ഒന്നാം ക്ലാസ് വിദ്യാർത്ഥികൾക്ക് നിലവിലുള്ള പരീക്ഷാ രീതി ഒഴിവാക്കുന്നതിനെക്കുറിച്ച് സർക്കാർ ഗൗരവമായി ആലോചിക്കുകയാണെന്ന് വിദ്യാഭ്യാസ മന്ത്രി വി. ശിവൻകുട്ടി പറഞ്ഞു. വട്ടിയൂർക്കാവ് മഞ്ചമ്പാറ എൽ.പി. സ്കൂളിൽ നടന്ന അങ്കണവാടി ഫെസ്റ്റിന്റെ സമാപന സമ്മേളനത്തിൽ സംസാരിക്കുകയായിരുന്നു അദ്ദേഹം. നിലവിൽ ഒന്നാം ക്ലാസിൽ നടക്കുന്ന പരീക്ഷകൾ കുട്ടികളിൽ അനാവശ്യ ഭയമുണ്ടാക്കുന്നുണ്ടെന്നും, ഇത് അവരുടെ സ്വഭാവികമായ മാനസിക വളർച്ചയെ ബാധിക്കാൻ പാടില്ലെന്നും മന്ത്രി ചൂണ്ടിക്കാട്ടി.
കുട്ടികൾ പഠനം ഒരു ഭാരമായി കാണാതെ, അവധിക്കാലം പോലെ ആസ്വദിച്ചു തന്നെ പഠിക്കണമെന്നതാണ് സർക്കാരിന്റെ നയം. പരീക്ഷ എന്ന പേരിൽ കുട്ടികളുടെ മാനസികാവസ്ഥ തകർക്കുന്ന രീതികൾ മാറ്റേണ്ടതുണ്ട്. ഇതിന്റെ ഭാഗമായാണ് ഒന്നാം ക്ലാസിലെ പരീക്ഷകളുടെ പ്രസക്തിയെക്കുറിച്ച് പുനരാലോചന നടത്തുന്നത്. കുട്ടികൾക്ക് സന്തോഷകരമായ പഠനാന്തരീക്ഷം ഉറപ്പാക്കുകയാണ് ലക്ഷ്യമെന്നും മന്ത്രി കൂട്ടിച്ചേർത്തു.
The post ഒന്നാം ക്ലാസിൽ പരീക്ഷ ഒഴിവാക്കിയേക്കും; കുട്ടികളിൽ ഭയമുണ്ടാക്കരുതെന്ന് മന്ത്രി വി. ശിവൻകുട്ടി appeared first on Express Kerala.