ടാറ്റ പാസഞ്ചർ ഇലക്ട്രിക് മൊബിലിറ്റി ലിമിറ്റഡ് പുതുക്കിയ ഫീച്ചറുകളുമായി പഞ്ച് ഇവി ഫെയ്സ്ലിഫ്റ്റ് ഇന്ത്യൻ വിപണിയിൽ അവതരിപ്പിച്ചു. 9.69 ലക്ഷം രൂപ മുതൽ എക്സ് ഷോറൂം വില ആരംഭിക്കുന്ന വാഹനത്തിന്, ‘ബാറ്ററി-ആസ്-എ-സർവീസ്’ പ്ലാനിലൂടെ 6.49 ലക്ഷം രൂപയ്ക്ക് സ്വന്തമാക്കാൻ സാധിക്കും. ഈ സ്കീമിൽ ബാറ്ററി ഉപയോഗത്തിന് കിലോമീറ്ററിന് 2.6 രൂപ എന്ന നിരക്കിലാകും ഈടാക്കുക. ടാറ്റയുടെ മറ്റ് ഇലക്ട്രിക് വാഹനങ്ങളായ നെക്സോൺ ഇവി, ഹാരിയർ ഇവി എന്നിവയോട് സാമ്യമുള്ള ഡിസൈൻ ശൈലിയാണ് പുതിയ പഞ്ച് ഇവി ഫെയ്സ്ലിഫ്റ്റിനും നൽകിയിരിക്കുന്നത്.
പുറംമോഡിയിൽ വലിയ മാറ്റങ്ങളാണ് വരുത്തിയിരിക്കുന്നത്. മുൻഭാഗത്തെ കറുത്ത സ്ട്രിപ്പ് ഒഴിവാക്കി ബോഡി കളർ പാനലുകൾ നൽകി കൂടുതൽ വൃത്തിയുള്ള ലുക്ക് കൈവരിച്ചു. പുതിയ ഡിസൈനിലുള്ള കണക്റ്റഡ് ഡിആർഎല്ലുകൾ, പരിഷ്കരിച്ച ഹെഡ്ലാമ്പ്, ബമ്പർ എന്നിവ കാറിനെ കൂടുതൽ പ്രീമിയമാക്കുന്നു. വശങ്ങളിൽ 16 ഇഞ്ച് അലോയ് വീലുകൾ തുടരുമ്പോൾ, പിൻഭാഗത്ത് ടെയിൽലാമ്പുകളെ ബന്ധിപ്പിക്കുന്ന ലൈറ്റ് ബാർ പുതുതായി ചേർത്തിട്ടുണ്ട്. ഫിയർലെസ് യെല്ലോ ഉൾപ്പെടെ ആകെ ഏഴ് ആകർഷകമായ നിറങ്ങളിൽ വാഹനം ലഭ്യമാണ്. കൂടാതെ 195 എംഎം ഗ്രൗണ്ട് ക്ലിയറൻസും 450 എംഎം വാട്ടർ വേഡിംഗ് ശേഷിയും ഈ മൈക്രോ എസ്യുവിയുടെ കരുത്ത് വർദ്ധിപ്പിക്കുന്നു.
Also Read: കാറിലെ എസിയാണോ വീട്ടിലെ എസിയാണോ ലാഭം? പോക്കറ്റ് കാലിയാക്കുന്ന കണക്കുകൾ ഇങ്ങനെ!
ഇന്റീരിയറിൽ 10 ഇഞ്ച് ഇൻഫോടെയ്ൻമെന്റ് സ്ക്രീൻ, ഡിജിറ്റൽ ഇൻസ്ട്രുമെന്റ് ക്ലസ്റ്റർ, പ്രകാശിക്കുന്ന ലോഗോയോടു കൂടിയ ടൂ-സ്പോക്ക് സ്റ്റിയറിംഗ് വീൽ എന്നിവയാണ് പ്രധാന ആകർഷണങ്ങൾ. വെന്റിലേറ്റഡ് സീറ്റുകൾ, ആപ്പിൾ കാർപ്ലേ, ആൻഡ്രോയിഡ് ഓട്ടോ, കണക്റ്റഡ് കാർ ടെക്നോളജി, 360 ഡിഗ്രി ക്യാമറ തുടങ്ങിയ ആധുനിക സവിശേഷതകൾ വാഹനത്തിലുണ്ട്. സുരക്ഷയ്ക്കായി ആറ് എയർബാഗുകൾ, ഇലക്ട്രോണിക് സ്റ്റെബിലിറ്റി പ്രോഗ്രാം, ഹിൽ ഹോൾഡ് അസിസ്റ്റ്, ഐസോഫിക്സ് മൗണ്ടുകൾ എന്നിവ സ്റ്റാൻഡേർഡ് ഫീച്ചറുകളായി ഉൾപ്പെടുത്തിയിരിക്കുന്നു.
രണ്ട് ബാറ്ററി ഓപ്ഷനുകളിലാണ് 2026 പഞ്ച് ഇവി എത്തുന്നത്. 30 kWh ബാറ്ററി പായ്ക്കിന് പുറമെ പുതുതായി അവതരിപ്പിച്ച 40 kWh ബാറ്ററി പായ്ക്ക് ഒറ്റ ചാർജിൽ 468 കിലോമീറ്റർ റേഞ്ച് വാഗ്ദാനം ചെയ്യുന്നു. 3.3 kW, 7.2 kW ചാർജറുകൾക്ക് പുറമെ 65 kW DC ഫാസ്റ്റ് ചാർജിംഗ് സൗകര്യവും ലഭ്യമാണ്. ഫാസ്റ്റ് ചാർജർ ഉപയോഗിക്കുമ്പോൾ വെറും 26 മിനിറ്റിനുള്ളിൽ ബാറ്ററിയുടെ 20 മുതൽ 80 ശതമാനം വരെ ചാർജ് ചെയ്യാൻ സാധിക്കും.
The post ബാറ്ററി വാടകയ്ക്ക് എടുക്കാം; വെറും 6.49 ലക്ഷം രൂപയ്ക്ക് പഞ്ച് ഇവി സ്വന്തമാക്കാൻ സുവർണ്ണാവസരം appeared first on Express Kerala.