കുവൈത്ത്: രാജ്യത്തെ റോഡുകളിൽ സുരക്ഷ ഉറപ്പാക്കുന്നതിനും അച്ചടക്കമില്ലാത്ത ഡ്രൈവിംഗ് നിയന്ത്രിക്കുന്നതിനുമായി കുവൈത്ത് ട്രാഫിക് ഡിപ്പാർട്ട്മെന്റ് പരിശോധനകൾ ശക്തമാക്കി. നിയമലംഘകർക്കെതിരെ വിട്ടുവീഴ്ചയില്ലാത്ത നടപടി സ്വീകരിക്കുമെന്ന് അധികൃതർ വ്യക്തമാക്കിയതിന് പിന്നാലെ രാജ്യവ്യാപകമായി നടത്തിയ പ്രത്യേക പരിശോധനയിൽ 319 ഗതാഗത നിയമലംഘനങ്ങൾ രേഖപ്പെടുത്തി.
വിവിധ നിയമലംഘനങ്ങളുടെ പേരിൽ 80 വാഹനങ്ങളും മോട്ടോർ സൈക്കിളുകളുമാണ് പോലീസ് കസ്റ്റഡിയിലെടുത്തത്. ഗുരുതരമായ ലംഘനങ്ങൾ നടത്തിയ 44 പേരെ മുൻകരുതൽ തടങ്കലിലാക്കി. ഇതിനുപുറമെ, ലൈസൻസില്ലാതെ വാഹനമോടിച്ച പത്ത് കുട്ടികളെ കണ്ടെത്തി ജുവനൈൽ പ്രോസിക്യൂഷന് കൈമാറുകയും ചെയ്തിട്ടുണ്ട്.
Also Read: സൗദിയിൽ നിയമലംഘകർക്കെതിരെ വൻ നടപടി; ഒരാഴ്ചയ്ക്കിടെ പിടിയിലായത് 19,101 പേർ
നിയമപാലകർ തിരയുന്ന ഏഴ് വ്യക്തികളെയും മൂന്ന് വാഹനങ്ങളെയും ഈ പരിശോധനയ്ക്കിടെ കണ്ടെത്താനായി എന്നത് സുരക്ഷാ വിഭാഗത്തിന് വലിയ നേട്ടമായി. മതിയായ തിരിച്ചറിയൽ രേഖകളില്ലാത്ത ഒരാളെയും പിടി കൂടിയിട്ടുണ്ട്. റോഡ് സുരക്ഷ വർദ്ധിപ്പിക്കുന്നതിനായി പൊതുജനങ്ങൾ സഹകരിക്കണമെന്ന് അഭ്യർത്ഥിച്ച അധികൃതർ, നിയമലംഘനങ്ങൾ ശ്രദ്ധയിൽപ്പെട്ടാൽ 112 എന്ന നമ്പരിലോ 99324092 എന്ന വാട്സ്ആപ്പ് നമ്പരിലോ അറിയിക്കണമെന്നും ഓർമ്മിപ്പിച്ചു.
The post കുവൈത്തിൽ ട്രാഫിക് പരിശോധന കർശനം! 319 നിയമലംഘനങ്ങൾ, 44 പേർ തടങ്കലിൽ appeared first on Express Kerala.