ചെന്നൈ: തമിഴ്നാട് വെട്രി കഴകം അധ്യക്ഷൻ വിജയ്യെയും നടി തൃഷയെയും സംബന്ധിച്ച് നടത്തിയ വിവാദ പരാമർശത്തിൽ തമിഴ്നാട് ബിജെപി നേതാവ് നൈനാർ നാഗേന്ദ്രൻ ഖേദം പ്രകടിപ്പിച്ചു. തന്റെ വാക്കുകൾ അബദ്ധത്തിൽ സംഭവിച്ചതാണെന്നും ആർക്കെങ്കിലും വിഷമമുണ്ടായെങ്കിൽ ക്ഷമ ചോദിക്കുന്നുവെന്നും അദ്ദേഹം വ്യക്തമാക്കി. വിജയ്യുടെ രാഷ്ട്രീയ പരിചയക്കുറവിനെ പരിഹസിക്കുന്നതിനിടയിലാണ് നൈനാർ നാഗേന്ദ്രൻ വ്യക്തിപരമായ അധിക്ഷേപം നടത്തിയത്.
വിജയ് രാഷ്ട്രീയത്തിൽ വിജയിക്കണമെങ്കിൽ ആദ്യം തൃഷയുടെ വീട്ടിൽ നിന്ന് പുറത്തിറങ്ങണമെന്നായിരുന്നു നൈനാർ നാഗേന്ദ്രന്റെ വിവാദ പ്രസ്താവന. ഇതിനെതിരെ തൃഷ ശക്തമായ ഭാഷയിൽ പ്രതികരിച്ചിരുന്നു. രാഷ്ട്രീയത്തിലെ ഉന്നത സ്ഥാനത്തിരിക്കുന്ന ഒരാളിൽ നിന്ന് ഇത്രയും തരംതാഴ്ന്ന പരാമർശം പ്രതീക്ഷിച്ചില്ലെന്നും തന്നെ അനാവശ്യമായി രാഷ്ട്രീയ വിവാദങ്ങളിലേക്ക് വലിച്ചിഴയ്ക്കരുതെന്നും തൃഷയുടെ അഭിഭാഷകൻ പുറത്തിറക്കിയ കുറിപ്പിൽ വ്യക്തമാക്കി.
ബിജെപി മഹിളാ മോർച്ച ദേശീയ അധ്യക്ഷ വാനതി ശ്രീനിവാസൻ, അണ്ണാമലൈ എന്നിവർ ഇടപെട്ടതിനെത്തുടർന്നാണ് നൈനാർ നാഗേന്ദ്രൻ നിലപാട് മാറ്റിയത്. ഡിഎംകെയും കോൺഗ്രസും പ്രസ്താവനയ്ക്കെതിരെ രംഗത്തെത്തിയിരുന്നു. ബിജെപി നേതാക്കളുടെ സ്ത്രീവിരുദ്ധതയാണ് ഇത്തരം പരാമർശങ്ങളിലൂടെ പുറത്തുവരുന്നതെന്ന് ഡിഎംകെ കുറ്റപ്പെടുത്തി. സേലത്തെ റാലിയിൽ വിജയ് നടത്തിയ പ്രസംഗത്തിന് പിന്നാലെയായിരുന്നു നൈനാർ നാഗേന്ദ്രന്റെ ഈ വ്യക്തിപരമായ അധിക്ഷേപം. ആദ്യ ഘട്ടത്തിൽ തന്റെ വാക്കുകളിൽ ഉറച്ചുനിന്ന അദ്ദേഹം, പ്രതിഷേധം കനത്തതോടെയാണ് ഒടുവിൽ ക്ഷമാപണം നടത്തിയത്.
The post ‘അബദ്ധം പറ്റി, ക്ഷമിക്കണം’; തൃഷയ്ക്കും വിജയ്ക്കും എതിരായ അധിക്ഷേപത്തിൽ ഖേദം പ്രകടിപ്പിച്ച് ബിജെപി നേതാവ് appeared first on Express Kerala.