സംസ്ഥാനത്ത് തീവ്ര വോട്ടർ പട്ടിക പരിഷ്കരണത്തിന് ശേഷമുള്ള അന്തിമ പട്ടിക നാളെ പ്രസിദ്ധീകരിക്കും. പുതുക്കിയ കണക്കുകൾ പ്രകാരം 2.69 കോടി വോട്ടർമാരാണ് പട്ടികയിലുള്ളത്. നേരത്തെയുള്ള പട്ടികയുമായി താരതമ്യം ചെയ്യുമ്പോൾ ഒൻപത് ലക്ഷത്തോളം പേരുടെ കുറവാണ് ഇത്തവണ ഉണ്ടായിരിക്കുന്നത്. ഡിസംബർ 23-ന് പ്രസിദ്ധീകരിച്ച കരട് പട്ടികയിൽ ഉൾപ്പെട്ടിരുന്നവരിൽ നിന്ന് മരണപ്പെട്ടവർ, വിദേശ പൗരത്വം നേടിയവർ, താമസം മാറിയവർ എന്നിങ്ങനെ 53,229 പേരെ ഹിയറിംഗ് കാലയളവിൽ ഒഴിവാക്കി. അതേസമയം, പേര് ചേർക്കാനായി ലഭിച്ച അപേക്ഷകളിൽ 13.51 ലക്ഷം എണ്ണം അംഗീകരിക്കുകയും ചെയ്തു.
പട്ടികയിൽ 2.23 ലക്ഷം പ്രവാസി വോട്ടർമാരാണുള്ളത്. അന്തിമ പട്ടികയുമായി ബന്ധപ്പെട്ട് പരാതിയുള്ളവർക്ക് അപ്പീൽ നൽകാൻ അവസരമുണ്ടെന്ന് രാഷ്ട്രീയ പാർട്ടികളുടെ യോഗത്തിൽ മുഖ്യ തെരഞ്ഞെടുപ്പ് ഓഫീസർ ഡോ. രത്തൻ കേൽക്കർ വ്യക്തമാക്കി. എന്നാൽ പുതിയ പട്ടികയെ ചൊല്ലി രാഷ്ട്രീയ പാർട്ടികൾക്കിടയിൽ ഭിന്നാഭിപ്രായങ്ങൾ നിലനിൽക്കുന്നുണ്ട്. തദ്ദേശ തെരഞ്ഞെടുപ്പിലെ പട്ടികയെ അപേക്ഷിച്ച് 30 ലക്ഷത്തോളം പേർ പുറത്തായെന്നും അനർഹർ പട്ടികയിൽ കടന്നുകൂടിയിട്ടുണ്ടെന്നും സി.പി.എം വാദിക്കുന്നു. അപേക്ഷ നിരസിക്കപ്പെട്ട പ്രവാസി വോട്ടർമാരുടെ വിവരങ്ങൾ വേണമെന്ന് കോൺഗ്രസ് ആവശ്യപ്പെട്ടപ്പോൾ, ആദ്യം ആരോപണങ്ങൾ ഉന്നയിച്ചവർ ഇപ്പോൾ നിലപാട് മാറ്റിയെന്നായിരുന്നു ബി.ജെ.പിയുടെ പ്രതികരണം.
The post അന്തിമ വോട്ടർ പട്ടിക നാളെ; കേരളത്തിൽ 2.69 കോടി വോട്ടർമാർ! ഒൻപത് ലക്ഷം പേർ പുറത്ത് appeared first on Express Kerala.