ലോകത്തെ മുൻനിര കോഴിയിറച്ചി കയറ്റുമതിക്കാരായ ബ്രസീൽ ഇന്ത്യൻ വിപണിയിൽ ചുവടുറപ്പിക്കാൻ നീക്കം തുടങ്ങുന്നു. ഇന്ത്യയിലേക്കുള്ള കോഴിയിറച്ചി കയറ്റുമതി വർധിപ്പിക്കുന്നതിനായി നിലവിലെ ഉയർന്ന ഇറക്കുമതി നികുതി കുറയ്ക്കണമെന്നാണ് ബ്രസീലിന്റെ പ്രധാന ആവശ്യം. ബ്രസീൽ പ്രസിഡന്റ് ലുല ഡ സിൽവയുടെ ന്യൂഡൽഹി സന്ദർശനത്തോടനുബന്ധിച്ച് ബ്രസീൽ കൃഷിമന്ത്രി കാർലോസ് ഫവാറോ ഇന്ത്യൻ അധികൃതരുമായി നടത്തിയ ചർച്ചയിൽ ഇക്കാര്യം ഉന്നയിച്ചു.
നികുതി കടമ്പ; ബ്രസീലിന്റെ വാഗ്ദാനം
നിലവിൽ ഇന്ത്യയിൽ കഷ്ണങ്ങളാക്കിയ കോഴിയിറച്ചിക്ക് 100 ശതമാനവും മുഴുവനായുള്ള കോഴിക്ക് 30 ശതമാനവുമാണ് ഇറക്കുമതി നികുതി. ഈ ഉയർന്ന നികുതി കാരണം ബ്രസീലിന് ഇന്ത്യൻ വിപണിയിൽ സജീവമാകാൻ കഴിയുന്നില്ല. ഇതിന് പകരമായി ഇന്ത്യയിൽ നിന്നുള്ള മാതളനാരകം, മക്കാഡാമിയ നട്സ് തുടങ്ങിയ ഉൽപ്പന്നങ്ങൾക്ക് ബ്രസീൽ വിപണി തുറന്നുകൊടുക്കാമെന്ന വാഗ്ദാനവും അവർ മുന്നോട്ട് വെച്ചിട്ടുണ്ട്. 2025-ൽ ബ്രസീൽ ഇന്ത്യയിലേക്ക് കയറ്റുമതി ചെയ്തത് വെറും 2.47 ടൺ കോഴിയിറച്ചി മാത്രമാണ്. എന്നാൽ അവരുടെ ഏറ്റവും വലിയ വിപണിയായ യുഎഇയിലേക്ക് 4.79 ലക്ഷം ടണ്ണാണ് കയറ്റുമതി ചെയ്തത്. നികുതി കുറയ്ക്കുകയോ കുറഞ്ഞ നിരക്കിൽ പ്രത്യേക ക്വാട്ട അനുവദിക്കുകയോ ചെയ്യണമെന്നാണ് ബ്രസീൽ ഇറച്ചി വ്യവസായ സംഘടനയായ എബിപിഎ ആവശ്യപ്പെടുന്നത്.
Also Read: ഓഹരി വിപണിയിൽ ചെറുകിട നിക്ഷേപകരുടെ പടയോട്ടം; ജനുവരിയിൽ എത്തിയത് 16,944 കോടി!
വ്യാപാരബന്ധത്തിൽ റെക്കോർഡ് വളർച്ച
ഇന്ത്യയും ബ്രസീലും തമ്മിലുള്ള ഉഭയകക്ഷി വ്യാപാരം ചരിത്രപരമായ കുതിപ്പിലാണ്. 2025-ൽ ഇരുരാജ്യങ്ങളും തമ്മിലുള്ള വ്യാപാരം 1500 കോടി ഡോളറിലെത്തി (മുൻവർഷത്തേക്കാൾ 25.5 ശതമാനം വളർച്ച). 2030-ഓടെ ഇത് 2000 കോടി ഡോളറായി (ഏകദേശം 1.7 ലക്ഷം കോടി രൂപ) ഉയർത്താനാണ് ലക്ഷ്യമിടുന്നത്.
ബ്രസീലിൽ നിന്ന് ഇന്ത്യയിലേക്ക്: പഞ്ചസാര, ക്രൂഡ് ഓയിൽ, ഭക്ഷ്യ എണ്ണ, പരുത്തി എന്നിവയുൾപ്പെടെ 690 കോടി ഡോളറിന്റെ കയറ്റുമതി.
ഇന്ത്യയിൽ നിന്ന് ബ്രസീലിലേക്ക്: മരുന്നുകൾ, രാസവസ്തുക്കൾ, വാഹന ഘടകങ്ങൾ എന്നിവയുൾപ്പെടെ 840 കോടി ഡോളറിന്റെ ഉൽപ്പന്നങ്ങൾ.
മെർക്കോസർ-ഇന്ത്യ വ്യാപാര കരാർ, ബ്രിക്സ്, ജി20 എന്നീ കൂട്ടായ്മകളിലൂടെ സാമ്പത്തിക സഹകരണം കൂടുതൽ ശക്തമാക്കാനാണ് ഇരുരാജ്യങ്ങളും ആലോചിക്കുന്നത്. കോഴിയിറച്ചി നികുതിയുടെ കാര്യത്തിൽ ഇന്ത്യൻ സർക്കാർ സ്വീകരിക്കുന്ന നിലപാട് ആഭ്യന്തര ഇറച്ചി വിപണിയിലും നിർണ്ണായകമാകും.
The post ഇന്ത്യൻ വിപണി ലക്ഷ്യമിട്ട് ബ്രസീൽ! മാതളനാരകത്തിന് പകരം കോഴിയിറച്ചി; ലക്ഷ്യം 2000 കോടി ഡോളർ appeared first on Express Kerala.