ചക്കക്കുരുവും മാങ്ങയും ചേർത്ത് ഒരു കറി ഉണ്ടാക്കിയാലോ? ഇതാ നല്ല നാടൻ റെസിപ്പി!

ചക്കയും മാങ്ങയും സുലഭമായ ഈ സീസണിൽ ഉച്ചഊണിന് മാറ്റിനിർത്താൻ കഴിയാത്ത ഒന്നാണ് ചക്കക്കുരു മാങ്ങ കറി. പുളിയും തേങ്ങയുടെ മധുരവും ചക്കക്കുരുവിന്റെ രുചിയും ചേരുന്ന ഈ കറി ചോറിനൊപ്പം മികച്ചൊരു കോമ്പിനേഷനാണ്.

സാധങ്ങൾ

ചക്കക്കുരു – 25 എണ്ണം
പച്ചമാങ്ങ – 1
തേങ്ങ ചിരകിയത് – 1 കപ്പ്
മുളക് പൊടി – ¼ ടീസ് സ്പൂൺ
മഞ്ഞൾ പൊടി – ½ +¼ ടീസ് സ്പൂൺ
ജീരകം – ഒരു നുള്ള്
വെളുത്തുള്ളി – 2 വെളുത്തുള്ളി
പച്ചമുളക് നെടുകെ കീറിയത് – 3- 4 എണ്ണം
ചെറിയ ഉള്ളി – 10 എണ്ണം
വറ്റൽ മുളക് – 2
കടുക് – ¾ ടീസ് സ്പൂൺ
ഉപ്പ് – ആവശ്യത്തിന്
വെളിച്ചെണ്ണ – 2 ടേബിൾ സ്പൂൺ
കറിവേപ്പില – ആവശ്യത്തിന്

ഉണ്ടാക്കുന്ന വിധം

ആദ്യം ചക്കക്കുരു തൊലി കളഞ്ഞു, നീളത്തിൽ 4 ആയി മുറിച്ചു നന്നായി കഴുകിയെടുക്കുക. ശേഷം മാങ്ങ ഇടത്തരം കഷണങ്ങളായി മുറിച്ച് മാറ്റി വെയ്ക്കുക. തേങ്ങ,½ ടീസ് സ്പൂൺ മഞ്ഞൾ പൊടി, ജീരകം, വെളുത്തുള്ളി, 4 ചെറിയ ഉള്ളി എന്നിവ വെള്ളം ഒഴിച്ച് നന്നായി അരച്ചെടുക്കുക. ഒരു കുക്കറിൽ കഴുകി വച്ചിരിക്കുന്ന ചക്കക്കുരു, പച്ചമാങ്ങ, പച്ചമുളക്,¼ ടീസ് സ്പൂൺ മഞ്ഞൾ പൊടി, മുളക് പൊടി, ഉപ്പ്, ഇവ മുങ്ങി കിടക്കാൻ ആവശ്യത്തിന് വെള്ളം എന്നിവ ഒഴിച്ച് 4 വിസിൽ വരുന്നത് വരെ വേവിച്ചെടുക്കുക. ശേഷം കുക്കർ തുറന്നു കഷ്ണങ്ങൾ, ഒരു തവി ഉപയോഗിച്ച് ചെറുതായി ഉടച്ച് കൊടുക്കുക. ഉടച്ച ശേഷം അരച്ച് വച്ചിരിക്കുന്ന തേങ്ങ കുക്കറിലേക്ക് ചേർക്കുക. ഗ്രേവിക്ക് ആവശ്യമായ വെള്ളം ഒഴിച്ച്, തേങ്ങയുടെ പച്ച ടേസ്റ്റ് മാറുന്നത് വരെ നന്നായി തിളപ്പിക്കുക. ഈ സമയം ഉപ്പ് ആവശ്യമെങ്കിൽ ചേർത്ത് കൊടുക്കാവുന്നതാണ്. ശേഷം ഒരു പാനിൽ വെളിച്ചെണ്ണ ഒഴിച്ച് ചൂടാകുമ്പോൾ കടുക് പൊട്ടിക്കുക. ശേഷം വറ്റൽ മുളക്, ചെറിയ ഉള്ളി, കറിവേപ്പില എന്നിവ ചേർത്ത്, ഉള്ളി ബ്രൗൺ നിറം ആകുന്നതു വരെ വഴറ്റുക. ശേഷം കുക്കറിൽ വേവിച്ച് വെച്ചതിലേക്ക് ചേർക്കുക.

The post ചക്കക്കുരുവും മാങ്ങയും ചേർത്ത് ഒരു കറി ഉണ്ടാക്കിയാലോ? ഇതാ നല്ല നാടൻ റെസിപ്പി! appeared first on Express Kerala.