ശബരിമലയിലെ സ്വർണ്ണക്കൊള്ളയുമായി ബന്ധപ്പെട്ട കേസിൽ ശാസ്ത്രീയ തെളിവുകൾ ശേഖരിക്കുന്നതിനായുള്ള പരിശോധനകൾ സന്നിധാനത്ത് വിജയകരമായി പൂർത്തിയായി. ഹൈക്കോടതിയുടെ പ്രത്യേക അനുമതിയോടെ നടന്ന ഈ നടപടിയിൽ, ശ്രീകോവിലിലെ കട്ടിളപ്പാളികൾ, ദ്വാരപാലക ശിൽപം, തൂണുകൾ എന്നിവയിൽ നിന്നാണ് എസ്.ഐ.ടി സംഘം സാമ്പിളുകൾ ശേഖരിച്ചത്. ലീഗൽ മെട്രോളജിയിലെ ഗോൾഡ് അസെസ്മെൻ്റ് വിഭാഗത്തിന്റെ സഹായത്തോടെ നടന്ന ഈ പരിശോധനയ്ക്ക് ശേഷം ഇളക്കിമാറ്റിയ സ്വർണ്ണപ്പാളികൾ തിരികെ സ്ഥാപിക്കാനുള്ള നടപടികൾ ആരംഭിച്ചിട്ടുണ്ട്.
നേരത്തെ വി.എസ്.എസ്.സി നടത്തിയ പരിശോധനാ റിപ്പോർട്ടിൽ അവ്യക്തതകൾ നിലനിന്നിരുന്നതിനാലാണ് ഇത്തവണ കൂടുതൽ അളവിൽ സാമ്പിളുകൾ ശേഖരിക്കാൻ തീരുമാനിച്ചത്. നഷ്ടപ്പെട്ട സ്വർണ്ണത്തിന്റെ കൃത്യമായ അളവും അവയുടെ കാലപ്പഴക്കവും ശാസ്ത്രീയമായി കണ്ടെത്തുകയാണ് ഇതിലൂടെ ലക്ഷ്യമിടുന്നത്. ശേഖരിച്ച സാമ്പിളുകൾ കൂടുതൽ വ്യക്തതയ്ക്കായി മുംബൈയിലെ ഭാഭാ അറ്റോമിക് റിസർച്ച് സെന്ററിൽ (BARC) പരിശോധനയ്ക്ക് അയക്കാനാണ് നിലവിൽ അധികൃതർ ആലോചിക്കുന്നത്.
The post ശബരിമലയിൽ വീണ്ടും സ്വർണ്ണപ്പരിശോധന; കട്ടിളപ്പാളികളിൽ നിന്നും ശില്പങ്ങളിൽ നിന്നും കൂടുതൽ സാമ്പിളുകൾ ശേഖരിച്ചു appeared first on Express Kerala.
