ഇറാന്റെ ആണവ പദ്ധതിയുമായി ബന്ധപ്പെട്ട് അമേരിക്കയും ഇറാനും തമ്മിലുള്ള ചർച്ചകളിൽ പുരോഗതിയുണ്ടായതായി സൂചന. ജനീവയിൽ നടന്ന കൂടിക്കാഴ്ചയിൽ ആണവ കരാറിനായുള്ള ‘മാർഗ്ഗനിർദ്ദേശ തത്വങ്ങളിൽ’ ഇരുപക്ഷവും ധാരണയിലെത്തിയെന്ന് ഇറാൻ വിദേശകാര്യ മന്ത്രി സയ്യിദ് അബ്ബാസ് അരഗ്ചി വ്യക്തമാക്കി. മൂന്നാം റൗണ്ട് ചർച്ചകൾക്ക് മുൻപായി കരാറിന്റെ കരട് തയ്യാറാക്കാനും ഇരുരാജ്യങ്ങളും സമ്മതിച്ചിട്ടുണ്ട്. ഇറാന്റെ സമ്പദ്വ്യവസ്ഥയെ തകർക്കുന്ന ഉപരോധങ്ങൾ നീക്കുന്നതിനും പകരമായി ആണവ പദ്ധതികളിൽ നിയന്ത്രണം ഏർപ്പെടുത്തുന്നതിനുമുള്ള നിർണ്ണായക നീക്കമായാണ് ഈ ചർച്ചകളെ വിലയിരുത്തുന്നത്.
നയതന്ത്ര ചർച്ചകൾ നടക്കുമ്പോഴും പശ്ചിമേഷ്യയിൽ അമേരിക്ക തങ്ങളുടെ സൈനിക സാന്നിധ്യം വൻതോതിൽ വർദ്ധിപ്പിക്കുന്നത് ആശങ്കയുണ്ടാക്കുന്നുണ്ട്. കഴിഞ്ഞ 24 മണിക്കൂറിനുള്ളിൽ എഫ്-35, എഫ്-22, എഫ്-16 എന്നിവയുൾപ്പെടെ അൻപതോളം യുദ്ധവിമാനങ്ങൾ അമേരിക്ക ഈ മേഖലയിലേക്ക് നിയോഗിച്ചതായി ആക്സിയോസ് റിപ്പോർട്ട് ചെയ്തു. ചർച്ചകളിൽ പുരോഗതിയുണ്ടെങ്കിലും ഇനിയും ഏറെ കാര്യങ്ങൾ പരിഹരിക്കാനുണ്ടെന്നാണ് അമേരിക്കൻ ഉദ്യോഗസ്ഥരുടെ നിലപാട്, ഒരു സൈനിക ഏറ്റുമുട്ടലിനുള്ള സാധ്യത ഇനിയും പൂർണ്ണമായും ഒഴിവായിട്ടില്ലെന്ന സൂചനയാണ് നൽകുന്നത്.
പശ്ചിമേഷ്യയിലെ തന്ത്രപ്രധാന കേന്ദ്രങ്ങളിൽ അമേരിക്കൻ നാവിക-വ്യോമ ആസ്തികൾ വിന്യസിച്ചുകഴിഞ്ഞു. വിമാനവാഹിനിക്കപ്പലായ യുഎസ്എസ് എബ്രഹാം ലിങ്കൺ അറേബ്യൻ കടലിലും, ഗൈഡഡ് മിസൈൽ ഡിസ്ട്രോയർ യുഎസ്എസ് ഡെൽബർട്ട് ഡി ബ്ലാക്ക് ചെങ്കടലിലും നിലയുറപ്പിച്ചിട്ടുണ്ട്. കൂടാതെ ജോർദാനിലെ വ്യോമതാവളത്തിൽ എഫ്-15 യുദ്ധവിമാനങ്ങളും റീപ്പർ ഡ്രോണുകളും വിന്യസിച്ചിട്ടുണ്ടെന്ന് ബിബിസി റിപ്പോർട്ട് ചെയ്യുന്നു. എംക്യു-4സി ട്രൈറ്റൺ നിരീക്ഷണ ഡ്രോണുകൾ ഗൾഫ് മേഖലയിൽ നിരന്തര നിരീക്ഷണം നടത്തുന്നുണ്ട്.
അമേരിക്കൻ സമ്മർദ്ദത്തോട് സൈനികാഭ്യാസങ്ങളിലൂടെയാണ് ഇറാൻ പ്രതികരിക്കുന്നത്. ഹോർമുസ് കടലിടുക്കിന്റെ ഒരു ഭാഗം സൈനികാഭ്യാസത്തിന്റെ ഭാഗമായി ഇറാൻ അടച്ചിട്ടു. ലോകത്തെ എണ്ണ വിതരണത്തിന്റെ പ്രധാന പാതയായ ഹോർമുസ് കടലിടുക്ക് തടസ്സപ്പെടുത്തുമെന്ന് മുൻപും ഇറാൻ ഭീഷണി മുഴക്കിയിട്ടുണ്ട്. വരാനിരിക്കുന്ന രണ്ടാഴ്ച ചർച്ചകളിൽ നിർണ്ണായകമാണെന്നും അടുത്ത ഘട്ടം കൂടുതൽ സങ്കീർണ്ണമായിരിക്കുമെന്നും ഇറാൻ വിദേശകാര്യ മന്ത്രി മുന്നറിയിപ്പ് നൽകി. ഉപരോധങ്ങൾ നീക്കി സമ്പദ്വ്യവസ്ഥയെ രക്ഷിക്കുക എന്ന ലക്ഷ്യത്തോടെയാണ് ടെഹ്റാൻ ഇപ്പോൾ ചർച്ചകളെ സമീപിക്കുന്നത്.
The post ഇറാൻ അതിർത്തിയിൽ അമേരിക്കയുടെ യുദ്ധസന്നാഹം! 50 അത്യാധുനിക ജെറ്റുകൾ വിന്യസിച്ചു; വീണ്ടുമൊരു യുദ്ധത്തിലേക്ക് ലോകം? appeared first on Express Kerala.
