നവാഗതനായ ജിത്തു സതീശൻ തിരക്കഥയെഴുതി സംവിധാനം ചെയ്യുന്ന മിസ്റ്ററി ഫാൻ്റസി ത്രില്ലർ ചിത്രം ‘സംഭവം അധ്യായം ഒന്ന്’ മാർച്ച് 6 മുതൽ പ്രദർശനത്തിനെത്തുന്നു. ഏറെ ശ്രദ്ധിക്കപ്പെട്ട ‘സംഭവം’ എന്ന ഹ്രസ്വചിത്രത്തെ ആസ്പദമാക്കി ഒരുക്കുന്ന ഈ ചിത്രം നല്ല സിനിമ പ്രൊഡക്ഷൻസിൻ്റെ ബാനറിലാണ് നിർമ്മിച്ചിരിക്കുന്നത്. അസ്ക്കർ അലി, വിനീത് കുമാർ, സിദ്ധാർത്ഥ് ഭരതൻ, സെന്തിൽ കൃഷ്ണ, അസ്സിം ജമാൽ എന്നിവർ പ്രധാന വേഷങ്ങളിലെത്തുന്ന ചിത്രം സസ്പെൻസിനും ആക്ഷനും വലിയ പ്രാധാന്യമാണ് നൽകുന്നത്.
പൂർണ്ണമായും വനാന്തരീക്ഷത്തിൽ ചിത്രീകരിച്ച ഈ സിനിമയുടെ പ്രധാന ലൊക്കേഷൻ പാലക്കാട്ടെ ധോണി ഫോറസ്റ്റ് ആയിരുന്നു. കേരള-തമിഴ്നാട് അതിർത്തിയിലെ നിഗൂഢമായ ഒരു വനപ്രദേശത്തേക്ക് പ്രവേശിക്കുന്നവരാരും പിന്നീട് തിരിച്ചുവന്നിട്ടില്ലെന്ന വിചിത്രമായ പശ്ചാത്തലത്തിലൂടെയാണ് കഥ വികസിക്കുന്നത്. പാലക്കാട്, തിരുവനന്തപുരം, വൈക്കം തുടങ്ങിയ സ്ഥലങ്ങളിലായി ചിത്രീകരണം പൂർത്തിയാക്കിയ സിനിമയിൽ നവീൻ നജോസ് ഛായാഗ്രഹണവും ഗോഡ്വിൻ തോമസ് പശ്ചാത്തല സംഗീതവും നിർവ്വഹിക്കുന്നു. പട്ടണം റഷീദ്, സമീറ സനീഷ് തുടങ്ങി മലയാള സിനിമയിലെ പ്രമുഖ സാങ്കേതിക പ്രവർത്തകരും ഈ ചിത്രത്തിന് പിന്നിൽ അണിനിരക്കുന്നുണ്ട്.
The post കാടിന്റെ നിഗൂഢതകളുമായി ‘സംഭവം അധ്യായം ഒന്ന്’; മിസ്റ്ററി ഫാൻ്റസി ത്രില്ലർ തിയേറ്ററുകളിലേക്ക് appeared first on Express Kerala.