ടി20 ലോകകപ്പിലെ നിർണ്ണായകമായ സൂപ്പർ 8 പോരാട്ടങ്ങൾ ആരംഭിക്കാനിരിക്കെ ഇന്ത്യൻ ടീമിനെതിരെ കടുത്ത വിമർശനവും പ്രവചനവുമായി മുൻ പാകിസ്ഥാൻ പേസർ മുഹമ്മദ് ആമിർ. ഇന്ത്യ സെമിഫൈനൽ കാണാതെ പുറത്താകുമെന്നും ഗ്രൂപ്പ് 1-ൽ നിന്ന് ദക്ഷിണാഫ്രിക്കയും വെസ്റ്റ് ഇൻഡീസുമാണ് അവസാന നാലിൽ ഇടംപിടിക്കുകയെന്നുമാണ് ആമിറിന്റെ പക്ഷം. ഒരു സ്വകാര്യ ചാനലിലെ ചർച്ചയ്ക്കിടെ സംസാരിക്കുകയായിരുന്നു അദ്ദേഹം. ഇന്ത്യ ഒരു മോശം ടീമാണെന്ന് താൻ പറയുന്നില്ലെന്നും എന്നാൽ നിലവിലെ സാഹചര്യത്തിൽ ദക്ഷിണാഫ്രിക്കയും വെസ്റ്റ് ഇൻഡീസും ഇന്ത്യയേക്കാൾ മികച്ച ഫോമിലാണെന്നും അതിനാൽ അവരെ മറികടക്കുക ഇന്ത്യക്ക് പ്രയാസകരമായിരിക്കുമെന്നും ആമിർ പറഞ്ഞു.
ഇന്ത്യൻ ബാറ്റിംഗ് നിരയുടെ പ്രകടനത്തെയും ആമിർ സംശയത്തോടെയാണ് നോക്കിക്കാണുന്നത്. ഇന്ത്യ ഫൈനലിൽ എത്തുന്നതിൽ തനിക്ക് പ്രത്യേക താത്പര്യമില്ലെന്നും അതുകൊണ്ട് തന്നെ അവർ ഫൈനലിലെത്തുമെന്ന് നിർബന്ധപൂർവ്വം പറയാൻ തനിക്ക് കഴിയില്ലെന്നും താരം വ്യക്തമാക്കി. നേരത്തെ ഇന്ത്യൻ ഓപ്പണർ അഭിഷേക് ശർമ്മ വെറുമൊരു ‘സ്ലോഗർ’ മാത്രമാണെന്ന് ആമിർ പറഞ്ഞത് വലിയ വിവാദമായിരുന്നു. ഇതിന് പിന്നാലെ നടന്ന പാകിസ്ഥാനെതിരായ മത്സരത്തിലടക്കം രണ്ട് കളികളിലും അഭിഷേക് റണ്ണൊന്നുമെടുക്കാതെ പുറത്തായതും ആമിർ തന്റെ വാദത്തിന് ആയുധമാക്കുന്നുണ്ട്.
ആമിറിന്റെ വിമർശനങ്ങൾ ഒരു വശത്ത് തുടരുമ്പോഴും ഗ്രൂപ്പ് ഘട്ടത്തിൽ തോൽവി അറിയാതെയാണ് ഇന്ത്യ സൂപ്പർ 8-ലേക്ക് പ്രവേശിച്ചിരിക്കുന്നത്. പാകിസ്ഥാൻ, യുഎസ്എ, നമീബിയ, നെതർലൻഡ്സ് തുടങ്ങിയ ടീമുകളെ തകർത്താണ് ഇന്ത്യയുടെ മുന്നേറ്റം. സൂപ്പർ 8-ൽ ഇന്ത്യ നേരിടുന്ന ദക്ഷിണാഫ്രിക്കയും വെസ്റ്റ് ഇൻഡീസും സിംബാബ്വെയും തോൽവി അറിയാതെ എത്തിയവരാണെന്നത് വരാനിരിക്കുന്ന പോരാട്ടങ്ങളുടെ കാഠിന്യം വർദ്ധിപ്പിക്കുന്നു. ഫെബ്രുവരി 22-ന് ദക്ഷിണാഫ്രിക്കയുമായാണ് ഇന്ത്യയുടെ ആദ്യ സൂപ്പർ 8 മത്സരം. തുടർന്ന് 26-ന് സിംബാബ്വെയെയും മാർച്ച് 1-ന് വെസ്റ്റ് ഇൻഡീസിനെയും ഇന്ത്യ നേരിടും.
The post ‘ഇന്ത്യ സെമി കാണില്ല, പുറത്താകും’; സൂപ്പർ 8 പോരാട്ടത്തിന് മുൻപ് വിവാദ പ്രവചനവുമായി മുഹമ്മദ് ആമിർ appeared first on Express Kerala.