തിരഞ്ഞെടുപ്പിൽ സ്ഥാനാർത്ഥി ആരാകണമെന്ന് തീരുമാനിക്കുന്നത് പാർട്ടിയാണെന്നും അതിൽ തർക്കങ്ങൾക്കോ ആശയക്കുഴപ്പങ്ങൾക്കോ സ്ഥാനമില്ലെന്നും കേരള കോൺഗ്രസ് (എം) ചെയർമാൻ ജോസ് കെ. മാണി വ്യക്തമാക്കി. താൻ പാലായിൽ മത്സരിക്കുമെന്ന് മന്ത്രി റോഷി അഗസ്റ്റിൻ പറഞ്ഞത് പാർട്ടിയുടെയും അണികളുടെയും ആഗ്രഹത്തിന്റെ അടിസ്ഥാനത്തിലാണെന്നും, അത് മുഖ്യമന്ത്രി സ്ഥാനാർത്ഥിയെ തീരുമാനിക്കുന്നതുപോലെ ഗൗരവകരമായ ചർച്ചയാക്കി മാറ്റേണ്ടതില്ലെന്നും അദ്ദേഹം പറഞ്ഞു. പാർട്ടിക്കുള്ളിൽ ഒരു അംഗം തന്റെ ആഗ്രഹം പ്രകടിപ്പിക്കുന്നതിൽ തെറ്റില്ലെന്നും അന്തിമ തീരുമാനം പാർട്ടി പ്രഖ്യാപിക്കുമെന്നും അദ്ദേഹം കൂട്ടിച്ചേർത്തു.
റോഷി അഗസ്റ്റിനും താനും സഹോദരതുല്യരാണെന്നും മാധ്യമങ്ങൾ പ്രചരിപ്പിക്കുന്നത് പോലെ തങ്ങൾക്കിടയിൽ യാതൊരുവിധ അസ്വാരസ്യങ്ങളും ഇല്ലെന്നും ജോസ് കെ. മാണി പറഞ്ഞു. വേദിയിൽ മൈക്ക് തട്ടിപ്പറിച്ചു എന്ന രീതിയിലുള്ള വാർത്തകൾ അടിസ്ഥാനരഹിതമാണെന്നും അത്തരം സ്വാതന്ത്ര്യം റോഷി അഗസ്റ്റിന് താൻ നൽകിയിട്ടുണ്ടെന്നും അദ്ദേഹം വ്യക്തമാക്കി. മാധ്യമങ്ങൾ സ്വന്തമായി നരേറ്റീവുകൾ നിർമ്മിക്കുകയാണെന്നും ഭാവനയിൽ നിന്നുള്ള വിശദീകരണങ്ങൾ നൽകുന്നതുകൊണ്ടാണ് കാര്യങ്ങൾ തിരുത്തേണ്ടി വരുന്നതെന്നും അദ്ദേഹം വിമർശിച്ചു.
Also Read: വികസനത്തിൽ വിപ്ലവം കുറിക്കാൻ നഗരനയം; യു.ഡി.എഫ് ആരോപണങ്ങൾ പച്ചക്കള്ളമെന്ന് എം.വി. ഗോവിന്ദൻ
എൽഡിഎഫിന്റെ വികസനമുന്നേറ്റ ജാഥയുടെ ശോഭ കെടുത്താൻ പെയ്ഡ് പ്ലാറ്റ്ഫോമുകൾ വഴി സംഘടിത നീക്കം നടക്കുന്നുണ്ടെന്ന് അദ്ദേഹം ആരോപിച്ചു. വിവാദങ്ങൾക്ക് പിന്നാലെയല്ല, വികസനത്തിന് പിന്നാലെയാണ് പാർട്ടി പോകുന്നത്. ഓരോ തിരഞ്ഞെടുപ്പും വളരെ പ്രധാനപ്പെട്ടതാണെന്നും രാഷ്ട്രീയ ലക്ഷ്യത്തോടെയുള്ള ഇത്തരം കുപ്രചരണങ്ങൾ ജനങ്ങൾ മുഖവിലയ്ക്കെടുക്കില്ലെന്നും ജോസ് കെ. മാണി വ്യക്തമാക്കി. വരാനിരിക്കുന്ന നിയമസഭാ തിരഞ്ഞെടുപ്പിനെ ഒറ്റക്കെട്ടായി നേരിടുമെന്ന സൂചനയാണ് അദ്ദേഹം നൽകിയത്.
The post സ്ഥാനാർത്ഥിയെ തീരുമാനിക്കുന്നത് പാർട്ടി! റോഷി അഗസ്റ്റിനുമായി തർക്കമില്ല; വിവാദങ്ങൾ തള്ളി ജോസ് കെ. മാണി appeared first on Express Kerala.