ടി20 ലോകകപ്പിൽ നമീബിയക്കെതിരായ നിർണ്ണായക മത്സരത്തിന് മുന്നോടിയായി ഇന്ത്യൻ ടീമിന് തിരിച്ചടിയായി ഓപ്പണർ അഭിഷേക് ശർമ്മയെ ആശുപത്രിയിൽ പ്രവേശിപ്പിച്ചു. വയറിലെ അണുബാധയെത്തുടർന്ന് ഡൽഹിയിലെ സ്വകാര്യ ആശുപത്രിയിൽ ചികിത്സയിലുള്ള താരം വ്യാഴാഴ്ച നടക്കുന്ന മത്സരത്തിൽ കളിക്കുന്ന കാര്യം സംശയത്തിലാണ്. അമേരിക്കയ്ക്കെതിരായ കഴിഞ്ഞ മത്സരത്തിന് മുൻപ് തന്നെ ശാരീരിക അസ്വസ്ഥതകൾ ഉണ്ടായിരുന്ന അഭിഷേകിന്റെ ആരോഗ്യനില മത്സരം കളിച്ചതോടെ വഷളായെന്നാണ് റിപ്പോർട്ടുകൾ സൂചിപ്പിക്കുന്നത്.
അഭിഷേകിന് പകരക്കാരനായി മലയാളി താരം സഞ്ജു സാംസൺ ഇഷാൻ കിഷനൊപ്പം ഓപ്പണറായി ഇറങ്ങാനാണ് സാധ്യത. കഴിഞ്ഞ മത്സരത്തിൽ ഫീൽഡിംഗിന് ഇറങ്ങാതിരുന്ന അഭിഷേകിന് പകരം സഞ്ജു സാംസൺ ആണ് മുഴുവൻ സമയവും മൈതാനത്തുണ്ടായിരുന്നത്. നിലവിൽ അരുൺ ജെയ്റ്റ്ലി സ്റ്റേഡിയത്തിൽ നടന്ന പരിശീലന സെഷനുകളിലും അഭിഷേക് പങ്കെടുത്തിട്ടില്ല. താരം രണ്ട് ദിവസത്തിനുള്ളിൽ സുഖം പ്രാപിക്കുമെന്നാണ് പ്രതീക്ഷിക്കുന്നതെന്ന് ടീം അസിസ്റ്റന്റ് കോച്ച് റയാൻ ടെൻ ഡോഷേറ്റ് മാധ്യമങ്ങളോട് പ്രതികരിച്ചു.
Also Read: വസീമിനും ഷറഫുവിനും അർധ സെഞ്ചുറി; കരുത്തരായ കിവികൾക്കെതിരെ ഭേദപ്പെട്ട സ്കോറുമായി യുഎഇ
അതേസമയം, ഇന്ത്യൻ ക്യാമ്പിൽ നിന്ന് ശുഭകരമായ ചില വാർത്തകളും പുറത്തുവരുന്നുണ്ട്. പരിക്കിന്റെ ആശങ്കകളൊഴിഞ്ഞ് പേസർ ജസ്പ്രീത് ബുംറ പൂർണ്ണ ഫിറ്റ്നസ് വീണ്ടെടുത്ത് ബൗളിംഗ് പുനരാരംഭിച്ചു. ഓൾറൗണ്ടർ വാഷിംഗ്ടൺ സുന്ദർ ടീമിനൊപ്പം ചേർന്നതായും കഴിഞ്ഞ മത്സരത്തിൽ ഫോമിലേക്ക് തിരിച്ചെത്തിയ സൂര്യകുമാർ യാദവിന്റെ പ്രകടനം ആത്മവിശ്വാസം നൽകുന്നതായും കോച്ച് വ്യക്തമാക്കി. അഭിഷേകിന്റെ അഭാവം നികത്താൻ സഞ്ജുവിന് ലഭിക്കുന്ന ഈ അവസരം ആരാധകർ വലിയ പ്രതീക്ഷയോടെയാണ് കാണുന്നത്.
The post ഇന്ത്യക്ക് ആശങ്ക! അഭിഷേക് ശർമ്മ ആശുപത്രിയിൽ; നമീബിയക്കെതിരെ സഞ്ജു സാംസൺ ഓപ്പണറായേക്കും appeared first on Express Kerala.