തിരുവനന്തപുരം: തലസ്ഥാനത്ത് നടക്കാനിരിക്കുന്ന ആറ്റുകാൽ പൊങ്കാലയോടനുബന്ധിച്ച് തീർത്ഥാടകരുടെ തിരക്ക് നിയന്ത്രിക്കുന്നതിനായി ദക്ഷിണ റെയിൽവേ തിരുവനന്തപുരം ഡിവിഷൻ വിപുലമായ ക്രമീകരണങ്ങൾ ഏർപ്പെടുത്തി. പ്രത്യേക ട്രെയിൻ സർവീസുകൾ, സ്റ്റേഷനുകളിലെ പ്ലാറ്റ്ഫോം നിയന്ത്രണങ്ങൾ, ടിക്കറ്റ് കൗണ്ടറുകളുടെ വർദ്ധനവ് എന്നിവ ഇതിൽ ഉൾപ്പെടുന്നു.
പൊങ്കാല ദിനമായ 2026 മാർച്ച് 3-ന് തിരുവനന്തപുരം സെൻട്രൽ സ്റ്റേഷനിൽ പ്ലാറ്റ്ഫോം ക്രമീകരണങ്ങൾ ഏർപ്പെടുത്തിയിട്ടുണ്ട്. കൊല്ലം ഭാഗത്തേക്കുള്ള ട്രെയിനുകൾ ഒന്ന് മുതൽ നാല് വരെയുള്ള പ്ലാറ്റ്ഫോമുകളിൽ നിന്നായിരിക്കും പുറപ്പെടുക. നാഗർകോവിൽ ഭാഗത്തേക്കുള്ള സർവീസുകൾ അഞ്ചാം നമ്പർ പ്ലാറ്റ്ഫോമിൽ നിന്നുമായിരിക്കും. തിരക്ക് ഒഴിവാക്കാൻ യാത്രക്കാർ ഈ ക്രമീകരണം ശ്രദ്ധിക്കണമെന്ന് റെയിൽവേ അറിയിച്ചു.
Also Read: വൃതശുദ്ധിയുടെ പുണ്യമാസം; കേരളത്തിൽ റമദാൻ ഒന്ന് ഫെബ്രുവരി 19-ന്
യാത്രക്കാരുടെ സൗകര്യാർത്ഥം എറണാകുളം ജംഗ്ഷൻ – തിരുവനന്തപുരം സെൻട്രൽ, തിരുവനന്തപുരം സെൻട്രൽ – നാഗർകോവിൽ ജംഗ്ഷൻ റൂട്ടുകളിൽ അധിക ട്രെയിൻ സർവീസുകൾ നടത്തും. ടിക്കറ്റ് ബുക്കിംഗ് വേഗത്തിലാക്കാൻ സ്റ്റേഷനിലെ പ്രവേശന കവാടങ്ങളിലും എക്സിറ്റുകളിലും അധിക കൗണ്ടറുകൾ തുറക്കും. കൂടാതെ, അൺറിസർവ്ഡ് ടിക്കറ്റിംഗ് സിസ്റ്റം (UTS), മൊബൈൽ QR കോഡ് കൗണ്ടറുകൾ എന്നിവയും പ്ലാറ്റ്ഫോമുകളിൽ സജ്ജീകരിക്കും.
സുരക്ഷാ ഉറപ്പാക്കുന്നതിനായി റെയിൽവേ പ്രൊട്ടക്ഷൻ ഫോഴ്സിനൊപ്പം (RPF) ഗവൺമെന്റ് റെയിൽവേ പൊലീസിനെയും (GRP) ലോക്കൽ പൊലീസിനെയും വിന്യസിക്കും. പ്രധാന ഇടങ്ങളിൽ മെഡിക്കൽ സംഘത്തിന്റെയും സുരക്ഷാ ഉദ്യോഗസ്ഥരുടെയും പ്രത്യേക സേവനവും ലഭ്യമാക്കും. തിരക്കേറിയ സമയങ്ങളിൽ യാത്രക്കാരുടെ നീക്കം നിരീക്ഷിക്കാനും നിയന്ത്രിക്കാനും പ്രത്യേക സംവിധാനങ്ങൾ ഉണ്ടാകുമെന്നും ഡിവിഷൻ അറിയിച്ചു.
NB: ഈ വാർത്തയിൽ ഉപയോഗിച്ചിരിക്കുന്ന ചിത്രം പ്രതീകാത്മകമാണ്. (Generated by AI)
The post ആറ്റുകാൽ പൊങ്കാല! റെയിൽവേയുടെ പ്രത്യേക ക്രമീകരണങ്ങൾ; അധിക ട്രെയിൻ സർവീസുകൾ പ്രഖ്യാപിച്ചു appeared first on Express Kerala.