മലയാളത്തിലെ ആദ്യ മുഴുനീള WWE സ്റ്റൈൽ ആക്ഷൻ കോമഡി ചിത്രമായ ‘ചത്താ പച്ച – റിങ് ഓഫ് റൗഡീസ്’ തിയേറ്ററുകളിൽ മികച്ച പ്രതികരണം നേടി മുന്നേറുകയാണ്. ചിത്രത്തിൽ മമ്മൂട്ടി അവതരിപ്പിച്ച ‘വാൾട്ടർ’ എന്ന കാമിയോ വേഷം വലിയ രീതിയിൽ ആഘോഷിക്കപ്പെടുന്നുണ്ട്. മമ്മൂട്ടിയെപ്പോലൊരു ഇതിഹാസതാരത്തെ സംവിധാനം ചെയ്യാൻ സാധിച്ചത് തന്റെ വലിയ ഭാഗ്യമാണെന്ന് ചിത്രത്തിന്റെ സംവിധായകൻ അദ്വൈത് നായർ ഒരു പ്രമുഖ ചാനലിനോട് പറഞ്ഞു. ആരോഗ്യപരമായ കാരണങ്ങളാൽ മമ്മൂട്ടി വിശ്രമത്തിലായിരുന്ന സമയത്താണ് ഈ കഥാപാത്രത്തിനായി അദ്ദേഹത്തെ സമീപിച്ചതെന്നും, അദ്ദേഹം തന്നെ അത് ചെയ്യണമെന്നത് തന്റെ നിർബന്ധമായിരുന്നുവെന്നും അദ്വൈത് വ്യക്തമാക്കി.
സിനിമയെക്കുറിച്ച് ഉയരുന്ന പോസിറ്റീവായ കമന്റുകൾക്കൊപ്പം തന്നെ വിമർശനങ്ങളെയും പോസിറ്റീവായാണ് കാണുന്നതെന്ന് അദ്വൈത് നായർ പറഞ്ഞു. സിനിമ സ്വീകരിക്കപ്പെട്ടതിൽ സന്തോഷമുണ്ടെന്നും, വരുന്ന വിമർശനങ്ങൾ തന്റെ അടുത്ത സിനിമകളിൽ തിരുത്തലുകൾ വരുത്താനുള്ള പാഠങ്ങളായിട്ടാണ് കാണുന്നതെന്നും അദ്ദേഹം കൂട്ടിച്ചേർത്തു. മോഹൻലാലിന്റെ അനന്തരവൻ കൂടിയായ അദ്വൈത് നായർ ഈ ചിത്രത്തിലൂടെയാണ് സംവിധാന രംഗത്തേക്ക് ചുവടുവെച്ചത്.
Also Read: ഇന്ദ്രൻസിന്റെ ‘ആശാനിൽ’ മമ്മൂട്ടിയുടെ ശബ്ദ സാന്നിധ്യം; ‘നിറങ്ങൾ ആയിരങ്ങൾ’ ടൈറ്റിൽ ട്രാക്ക് പുറത്ത്!
അർജുൻ അശോകൻ, റോഷൻ മാത്യു, വിശാഖ് നായർ, ഇഷാൻ ഷൗക്കത്ത്, പൂജ മോഹൻദാസ് തുടങ്ങിയവർ പ്രധാന വേഷങ്ങളിലെത്തിയ ചിത്രം നിർമ്മിച്ചത് റീൽ വേൾഡ് എന്റർടൈൻമെന്റാണ്. ട്രാൻസ് വേൾഡ്, ലെൻസ്മാൻ ഗ്രൂപ്പുകളുടെ സഹകരണത്തോടെ റിതേഷ് എസ്. രാമകൃഷ്ണൻ, ഷിഹാൻ ഷൗക്കത് എന്നിവരാണ് നിർമ്മാണം നിർവഹിച്ചത്. ദുൽഖർ സൽമാന്റെ വേഫെറർ ഫിലിംസ് വിതരണത്തിനെത്തിച്ച ചിത്രം ബോക്സ് ഓഫീസിലും മികച്ച കളക്ഷനാണ് നേടിക്കൊണ്ടിരിക്കുന്നത്.
The post ‘മമ്മൂക്കയെ സംവിധാനം ചെയ്യാൻ കഴിഞ്ഞത് ഭാഗ്യം’; വാൾട്ടറിനെക്കുറിച്ച് അദ്വൈത് നായർ appeared first on Express Kerala.