രുചിയുടെ കൊറിയൻ വസന്തം; വീട്ടിലുണ്ടാക്കാം ആരോഗ്യപ്രദമായ ‘കിംചി’

കെ-ഡ്രാമകളിലൂടെയും കെ-പോപ്പിലൂടെയും മലയാളികളുടെ ഹൃദയം കവർന്ന കൊറിയൻ സംസ്കാരം ഇപ്പോൾ അടുക്കളകളിലും തരംഗമാവുകയാണ്. ആഗോളതലത്തിൽ കൊറിയൻ ഭക്ഷണരീതിക്ക് ലഭിക്കുന്ന ജനപ്രീതിയിൽ ഏറ്റവും മുൻപന്തിയിൽ നിൽക്കുന്ന വിഭവമാണ് ‘കിംചി’. എരിവും പുളിയും ഉപ്പും ചേർന്ന സങ്കീർണ്ണമായ രുചിക്കൂട്ടായ കിംചി, ഒരു സൈഡ് ഡിഷ് എന്നതിലുപരി ആരോഗ്യദായകമായ ഒന്നുകൂടിയാണ്.

എന്താണ് കിംചി?

കാബേജ്, റാഡിഷ്, കുക്കുമ്പർ തുടങ്ങിയ പച്ചക്കറികൾ ഉപ്പും പ്രത്യേക മസാലകളും ചേർത്ത് പുളിപ്പിച്ചെടുക്കുന്ന പരമ്പരാഗത വിഭവമാണിത്. കൊറിയൻ ഭക്ഷണമേശയിലെ ഒഴിച്ചുകൂടാനാവാത്ത സാന്നിധ്യമായ കിംചി പ്രധാനമായും മൂന്ന് തരത്തിലുണ്ട്.

ബേച്ചു കിംചി: നാപ്പ കാബേജ് ഉപയോഗിച്ചുണ്ടാക്കുന്നത്. ഇതാണ് ഏറ്റവും ജനപ്രിയം.
കക്ദുഗി: റാഡിഷ് (മുള്ളങ്കി) പ്രധാന ചേരുവയായത്.
ഓയ് കിംചി: കുക്കുമ്പർ ഉപയോഗിച്ചുള്ള വെറൈറ്റി.

Also Read: പായസക്കൂട്ടിൽ ഇനി പേരയ്ക്കയുടെ മധുരം; വിരുന്നുകളിൽ തരംഗമായി ‘പേരയ്ക്കാ പായസം’

ആരോഗ്യഗുണങ്ങൾ

പച്ചക്കറികൾ പുളിപ്പിച്ചെടുക്കുന്നതിനാൽ പ്രോബയോട്ടിക്സുകളാൽ സമ്പന്നമാണ് കിംചി. ഇത് ദഹനപ്രക്രിയ സുഗമമാക്കാനും രോഗപ്രതിരോധ ശേഷി വർദ്ധിപ്പിക്കാനും സഹായിക്കുന്നു.

വീട്ടിൽ തന്നെ കിംചി തയ്യാറാക്കുന്നത് എങ്ങനെയെന്ന് നോക്കാം.

ആവശ്യമായ ചേരുവകൾ

നാപ്പ കാബേജ് – 2 കിലോ

ഉപ്പ് (അയോഡിൻ ഇല്ലാത്തത്) – 1/4 കപ്പ്

വെളുത്തുള്ളി പേസ്റ്റ് – 1 ടേബിൾസ്പൂൺ

ഇഞ്ചി ചതച്ചത് – 1 ടീസ്പൂൺ

പഞ്ചസാര – 1 ടീസ്പൂൺ

ഫിഷ് സോസ്/ചെമ്മീൻ പേസ്റ്റ് – 2 ടേബിൾസ്പൂൺ (വെജിറ്റേറിയൻ ആണെങ്കിൽ വെള്ളം ഉപയോഗിക്കാം)

കൊറിയൻ ചുവന്ന മുളക് പൊടി (ഗൊച്ചുഗാരു) – 1 മുതൽ 5 ടേബിൾസ്പൂൺ വരെ (എരിവിനനുസരിച്ച്)

റാഡിഷ്, സ്കില്ലിയൻസ്- ആവശ്യത്തിന്

പാചകം ചെയ്യുന്ന രീതി

കാബേജ് പാകപ്പെടുത്തൽ: കാബേജ് നീളത്തിൽ നാലായി മുറിച്ച്, വീണ്ടും കഷണങ്ങളാക്കുക. ഇതിൽ ഉപ്പ് പുരട്ടി നന്നായി മസാജ് ചെയ്യുക. ആവശ്യത്തിന് വെള്ളം ഒഴിച്ച് ഒരു ഭാരം മുകളിൽ വെച്ച് 2 മണിക്കൂർ വയ്ക്കുക. ശേഷം തണുത്ത വെള്ളത്തിൽ മൂന്ന് തവണ കഴുകി 20 മിനിറ്റ് വറ്റിക്കാൻ വയ്ക്കുക.

മസാല കൂട്ട്: വെളുത്തുള്ളി, ഇഞ്ചി, പഞ്ചസാര, ഫിഷ് സോസ് എന്നിവ ചേർത്ത് പേസ്റ്റ് ഉണ്ടാക്കുക. ഇതിലേക്ക് എരിവിനായി ഗൊച്ചുഗാരു ചേർത്ത് ഇളക്കി മാറ്റിവെക്കുക.

മിക്സിംഗ്: വറ്റിച്ചെടുത്ത കാബേജും മുറിച്ചുവെച്ച റാഡിഷ്, സ്കില്ലിയൻസ് എന്നിവ മസാല പേസ്റ്റുമായി നന്നായി യോജിപ്പിക്കുക.

പുളിപ്പിക്കൽ: തയ്യാറാക്കിയ മിശ്രിതം ഒരു ഭരണയിലോ ഗ്ലാസ് പാത്രത്തിലോ ആക്കി അടച്ചു വെക്കുക. മുറിയിലെ താപനിലയിൽ ഒന്നുമുതൽ അഞ്ച് ദിവസം വരെ സൂക്ഷിക്കാം. ദിവസവും പാത്രം തുറന്ന് ഗ്യാസ് പുറത്തു കളയുകയും രുചി പരിശോധിക്കുകയും ചെയ്യുക. പാകമായെന്ന് തോന്നിയാൽ ഫ്രിഡ്ജിലേക്ക് മാറ്റാം.

തയ്യാറാക്കി ഒന്നോ രണ്ടോ ആഴ്ചയ്ക്ക് ശേഷം ഉപയോഗിക്കുമ്പോഴാണ് കിംചിക്ക് കൂടുതൽ സ്വാദേറുന്നത്.

NB: ഈ വാർത്തയിൽ ഉപയോഗിച്ചിരിക്കുന്ന ചിത്രം പ്രതീകാത്മകമാണ്. (Generated by AI)

The post രുചിയുടെ കൊറിയൻ വസന്തം; വീട്ടിലുണ്ടാക്കാം ആരോഗ്യപ്രദമായ ‘കിംചി’ appeared first on Express Kerala.