സംസ്ഥാനത്തെ ബാറുകളുടെ പ്രവർത്തന സമയം വർദ്ധിപ്പിക്കാൻ സർക്കാർ തത്വത്തിൽ തീരുമാനമെടുത്തു. നിലവിൽ രാവിലെ 11 മണി മുതൽ രാത്രി 11 മണി വരെയാണ് ബാറുകൾക്ക് പ്രവർത്തനാനുമതിയുള്ളത്. ഇത് മാറ്റി രാവിലെ 10 മണി മുതൽ അർദ്ധരാത്രി 12 മണി വരെയാക്കാനാണ് എക്സൈസ് വകുപ്പ് ശുപാർശ ചെയ്തിരിക്കുന്നത്. ഇതുസംബന്ധിച്ച ഔദ്യോഗിക ഉത്തരവ് ഉടൻ പുറത്തിറങ്ങുമെന്നാണ് റിപ്പോർട്ടുകൾ സൂചിപ്പിക്കുന്നത്.
ബാറുടമകൾ ദീർഘകാലമായി ഉന്നയിക്കുന്ന ആവശ്യമാണ് സർക്കാർ ഇപ്പോൾ പരിഗണിച്ചിരിക്കുന്നത്. എക്സൈസ് മന്ത്രിയുടെ നേതൃത്വത്തിൽ നടന്ന വിവിധതല ചർച്ചകൾക്കൊടുവിലാണ് സമയമാറ്റത്തിന് അനുകൂലമായ നിലപാടിൽ സർക്കാർ എത്തിയത്. പുതിയ തീരുമാനപ്രകാരം ബാറുകൾക്ക് ദിവസേന രണ്ട് മണിക്കൂർ അധികമായി തുറന്നു പ്രവർത്തിക്കാൻ സാധിക്കും. ഇത് മദ്യവിൽപ്പനയിലൂടെയുള്ള വരുമാന വർദ്ധനവിനും വഴിയൊരുക്കും.
Also Read: ആൻ്റണി രാജുവിന് തിരിച്ചടി! ശിക്ഷ റദ്ദാക്കണമെന്ന ആവശ്യം തള്ളി
വിനോദസഞ്ചാര മേഖലയുടെ പുരോഗതി കൂടി ലക്ഷ്യം വെച്ചാണ് ബാറുകളുടെ സമയം നീട്ടാൻ സർക്കാർ ആലോചിക്കുന്നത്. ടൂറിസ്റ്റ് കേന്ദ്രങ്ങളിൽ പ്രവർത്തന സമയത്തിൽ ഇനിയും ഇളവുകൾ നൽകാൻ സാധ്യതയുണ്ട്. വിജ്ഞാപനം പുറത്തിറങ്ങുന്നതോടെ ഇക്കാര്യത്തിൽ കൂടുതൽ വ്യക്തത വരും. ടൂറിസം മേഖലയ്ക്ക് മുൻഗണന നൽകിക്കൊണ്ട് സാമ്പത്തിക വളർച്ച ഉറപ്പാക്കുക എന്നതാണ് സർക്കാരിന്റെ പ്രധാന വാദം.
The post ബാറുകൾ ഇനി അർദ്ധരാത്രി വരെ; സമയം നീട്ടുന്നു appeared first on Express Kerala.