തിരുവനന്തപുരം: നിയമസഭാ തിരഞ്ഞെടുപ്പിൽ നിന്ന് വിട്ടുനിൽക്കാനുള്ള മുതിർന്ന കോൺഗ്രസ് നേതാവ് കെ. ബാബുവിന്റെ തീരുമാനത്തെ പ്രശംസിച്ചുകൊണ്ട് മുതിർന്ന നേതാക്കൾക്കെതിരെ രൂക്ഷമായ പരിഹാസവുമായി രാഹുൽ മാങ്കൂട്ടത്തിൽ. പാർട്ടിയുടെ മുഖമായ പ്രധാന നേതാക്കൾ ഒഴികെ മറ്റു പലർക്കും ഇത്തവണ മാറിനിൽക്കണമെന്ന് ചിന്തിക്കാൻ ബാബുവിന്റെ പിന്മാറ്റം ആവേശം നൽകട്ടെയെന്ന് രാഹുൽ പറഞ്ഞു. ലൈംഗിക പീഡന ആരോപണങ്ങളെ തുടർന്ന് കോൺഗ്രസിൽ നിന്ന് പുറത്താക്കപ്പെട്ട പാലക്കാട് എംഎൽഎ തന്റെ ഫെയ്സ്ബുക്ക് പോസ്റ്റിലൂടെയാണ് ഈ ഒളിയമ്പുകൾ എയ്തത്.
2016-ൽ പരാജയപ്പെട്ടത് മുതൽ വേട്ടയാടപ്പെട്ട ഒരു മനുഷ്യന്റെ മാനസികാവസ്ഥ തനിക്ക് വ്യക്തമായി അറിയാമെന്ന് രാഹുൽ കുറിച്ചു. ‘കള്ളൻ ബാബു’ എന്നും ‘കോഴ ബാബു’ എന്നുമൊക്കെ വിളിച്ച് ആക്ഷേപിച്ച സി.പി.എം, പത്ത് വർഷം ഭരണത്തിലിരുന്നിട്ടും ഒരൊറ്റ ആരോപണം പോലും തെളിയിക്കാൻ കഴിഞ്ഞില്ലെന്ന് അദ്ദേഹം ചൂണ്ടിക്കാട്ടി. 2021-ൽ ഇടത് തരംഗത്തിനിടയിലും സി.പി.എമ്മിന്റെ കരുത്തനായ സ്ഥാനാർത്ഥിയെ തൃപ്പൂണിത്തുറയിൽ പരാജയപ്പെടുത്തിയത് ബാബുവിന്റെ വ്യക്തിപരമായ വിജയമായിരുന്നുവെന്നും അദ്ദേഹം ഓർമ്മിപ്പിച്ചു.
Also Read:അമിത് ഷായ്ക്കെതിരായ പരാമർശം! രാഹുൽ ഗാന്ധി ഇന്ന് സുൽത്താൻപൂർ കോടതിയിൽ ഹാജരാകും
തനിക്ക് വീണ്ടും മത്സരിക്കാനും ജയിക്കാനും ഉറപ്പുള്ള സാഹചര്യത്തിലും പാർലമെന്ററി രംഗത്ത് നിന്ന് മാറിനിൽക്കാനുള്ള ബാബുവിന്റെ തീരുമാനം അങ്ങേയറ്റം മാതൃകാപരമാണെന്ന് രാഹുൽ വിശേഷിപ്പിച്ചു. ജനം പലതവണ തോൽപ്പിച്ചാൽ പോലും താൻ മത്സരിച്ചില്ലെങ്കിൽ നാട് മുന്നോട്ട് പോകില്ലെന്ന് തെറ്റിദ്ധരിക്കുന്നവർക്കും, മരിക്കുന്നത് ബോർഡ് വെച്ച കാറിൽ തന്നെയാകണമെന്ന് നിർബന്ധമുള്ളവർക്കും ഇത് വലിയൊരു പാഠമാണെന്ന് അദ്ദേഹം പരിഹസിച്ചു. പുതുതലമുറയ്ക്ക് അവസരം നൽകാനായി ഏറ്റവും അനിവാര്യരായ നേതാക്കൾ ഒഴികെ മറ്റുള്ളവർ മാറിനിൽക്കണമെന്ന തന്റെ നിലപാട് വ്യക്തമാക്കിയാണ് രാഹുൽ കുറിപ്പ് അവസാനിപ്പിച്ചത്.
The post തോറ്റാലും മാറിനിൽക്കാത്തവർക്ക് കെ. ബാബു മാതൃക; കോൺഗ്രസിലെ പ്രമുഖർക്ക് നേരെ രാഹുൽ മാങ്കൂട്ടത്തിലിന്റെ ഒളിയമ്പ് appeared first on Express Kerala.