ഇന്ത്യൻ ഇലക്ട്രിക് വാഹന വിപണിയിലെ കുതിപ്പ് തുടരാൻ പുത്തൻ ഡിസൈനിലും കരുത്തിലും ടാറ്റ പഞ്ച് ഇവി ഫേസ്ലിഫ്റ്റ് വിപണിയിലിറങ്ങി. ടാറ്റയുടെ ജനപ്രിയ മോഡലുകളായ നെക്സോൺ ഇവി, ഹാരിയർ ഇവി എന്നിവയുടെ ഡിസൈൻ ശൈലിയോട് സാമ്യമുള്ള വിധത്തിലാണ് പുതിയ പഞ്ച് ഇവിയുടെ മുൻഭാഗം പുനർരൂപകൽപ്പന ചെയ്തിരിക്കുന്നത്. ബ്ലാക്ക് സ്ട്രിപ്പുകൾ ഒഴിവാക്കി ബോഡി കളർ പാനലുകളും പുതിയ ബമ്പറും നൽകിയതോടെ വാഹനം കൂടുതൽ ആകർഷകമായിട്ടുണ്ട്. വശങ്ങളിൽ 16 ഇഞ്ച് അലോയ് വീലുകളും പിൻഭാഗത്ത് ടെയിൽ ലാമ്പുകളെ ബന്ധിപ്പിക്കുന്ന എൽ.ഇ.ഡി ലൈറ്റ് ബാറും പുത്തൻ ലുക്ക് നൽകുന്നു. ഫിയർലെസ് യെല്ലോ ഉൾപ്പെടെ ഏഴ് വ്യത്യസ്ത നിറങ്ങളിൽ വാഹനം ലഭ്യമാണ്.
ഉള്ളിലെ മാറ്റങ്ങളാണ് പഞ്ച് ഇവി ഫേസ്ലിഫ്റ്റിനെ കൂടുതൽ പ്രീമിയമാക്കുന്നത്. 10 ഇഞ്ച് ഇൻഫോടെയ്ൻമെന്റ് സ്ക്രീൻ, ഡിജിറ്റൽ ഇൻസ്ട്രുമെന്റ് ക്ലസ്റ്റർ, ടൂ-സ്പോക്ക് സ്റ്റിയറിംഗ് വീൽ എന്നിവ ഇന്റീരിയറിന് ആധുനികത പകരുന്നു. യാത്രക്കാരുടെ സൗകര്യം മുൻനിർത്തി വെന്റിലേറ്റഡ് സീറ്റുകൾ, ഓട്ടോമാറ്റിക് ക്ലൈമറ്റ് കൺട്രോൾ, ലെതർ അപ്ഹോൾസ്റ്ററി എന്നിവയും ഉൾപ്പെടുത്തിയിട്ടുണ്ട്. 195 എം.എം ഗ്രൗണ്ട് ക്ലിയറൻസും 450 എം.എം വാട്ടർ വേഡിങ് കപ്പാസിറ്റിയും മോശം റോഡുകളിലും വെള്ളക്കെട്ടുകളിലും അനായാസ യാത്ര ഉറപ്പാക്കുന്നു.
സുരക്ഷയുടെ കാര്യത്തിൽ വിട്ടുവീഴ്ചയില്ലാത്ത സമീപനമാണ് ടാറ്റ സ്വീകരിച്ചിരിക്കുന്നത്. ആറ് എയർബാഗുകൾ, 360 ഡിഗ്രി ക്യാമറ, ഇലക്ട്രോണിക് സ്റ്റെബിലിറ്റി പ്രോഗ്രാം (ESP), ഹിൽ ഹോൾഡ് അസിസ്റ്റ്, ഐസോഫിക്സ് ചൈൽഡ് സീറ്റ് മൗണ്ടുകൾ എന്നിവ എല്ലാ വേരിയന്റുകളിലും സ്റ്റാൻഡേർഡ് ഫീച്ചറുകളായി ലഭിക്കും. കണക്റ്റഡ് കാർ സാങ്കേതികവിദ്യ വഴി റിമോട്ട് കമാൻഡുകളും നാവിഗേഷനും ഉപഭോക്താക്കൾക്ക് ലഭ്യമാകും.
ബാറ്ററി കപ്പാസിറ്റിയിലാണ് ഈ ഫേസ്ലിഫ്റ്റിലെ ഏറ്റവും വലിയ സർപ്രൈസ് ഒളിപ്പിച്ചിരിക്കുന്നത്. നിലവിലുണ്ടായിരുന്ന 30 kWh ബാറ്ററിക്ക് പുറമെ പുതുതായി 40 kWh ബാറ്ററി പാക്ക് കൂടി ടാറ്റ അവതരിപ്പിച്ചു. ഇത് ഒറ്റ ചാർജിൽ 468 കിലോമീറ്റർ റേഞ്ച് നൽകുമെന്നാണ് കമ്പനിയുടെ അവകാശവാദം. 65 kW ഡിസി ഫാസ്റ്റ് ചാർജർ ഉപയോഗിച്ചാൽ വെറും 26 മിനിറ്റിനുള്ളിൽ ബാറ്ററിയുടെ 20 ശതമാനത്തിൽ നിന്ന് 80 ശതമാനം വരെ ചാർജ് ചെയ്യാൻ സാധിക്കും. സാധാരണ ചാർജിംഗിനായി 7.2 kW, 3.3 kW ചാർജറുകളും തിരഞ്ഞെടുക്കാം.
വിലയുടെ കാര്യത്തിലും പഞ്ച് ഇവി വിപണിയിൽ വലിയ ചലനം സൃഷ്ടിക്കുമെന്നുറപ്പാണ്. 30 kWh ബാറ്ററി വേരിയന്റുകൾക്ക് 9.69 ലക്ഷം മുതൽ 10.29 ലക്ഷം രൂപ വരെയും, 40 kWh ബാറ്ററി ഓപ്ഷനുകൾക്ക് 10.89 ലക്ഷം മുതൽ 12.59 ലക്ഷം രൂപ വരെയുമാണ് എക്സ്-ഷോറൂം വില. എന്നാൽ ടാറ്റയുടെ ‘ബാറ്ററി-ആസ്-എ-സർവീസ്’ (BaaS) പദ്ധതിയിലൂടെ വാഹനം സ്വന്തമാക്കുന്നവർക്ക് വെറും 6.49 ലക്ഷം രൂപയ്ക്ക് പഞ്ച് ഇവി വീട്ടിലെത്തിക്കാം. ഈ സ്കീമിൽ ഒരു കിലോമീറ്ററിന് 2.6 രൂപ എന്ന നിരക്കിൽ ബാറ്ററി വാടക നൽകിയാൽ മതിയാകും.
The post എതിരാളികളെ ഞെട്ടിക്കാൻ ടാറ്റയുടെ ‘ഇലക്ട്രിക് പഞ്ച്’; അത്യാധുനിക ഫീച്ചറുകളുമായി ഫേസ്ലിഫ്റ്റ് പതിപ്പ് appeared first on Express Kerala.