരുതരമായ ക്രിമിനൽ കേസുകളിൽ അകപ്പെടാനും സാധ്യതയുണ്ട്. കടുത്ത നിയമനടപടികൾ നേരിടേണ്ടി വരുമെന്നതിനാൽ അംഗീകൃത പ്ലാറ്റ്ഫോമുകളിലൂടെ മാത്രം പണമിടപാടുകൾ നടത്താൻ ശ്രദ്ധിക്കണം. സംശയാസ്പദമായ ഇടപാടുകൾ ശ്രദ്ധയിൽപ്പെട്ടാൽ ഉടൻ തന്നെ അധികൃതരെ വിവരമറിയിക്കണമെന്നും കുവൈത്ത് സെൻട്രൽ ബാങ്ക് നിർദ്ദേശിച്ചു.
The post ടെലഗ്രാം വഴി നിക്ഷേപ തട്ടിപ്പ്! മുന്നറിയിപ്പുമായി കുവൈത്ത് സെൻട്രൽ ബാങ്ക്; ജാഗ്രത പാലിക്കാൻ നിർദ്ദേശം appeared first on Express Kerala.