ടി20 ലോകകപ്പ് സൂപ്പർ എട്ടിലെ നിർണായക പോരാട്ടത്തിൽ ദക്ഷിണാഫ്രിക്കയെ നേരിടാനൊരുങ്ങുന്ന ഇന്ത്യൻ ടീമിൽ വൻ മാറ്റങ്ങൾ നിർദേശിച്ച് മുൻ താരം ദീപ് ദാസ് ഗുപ്ത. മലയാളി താരം സഞ്ജു സാംസണെ ഇലവനിൽ ഉൾപ്പെടുത്താതെയും, മികച്ച ഫോമിലുള്ള അക്സർ പട്ടേലിനെ ഒഴിവാക്കിയും തയ്യാറാക്കിയ സാധ്യതാ പട്ടിക ആരാധകർക്കിടയിൽ വലിയ ചർച്ചയായിരിക്കുകയാണ്. തുടർച്ചയായ മൂന്ന് മത്സരങ്ങളിൽ പൂജ്യത്തിന് പുറത്തായിട്ടും യുവതാരം അഭിഷേക് ശർമ്മയെ ടീമിൽ നിലനിർത്തണമെന്ന നിലപാടിലാണ് അദ്ദേഹം. അഭിഷേക് ഉടൻ ഫോമിലേക്ക് തിരിച്ചെത്തുമെന്ന പ്രതീക്ഷയിലാണ് ദീപ് ദാസ് ഈ നീക്കത്തെ പിന്തുണയ്ക്കുന്നത്.
Also Read: സഞ്ജു വേണ്ടേ? ‘അഭിഷേക് എക്സ് ഫാക്ടറാണ്; ടീം സെലക്ഷനിൽ തുറന്നടിച്ച് ആകാശ് ചോപ്ര
ബാറ്റിംഗ് നിരയിൽ റൺവേട്ടക്കാരുടെ പട്ടികയിൽ മുന്നിലുള്ള ഇഷാൻ കിഷൻ (176 റൺസ്), തിലക് വർമ്മ (106 റൺസ്) എന്നിവർ സ്ഥാനം നിലനിർത്തി. ക്യാപ്റ്റൻ സൂര്യകുമാർ യാദവ് നാലാം സ്ഥാനത്ത് ഉറച്ചുനിൽക്കുമ്പോൾ, ഓൾറൗണ്ടർമാരായ ഹാർദിക് പാണ്ഡ്യയും ശിവം ദുബെയും ടീമിന്റെ കരുത്തായി തുടരുന്നു. കഴിഞ്ഞ മത്സരത്തിൽ നെതർലൻഡ്സിനെതിരെ 31 പന്തിൽ 66 റൺസ് അടിച്ചുകൂട്ടിയ ദുബെയുടെ പ്രകടനം ടീമിന് വലിയ ഇംപാക്ട് നൽകുന്നുണ്ടെന്ന് അദ്ദേഹം വിലയിരുത്തുന്നു. റിങ്കു സിംഗിനെ ടീമിൽ നിലനിർത്തണമെന്നും സഞ്ജുവിനെ കൊണ്ടുവരുന്ന കാര്യം സെലക്ടർമാർ പരിഗണിക്കാൻ സാധ്യതയില്ലെന്നും അദ്ദേഹം കൂട്ടിച്ചേർത്തു.
ബൗളിംഗ് നിരയിലാണ് ഏറ്റവും ശ്രദ്ധേയമായ മാറ്റം നിർദേശിക്കപ്പെട്ടിരിക്കുന്നത്. അക്സർ പട്ടേലിന് പകരം വാഷിംഗ്ടൺ സുന്ദറിനെ ടീമിൽ ഉൾപ്പെടുത്തണമെന്നാണ് ദീപ് ദാസ് ഗുപ്തയുടെ പക്ഷം. ദക്ഷിണാഫ്രിക്കൻ നിരയിലെ കരുത്തരായ ഇടങ്കയ്യൻ ബാറ്റർമാരെ പൂട്ടാൻ ഓഫ് സ്പിന്നറായ സുന്ദറിന് സാധിക്കുമെന്നതാണ് ഇതിന് കാരണമായി പറയുന്നത്. ബാറ്റിംഗിലും സുന്ദറിന് സംഭാവനകൾ നൽകാൻ കഴിയുമെന്ന് അദ്ദേഹം വിശ്വസിക്കുന്നു. പേസ് നിരയെ ജസ്പ്രീത് ബുമ്രയും അർഷ്ദീപ് സിംഗും നയിക്കുമ്പോൾ, സ്പിൻ വിഭാഗത്തിൽ വരുൺ ചക്രവർത്തിയുടെ സാന്നിധ്യവും നിർണായകമാകും.
The post സഞ്ജു പുറത്ത്, അക്സറിന് പകരം സുന്ദർ; ദക്ഷിണാഫ്രിക്കയെ നേരിടാൻ ഇന്ത്യയുടെ അപ്രതീക്ഷിത നീക്കങ്ങൾ! appeared first on Express Kerala.