പുതിയ വിമാന സർവീസ് ചട്ടങ്ങൾ പൈലറ്റുമാരുടെയും ക്യാബിൻ ക്രൂവിന്റെയും വിശ്രമ സമയം വർധിപ്പിക്കുന്നത് സർവീസുകളെ ബാധിക്കുമെന്ന് എയർ ഇന്ത്യയും ഇൻഡിഗോയും കേന്ദ്ര സർക്കാരിനെ അറിയിച്ചു. പ്രതിവാര വിശ്രമം 36 മണിക്കൂറിൽ നിന്ന് 48 മണിക്കൂറായി ഉയർത്തുന്നതും രാത്രികാല വിമാന സർവീസുകൾക്ക് നിയന്ത്രണം ഏർപ്പെടുത്തുന്നതും വിമാനങ്ങൾ കൂട്ടത്തോടെ റദ്ദാക്കുന്ന സാഹചര്യം ഉണ്ടാക്കുമെന്നാണ് കമ്പനികളുടെ വാദം. ഇത് ഇന്ത്യയുടെ വ്യോമയാന മേഖലയുടെ വളർച്ചയെയും ആഗോളതലത്തിലുള്ള മത്സരശേഷിയെയും പ്രതികൂലമായി ബാധിക്കുമെന്ന് ഫെഡറേഷൻ ഓഫ് ഇന്ത്യൻ എയർലൈൻസ് (FIA) ഡിജിസിഎയ്ക്ക് അയച്ച കത്തിൽ വ്യക്തമാക്കുന്നു.
ഓരോ ക്രൂ അംഗത്തിനും പ്രത്യേക ഹോട്ടൽ മുറി നൽകണമെന്ന നിർദ്ദേശവും കമ്പനികൾക്ക് കനത്ത സാമ്പത്തിക ബാധ്യതയുണ്ടാക്കുമെന്ന് കത്തിൽ പറയുന്നു. അന്താരാഷ്ട്ര തലത്തിൽ ഇത്തരം നിയമങ്ങൾ നിർബന്ധമല്ലെന്നും, വിമാനത്താവളങ്ങൾക്ക് സമീപം ആവശ്യത്തിന് മുറികൾ ലഭ്യമല്ലാത്തത് ക്രൂ മാനേജ്മെന്റ് സങ്കീർണ്ണമാക്കുമെന്നും കമ്പനികൾ ചൂണ്ടിക്കാട്ടുന്നു. സുരക്ഷാ കാരണങ്ങളാൽ ജീവനക്കാരുടെ മാനസികാരോഗ്യത്തിന് മുൻഗണന നൽകണമെന്ന് സർക്കാർ ആവശ്യപ്പെടുമ്പോഴും, പ്രായോഗികമായ തടസ്സങ്ങൾ പരിഗണിക്കണമെന്നാണ് കമ്പനികളുടെ ആവശ്യം.
Also Read:ആകാശം കാക്കാൻ റഫാൽ, കടൽ കാക്കാൻ പോസിഡോൺ; ഇന്ത്യയുടെ പ്രതിരോധക്കരുത്തിന് പുത്തൻ ചിറകുകൾ
നിലവിൽ സാമ്പത്തിക പ്രതിസന്ധിയും വിമാനങ്ങൾ റദ്ദാക്കുന്നതുമായി ബന്ധപ്പെട്ട പരിശോധനകളും നേരിടുന്ന സാഹചര്യത്തിലാണ് എയർലൈനുകൾ ഈ സമ്മർദ്ദ തന്ത്രവുമായി രംഗത്തെത്തിയിരിക്കുന്നത്. നേരത്തെ തന്നെ ആയിരക്കണക്കിന് സർവീസുകൾ റദ്ദാക്കേണ്ടി വന്ന ഇൻഡിഗോയും, സാമ്പത്തിക നഷ്ടം നേരിടുന്ന എയർ ഇന്ത്യയും നിയമങ്ങളിൽ ഇളവ് ലഭിച്ചില്ലെങ്കിൽ രാജ്യത്തെ വിമാന സർവീസുകൾ താളംതെറ്റുമെന്ന് മുന്നറിയിപ്പ് നൽകുന്നു.
The post ക്രൂ വിശ്രമ നിയമങ്ങളിൽ ഇളവ് വേണം; കേന്ദ്രത്തിന് മുന്നറിയിപ്പുമായി എയർലൈൻ കമ്പനികൾ appeared first on Express Kerala.