ഓട്ടോമൊബൈൽ രംഗത്ത് വിസ്മയിപ്പിക്കുന്ന വളർച്ചയുമായി മഹീന്ദ്ര ആൻഡ് മഹീന്ദ്ര. വാഹനങ്ങൾക്കായി വിപണിയിൽ തിരക്ക് വർദ്ധിച്ച സാഹചര്യത്തിൽ ഉൽപ്പാദന ശേഷി വൻതോതിൽ വികസിപ്പിക്കാനൊരുങ്ങുകയാണ് കമ്പനി. 2026 സാമ്പത്തിക വർഷത്തിന്റെ മൂന്നാം പാദത്തിൽ കമ്പനിയുടെ അറ്റാദായം 46.97 ശതമാനം വർധിച്ച് 4,674.64 കോടി രൂപയിലെത്തി. എസ്യുവി വിൽപ്പനയിൽ 26 ശതമാനവും ട്രാക്ടർ വിഭാഗത്തിൽ 23 ശതമാനവും വളർച്ച രേഖപ്പെടുത്തിയതോടെ, വിപണിയിലെ തങ്ങളുടെ ആധിപത്യം ഉറപ്പിക്കാൻ പുതിയ നിർമ്മാണ പ്ലാനുകളുമായി മുന്നോട്ട് പോവുകയാണ് മഹീന്ദ്ര.
Also Read: ഇലക്ട്രിക് വിപണിയിൽ വൻ അട്ടിമറി! ഓലയെയും ഏതറിനെയും പിന്തള്ളി ‘പഴയ പുലികൾ’ ഒന്നാമത്!
വർദ്ധിച്ചുവരുന്ന ആവശ്യകത നിറവേറ്റുന്നതിനായി 2027 ഓഗസ്റ്റ്-സെപ്റ്റംബർ മാസത്തോടെ ചക്കൻ, നാസിക് പ്ലാന്റുകളിൽ പ്രതിമാസം 5,000 അധിക ഐസിഇ (ICE) യൂണിറ്റുകൾ വരെ നിർമ്മിക്കുമെന്ന് സിഇഒ രാജേഷ് ജെജുരിക്കർ അറിയിച്ചു. ഇതിന് പുറമെ, ഇലക്ട്രിക് വാഹന വിഭാഗത്തിലും വൻ വിപുലീകരണമാണ് ലക്ഷ്യമിടുന്നത്. 9S പ്ലാറ്റ്ഫോമിന് കീഴിലുള്ള ഇലക്ട്രിക് വാഹനങ്ങളുടെ ഉൽപ്പാദനം പ്രതിമാസം 4,000 യൂണിറ്റുകൾ വരെ വർദ്ധിപ്പിക്കും. ഇതോടെ കമ്പനിയുടെ ആകെ ഉൽപ്പാദന ശേഷിയിൽ പ്രതിമാസം 7,000 യൂണിറ്റുകളുടെ വരെ വർദ്ധനവുണ്ടാകും. കൂടാതെ മഹാരാഷ്ട്രയിലെ നാഗ്പൂരിൽ പുതിയ നിർമ്മാണ കേന്ദ്രം സ്ഥാപിക്കാനും കമ്പനി ലക്ഷ്യമിടുന്നുണ്ട്.
കേന്ദ്ര സർക്കാരിന്റെ പിഎൽഐ (PLI) പദ്ധതിയുടെ ആനുകൂല്യങ്ങൾ മഹീന്ദ്രയുടെ ഇലക്ട്രിക് വാഹനമായ XEV 9e ശ്രേണിക്ക് ഇതിനകം ലഭ്യമായിട്ടുണ്ട്. മറ്റ് മോഡലുകൾക്കും വരും വർഷം തന്നെ അംഗീകാരം ലഭിക്കുമെന്നാണ് പ്രതീക്ഷിക്കുന്നത്. നിലവിൽ എസ്യുവി വിപണിയിൽ 24.1 ശതമാനവും ലൈറ്റ് കൊമേഴ്സ്യൽ വെഹിക്കിൾ വിഭാഗത്തിൽ 51.9 ശതമാനവും വിപണി വിഹിതം മഹീന്ദ്ര കൈക്കലാക്കി കഴിഞ്ഞു. എന്നാൽ, നിർമ്മാണ സാമഗ്രികളുടെ വിലക്കയറ്റവും കറൻസി മൂല്യത്തിലെ മാറ്റങ്ങളും കാരണം വാഹനങ്ങൾക്ക് ഏകദേശം ഒരു ശതമാനം വരെ വില വർദ്ധനവ് ഉണ്ടായേക്കുമെന്നും കമ്പനി സൂചിപ്പിച്ചു.
The post കുതിച്ചുയരാൻ മഹീന്ദ്ര! ഡിമാൻഡ് പരിഗണിച്ച് ഉൽപ്പാദനം ഇരട്ടിയാക്കുന്നു… appeared first on Express Kerala.