കാനഡയെന്ന ‘വാഗ്ദത്ത ഭൂമി’ ലക്ഷ്യമാക്കി പറന്ന ആയിരക്കണക്കിന് ഇന്ത്യക്കാർക്ക് ഇപ്പോൾ മടക്കയാത്രയുടെ കാലമാണ്. 2025-ന്റെ ആദ്യ പത്ത് മാസത്തിനുള്ളിൽ 2,831 ഇന്ത്യൻ പൗരന്മാരെയാണ് കാനഡ നിശബ്ദമായി പുറത്താക്കിയത്. ഇത് കേവലം തുടക്കം മാത്രമാണെന്നും 6,500-ലധികം ഇന്ത്യക്കാർക്കെതിരെയുള്ള നടപടികൾ പുരോഗമിക്കുകയാണെന്നുമാണ് ഔദ്യോഗിക കണക്കുകൾ സൂചിപ്പിക്കുന്നത്.
കാനഡയിലെ കുടിയേറ്റ നിയമങ്ങൾ ലംഘിക്കുന്നവർക്കെതിരെ ഒട്ടാവ ഭരണകൂടം സ്വീകരിക്കുന്ന കർശന നിലപാടാണ് ഈ കൂട്ടപുറത്താക്കലിലേക്ക് നയിച്ചത്. പ്രധാനമായും മൂന്ന് കാരണങ്ങളാണ് ഇതിന് പിന്നിലുള്ളത്. ഏറ്റവും കൂടുതൽ ആളുകൾ പുറത്താക്കപ്പെട്ടത് അഭയാർത്ഥി അപേക്ഷകളിലെ നിയമലംഘനങ്ങൾ മൂലമാണ്. ക്രിമിനൽ കേസുകളിൽ ഉൾപ്പെട്ട വിദേശ പൗരന്മാരെ അടിയന്തരമായി പുറത്താക്കാൻ കനേഡിയൻ അതോറിറ്റികൾ തീരുമാനിച്ചു. ഇതിൽ മെയിൽ മോഷണം മുതൽ വലിയ കുറ്റകൃത്യങ്ങൾ വരെ ഉൾപ്പെടുന്നു. പഠന വിസയുടെയോ വർക്ക് പെർമിറ്റിന്റെയോ കാലാവധി കഴിഞ്ഞിട്ടും രാജ്യത്ത് തുടരുന്നവർക്കെതിരെയും നടപടി ശക്തമാക്കി തുടങ്ങിയ കരണങ്ങളാണ്.
കാനഡ മൂന്ന് രീതിയിലാണ് വിദേശികളെ പുറത്താക്കുന്നത്. ഓരോന്നും ഒരാൾക്ക് രാജ്യത്തേക്ക് തിരികെ വരാനുള്ള സാധ്യതയെ വ്യത്യസ്തമായി ബാധിക്കുന്നു.
ഡിപ്പാർച്ചർ ഓർഡർ (Departure Order): ഇത് താരതമ്യേന ലളിതമാണ്. 30 ദിവസത്തിനുള്ളിൽ രാജ്യം വിടണം.
എക്സ്ക്ലൂഷൻ ഓർഡർ (Exclusion Order): ഒരു വർഷത്തേക്ക് (രേഖകളിൽ കൃത്രിമം കാണിച്ചവർക്ക് 5 വർഷത്തേക്ക്) രാജ്യത്ത് പ്രവേശിക്കുന്നതിന് വിലക്ക്.
ഡീപോർട്ടേഷൻ ഓർഡർ (Deportation Order): ഇത് ഏറ്റവും കഠിനമാണ്. ആജീവനാന്ത വിലക്കാണ് ഇതിലൂടെ ലഭിക്കുന്നത്. പ്രത്യേക അനുമതിയില്ലാതെ ഇവർക്ക് കാനഡയിലേക്ക് തിരികെ വരാനാകില്ല.
കാനഡയിലെ പുതിയ കുടിയേറ്റ നയം ഏറ്റവും കൂടുതൽ ബാധിച്ചിരിക്കുന്നത് ഇന്ത്യൻ വിദ്യാർത്ഥികളെയാണ്. ലക്ഷക്കണക്കിന് രൂപ കടമെടുത്തും മറ്റും കാനഡയിലെത്തിയ പലർക്കും വിസ പുതുക്കാൻ കഴിയാത്ത സാഹചര്യമാണ്. 2025-ൽ മാത്രം യുക്രെയ്ൻ, ഗാസ തുടങ്ങിയ മേഖലകളിൽ നിന്നുള്ളവർക്ക് ഇളവുകൾ നൽകുമ്പോഴും ഇന്ത്യക്കാരായ വിദ്യാർത്ഥികൾക്ക് നിയമങ്ങൾ കൂടുതൽ കർക്കശമാകുന്നു. ഇത് വിദ്യാർത്ഥികൾക്കിടയിൽ വലിയ മാനസിക സമ്മർദ്ദത്തിനും പ്രതിഷേധങ്ങൾക്കും കാരണമായിട്ടുണ്ട്.
കാനഡയിലെ ഈ പുതിയ നയങ്ങൾ വ്യക്തമാക്കുന്നത് ഒന്നാണ്. ഇനിമുതൽ കുടിയേറ്റം അത്ര എളുപ്പമാകില്ല. രേഖകളിലെ കൃത്യതയും നിയമങ്ങളോടുള്ള ബഹുമാനവും പണ്ടത്തെക്കാൾ അനിവാര്യമായിരിക്കുന്നു. വരും മാസങ്ങളിൽ കൂടുതൽ ഇന്ത്യക്കാർ പുറത്താക്കപ്പെടാൻ സാധ്യതയുള്ളതിനാൽ, നിലവിൽ കാനഡയിലുള്ളവരും അങ്ങോട്ട് പോകാൻ ആഗ്രഹിക്കുന്നവരും നിയമവശങ്ങൾ കൃത്യമായി മനസ്സിലാക്കേണ്ടതുണ്ട്.
NB: ഈ വാർത്തയിൽ ഉപയോഗിച്ചിരിക്കുന്ന ചിത്രം പ്രതീകാത്മകമാണ്. (Generated by AI)
The post കാനഡയിൽ ‘ഓപ്പറേഷൻ ക്ലീൻ അപ്പ്’; പുറത്താക്കപ്പെടുന്ന ഇന്ത്യക്കാരും തകിടം മറിയുന്ന പ്രവാസി സ്വപ്നങ്ങളും! appeared first on Express Kerala.