തിരുവനന്തപുരം കേരള ഡിജിറ്റൽ സർവകലാശാലയുടെ അഞ്ചാം വാർഷികാഘോഷങ്ങൾക്ക് തലസ്ഥാനത്ത് തുടക്കമായി. ഈ മാസം 22 വരെ നീണ്ടുനിൽക്കുന്ന ആഘോഷങ്ങളുടെ ഭാഗമായി നിർമിത ബുദ്ധി അടിസ്ഥാനമാക്കിയുള്ള വിപുലമായ പരിപാടികളാണ് സംഘടിപ്പിച്ചിരിക്കുന്നത്. വിവിധ സർവകലാശാലകളിൽ നിന്നും കോളേജുകളിൽ നിന്നുമുള്ള വിദ്യാർത്ഥികൾക്കായി എഐ ഹാക്കത്തോൺ, എഐ പവേർഡ് ക്വിസ്, സ്കൂൾ കുട്ടികൾക്കായുള്ള പ്രത്യേക പരിശീലന ക്ലാസുകൾ, വിദഗ്ധർ പങ്കെടുക്കുന്ന പാനൽ ചർച്ചകൾ എന്നിവ വാർഷികാഘോഷത്തിന്റെ ഭാഗമായി നടക്കും.
ഭാവി സാങ്കേതികവിദ്യകളിൽ അധിഷ്ഠിതമായ കോഴ്സുകൾ വാഗ്ദാനം ചെയ്യുന്ന ഡിജിറ്റൽ സർവകലാശാല, പഠനത്തോടൊപ്പം വരുമാനം നേടാനുള്ള അവസരവും വിദ്യാർത്ഥികൾക്ക് നൽകുന്നുണ്ട്. കേന്ദ്ര-സംസ്ഥാന സർക്കാരുകളുടെ വിവിധ പദ്ധതികളുടെ ഭാഗമാകുന്ന ബിരുദാനന്തര ബിരുദ വിദ്യാർത്ഥികൾക്ക് മാസം 10,000 രൂപ മുതൽ 40,000 രൂപ വരെ സ്റ്റൈപ്പൻഡായി ലഭിക്കും. 27 പേറ്റന്റുകൾ ഇതിനകം സ്വന്തമാക്കിയ ഇവിടുത്തെ അധ്യാപകർ നിരവധി ദേശീയ-അന്തർദേശീയ പ്രോജക്റ്റുകളിൽ സജീവമാണ്. പ്രായോഗിക തൊഴിൽ പരിശീലനത്തിന് മുൻഗണന നൽകുന്നതിലൂടെ ആഗോള നിലവാരത്തിലുള്ള ഒരു ഡിജിറ്റൽ വിദ്യാഭ്യാസ മാതൃക സൃഷ്ടിക്കുകയാണ് ലക്ഷ്യമെന്ന് വിസി ഡോ. സജി ഗോപിനാഥ് വ്യക്തമാക്കി.
Also Read: DTE കർണാടക C25 ഡിപ്ലോമ ഫലം 2026 പ്രഖ്യാപിച്ചു
ആരോഗ്യ വകുപ്പ് അഡീഷണൽ ചീഫ് സെക്രട്ടറി ഡോ. രാജൻ എൻ. ഖോബ്രഗഡെ, ഐടി സെക്രട്ടറി സാംബശിവ റാവു തുടങ്ങിയ പ്രമുഖർ ആഘോഷങ്ങളിൽ പങ്കുചേരും. സാങ്കേതിക പരിപാടികൾക്ക് പുറമെ ഫിലിം മേക്കിങ് ശിൽപശാല, ഫിലിം ഫെസ്റ്റിവൽ എന്നിവയും വാർഷികാഘോഷത്തിന്റെ മാറ്റുകൂട്ടാൻ ഒരുക്കിയിട്ടുണ്ട്. ടാറ്റാ എലക്സി, യുഎസ്ടി ഗ്ലോബൽ തുടങ്ങിയ പ്രമുഖ ഐടി കമ്പനികളുടെ പ്രതിനിധികളും വിവിധ സെഷനുകളിൽ വിദ്യാർത്ഥികളുമായി സംവദിക്കും.
The post പഠനത്തോടൊപ്പം 40,000 രൂപ വരെ വരുമാനം; ഡിജിറ്റൽ സർവകലാശാലയുടെ വേറിട്ട മാതൃകയുമായി വാർഷികാഘോഷം appeared first on Express Kerala.