കോൺഗ്രസ് വിട്ടതിന് പിന്നാലെ രാഹുൽ ഗാന്ധിക്കെതിരെ രൂക്ഷവിമർശനവുമായി മുൻ എം.എൽ.എ നവ്ജോത് കൗർ സിദ്ധു രംഗത്തെത്തി. രാഹുൽ ഗാന്ധി യാഥാർത്ഥ്യങ്ങളിൽ നിന്ന് അകന്ന് ഒരു സ്വപ്നലോകത്താണ് ജീവിക്കുന്നതെന്നും അദ്ദേഹത്തിന്റെ വാക്കും പ്രവൃത്തിയും തമ്മിൽ വലിയ വ്യത്യാസമുണ്ടെന്നും അവർ ആരോപിച്ചു. കോയമ്പത്തൂരിൽ മാധ്യമങ്ങളോട് സംസാരിക്കവെയാണ് കോൺഗ്രസിന്റെ പഞ്ചാബ് യൂണിറ്റിൽ വൻ അഴിമതി നടക്കുന്നുണ്ടെന്നും അടുത്ത തിരഞ്ഞെടുപ്പിൽ പാർട്ടി കനത്ത പരാജയം ഏറ്റുവാങ്ങുമെന്നും അവർ പ്രവചിച്ചത്. പ്രധാനമന്ത്രി നരേന്ദ്ര മോദിയുടെ വ്യക്തിശുദ്ധിയെ പ്രശംസിച്ച അവർ, രാഹുൽ ഗാന്ധിക്ക് സ്വന്തം പാർട്ടിക്കുള്ളിലെ കാര്യങ്ങളിൽ പോലും നിയന്ത്രണമില്ലെന്ന് കുറ്റപ്പെടുത്തി.
പഞ്ചാബ് കോൺഗ്രസിലെ പ്രശ്നങ്ങൾ രാഹുൽ ഗാന്ധിയെ നേരിട്ടറിയിക്കാൻ എട്ടു മാസത്തോളം അദ്ദേഹത്തിന്റെ അപ്പോയിന്റ്മെന്റിനായി ശ്രമിച്ചെങ്കിലും പരാജയപ്പെട്ടതായി നവ്ജോത് കൗർ സിദ്ധു വെളിപ്പെടുത്തി. പാർട്ടി ടിക്കറ്റുകൾ മുൻകൂട്ടി വിൽക്കുകയാണെന്നും സ്വന്തം പാർട്ടിക്കുള്ളിൽ എന്ത് നടക്കുന്നു എന്ന് അറിയാത്ത ഒരാൾ നേതൃസ്ഥാനത്തിരിക്കാൻ യോഗ്യനല്ലെന്നും അവർ തുറന്നടിച്ചു. തനിക്കും ഭർത്താവിനും വലിയ വാഗ്ദാനങ്ങൾ നൽകി വഞ്ചിച്ചുവെന്നും സത്യസന്ധരായ ആളുകളെ കേൾക്കാൻ രാഹുൽ ഗാന്ധിക്ക് സമയമില്ലെന്നും അവർ പറഞ്ഞു. അഴിമതിക്കാരെയാണ് രാഹുൽ ഗാന്ധിക്ക് ചുറ്റും കാണാൻ സാധിക്കുന്നതെന്നും അവർ പരിഹസിച്ചു.
Also Read: കുറഞ്ഞ സമയം, കൂടുതൽ വേഗത; മീററ്റ് മെട്രോ ഉദ്ഘാടനത്തിനൊരുങ്ങുന്നു
നേരത്തെ ബി.ജെ.പിയിൽ ആയിരുന്ന നവ്ജോത് കൗർ സിദ്ധു 2016-ലാണ് കോൺഗ്രസിലെത്തിയത്. പഞ്ചാബ് കോൺഗ്രസ് അധ്യക്ഷൻ അമരീന്ദർ സിംഗ് രാജ വാറിംഗിനെതിരെ 500 കോടി രൂപയുടെ അഴിമതി ആരോപണം ഉന്നയിച്ചതിനെത്തുടർന്ന് അവരെ പാർട്ടിയിൽ നിന്ന് സസ്പെൻഡ് ചെയ്തിരുന്നു. ഇതിന് പിന്നാലെ അവർ പാർട്ടി വിടുന്നതായി പ്രഖ്യാപിക്കുകയും തുടർന്ന് പാർട്ടിയിൽ നിന്ന് പുറത്താക്കിയതായി ഹൈക്കമാൻഡ് അറിയിക്കുകയുമായിരുന്നു. പഞ്ചാബ് രാഷ്ട്രീയത്തിൽ വലിയ ചർച്ചകൾക്കാണ് നവ്ജോത് കൗർ സിദ്ധുവിന്റെ ഈ പുതിയ നീക്കങ്ങൾ വഴിയൊരുക്കിയിരിക്കുന്നത്.
The post നിങ്ങൾ ആ കസേരയ്ക്ക് അർഹനല്ല, രാഹുലിന്റേത് വെറുംവാക്ക്; രൂക്ഷവിമർശനവുമായി നവ്ജോത് കൗർ സിദ്ധു appeared first on Express Kerala.