ആരോഗ്യകരമായ ഭക്ഷണശീലങ്ങളിലേക്ക് മലയാളി മാറുമ്പോൾ വിപണിയിൽ തരംഗമാവുകയാണ് മഖാന. വർഷങ്ങളായി ഉത്തരേന്ത്യൻ ഭക്ഷണരീതികളിൽ സജീവമായ മഖാന, ഇന്ന് ഡയറ്റ് പ്ലാനുകളിലെ ഒഴിവാക്കാനാവാത്ത ലഘുഭക്ഷണമായി മാറിയിരിക്കുന്നു. കാൽസ്യം, പ്രോട്ടീൻ, ആന്റിഓക്സിഡന്റുകൾ എന്നിവയാൽ സമ്പുഷ്ടമായ ഈ ‘സൂപ്പർ ഫുഡ്’ താമര വിത്തുകളിൽ നിന്നാണ് ഉത്പാദിപ്പിക്കുന്നത്.
കൊഴുപ്പും കലോറിയും കുറവായതിനാൽ ശരീരഭാരം കുറയ്ക്കാൻ ആഗ്രഹിക്കുന്നവർക്ക് ഇത് ഉത്തമമാണ്. വെറുതെ വറുത്ത് കഴിക്കുന്നതിനേക്കാൾ മഖാന കൊണ്ട് രുചികരമായ പല വിഭവങ്ങളും വീട്ടിൽ തന്നെ എളുപ്പത്തിൽ തയ്യാറാക്കാം. അത്തരത്തിൽ ചില റെസിപ്പികൾ പരിചയപ്പെടാം.
- മസാല മഖാന
എരിവുള്ള വിഭവങ്ങൾ ഇഷ്ടപ്പെടുന്നവർക്ക് മസാല മഖാന മികച്ചതാണ്. ഒരു ടീസ്പൂൺ കടുകെണ്ണ ചൂടാക്കി അതിൽ ജീരകം, മഞ്ഞൾപ്പൊടി, മുളകുപൊടി, അല്പം ബ്ലാക്ക് സോൾട്ട് എന്നിവ ചേർത്ത് ഇളക്കുക. ഇതിലേക്ക് മഖാന ചേർത്ത് നന്നായി ക്രിസ്പിയാകുന്നത് വരെ വറുത്തെടുക്കാം.
- നിലക്കടല ചേർത്ത മഖാന
നെയ്യ് ചൂടാക്കി അതിൽ കറിവേപ്പിലയും നിലക്കടലയും വറുക്കുക. ഇതിലേക്ക് മഖാന ചേർത്ത് അൽപ്പം കായം, ഉപ്പ്, ചതച്ച കുരുമുളക് എന്നിവ കൂടി ചേർത്തിളക്കിയാൽ പോഷകസമൃദ്ധമായ സ്നാക്ക് തയ്യാർ.
- ചീസ് മഖാന
കുട്ടികൾക്ക് ഏറെ ഇഷ്ടപ്പെടുന്ന ഒന്നാണിത്. മഖാന വറുത്തെടുത്ത ശേഷം അതിൽ ഗ്രേറ്റ് ചെയ്ത ചീസ്, ഉണങ്ങിയ പുതിനയില, വെളുത്തുള്ളി പൊടി, കുരുമുളക് എന്നിവ ചേർക്കാം. വെണ്ണയ്ക്ക് പകരം ഒലിവ് ഓയിൽ സ്പ്രേ ഉപയോഗിക്കുന്നത് കൂടുതൽ ആരോഗ്യകരമാണ്.
- ചാട്ട് സ്റ്റൈൽ മഖാന
സ്ട്രീറ്റ് ഫുഡ് പ്രേമികൾക്ക് പരീക്ഷിക്കാവുന്ന വിഭവമാണിത്. വറുത്ത മഖാനയിൽ ചെറുതായി അരിഞ്ഞ സവാള, തക്കാളി, മല്ലിയില, ചാട്ട് മസാല, നാരങ്ങ നീര് എന്നിവ ചേർത്ത് വിളമ്പാം.
- സ്വീറ്റ് മഖാന
മധുരം കഴിക്കാൻ താല്പര്യമുള്ളവർക്ക് മഖാനയും എള്ളും വറുത്ത ശേഷം ഉരുക്കിയ ശർക്കരയിൽ യോജിപ്പിച്ച് തണുപ്പിച്ച് കഴിക്കാവുന്നതാണ്.
NB: ഈ വാർത്തയിൽ ഉപയോഗിച്ചിരിക്കുന്ന ചിത്രം പ്രതീകാത്മകമാണ്. (Generated by AI)
The post ഗുണങ്ങളിൽ കേമൻ, രുചിയിൽ താരം; മഖാന വാങ്ങിയവർ അറിയാൻ… appeared first on Express Kerala.
