ശബരിമലയിലെ ശ്രീകോവിലിന് ചുറ്റുമുള്ള സ്വർണപ്പാളികളിൽ നടന്ന വൻ ക്രമക്കേട് കണ്ടെത്താൻ പ്രത്യേക അന്വേഷണ സംഘം സന്നിധാനത്തെത്തി പരിശോധന ആരംഭിച്ചു. മുൻപ് നടത്തിയ പരിശോധനകളിൽ തട്ടിപ്പിന്റെ കൃത്യമായ വ്യാപ്തി കണ്ടെത്താൻ കഴിയാത്ത സാഹചര്യത്തിലാണ് ഹൈക്കോടതിയുടെ പ്രത്യേക അനുമതിയോടെ സ്വർണപ്പാളികളുടെ സാമ്പിളുകൾ ശേഖരിക്കുന്നത്. വിദഗ്ധ പരിശോധനയിലൂടെ മാത്രമേ സ്വർണത്തിന്റെ അളവിലും ഗുണമേന്മയിലും വരുത്തിയ മാറ്റങ്ങൾ സ്ഥിരീകരിക്കാൻ കഴിയൂ എന്നതിനാലാണ് ഈ നീക്കം. അതീവ സുരക്ഷാ മേഖലയായ ശ്രീകോവിലിന് ചുറ്റും എസ്ഐടി സംഘം നിലവിൽ വിശദമായ പരിശോധനകൾ നടത്തിവരികയാണ്.
അതേസമയം, കേസിൽ റിമാൻഡിലായിരുന്ന തിരുവാഭരണം മുൻ കമ്മീഷണർ കെ.എസ്. ബൈജുവിന് കൊല്ലം വിജിലൻസ് കോടതി സ്വാഭാവിക ജാമ്യം അനുവദിച്ചു. 90 ദിവസത്തെ റിമാൻഡ് കാലാവധി പൂർത്തിയായിട്ടും എസ്ഐടി കുറ്റപത്രം സമർപ്പിക്കാത്ത സാഹചര്യത്തിലാണ് ജാമ്യം ലഭിച്ചത്. എന്നാൽ, ദ്വാരപാലക പ്രതിമയുമായി ബന്ധപ്പെട്ട കേസിൽ റിമാൻഡ് തുടരുന്നതിനാൽ ബൈജുവിന് ഉടൻ പുറത്തിറങ്ങാനാവില്ല. ഈ മാസം 25-നാണ് ആ കേസിൽ ജാമ്യാപേക്ഷ സമർപ്പിക്കുക. കേസിലെ ഒന്നാം പ്രതി ഉണ്ണികൃഷ്ണൻ പോറ്റിയും എൻ. വാസുവും ഉൾപ്പെടെ അഞ്ച് പ്രതികൾ ഇതിനോടകം ജാമ്യം നേടിയിട്ടുണ്ട്. എന്നാൽ ദേവസ്വം ബോർഡ് മുൻ അംഗം കെ.പി. ശങ്കരദാസിനെ കോടതി 14 ദിവസത്തേക്ക് കൂടി റിമാൻഡ് ചെയ്തു.
The post ശബരിമല സ്വർണക്കൊള്ള; സന്നിധാനത്ത് തെളിവെടുപ്പ് ശക്തമാക്കി എസ്ഐടി appeared first on Express Kerala.