ബംഗാൾ നിയമസഭാ തിരഞ്ഞെടുപ്പിന് മുന്നോടിയായി തൃണമൂൽ കോൺഗ്രസ് അധ്യക്ഷ മമത ബാനർജിക്കും ആം ആദ്മി നേതാവ് അരവിന്ദ് കെജ്രിവാളിനുമെതിരെ രൂക്ഷവിമർശനവുമായി ബിജെപി നേതാവ് രേഖ ഗുപ്ത രംഗത്തെത്തി. ഡൽഹിയിൽ ‘ഭയ്യയെ’ (കെജ്രിവാൾ) ജനങ്ങൾ പുറത്താക്കിയെന്നും ഇനി ബംഗാളിൽ ‘ദീദിയുടെ’ (മമത) ഊഴമാണെന്നും അവർ പരിഹസിച്ചു. പൊതുജനങ്ങളുടെ പണം ഉപയോഗിച്ചുള്ള ക്ഷേമപദ്ധതികളിൽ സ്വന്തം പേര് വയ്ക്കാനാണ് ഇരുനേതാക്കളും ശ്രമിക്കുന്നതെന്നും, ജനക്ഷേമത്തിന് മുൻഗണന നൽകുന്നില്ലെന്നും കൊൽക്കത്തയിൽ നടന്ന ചടങ്ങിൽ അവർ ആരോപിച്ചു.
ബംഗാളിന്റെ വികസനത്തിനായി കേന്ദ്രം നൽകുന്ന കോടിക്കണക്കിന് രൂപ ദരിദ്രരിലേക്ക് എത്തുന്നില്ലെന്നും ഈ പണമെല്ലാം എവിടെ പോകുന്നുവെന്നും രേഖ ഗുപ്ത ചോദ്യം ഉന്നയിച്ചു. ഒരു വനിതാ മുഖ്യമന്ത്രി ഭരിക്കുമ്പോഴും ബംഗാളിൽ സ്ത്രീകൾ സുരക്ഷിതരല്ലെന്നും പെൺമക്കളുടെ അന്തസ്സിന് വിലയില്ലെന്നും അവർ കുറ്റപ്പെടുത്തി. ലോകത്ത് ഒരിടത്തും ഇല്ലാത്തവിധം മോശം അവസ്ഥയിലാണ് നിലവിൽ പശ്ചിമ ബംഗാളിലെ ക്രമസമാധാന നിലയെന്നും ബിജെപി നേതാവ് കൂട്ടിച്ചേർത്തു.
Also Read; ഡൽഹിയിൽ ബോംബ് ഭീഷണി; മഹാരാഷ്ട്ര സദാനിലും സ്കൂളുകളിലും വ്യാപക പരിശോധന
സംസ്ഥാനത്തെ ഗുണ്ടായിസത്തിന്റെയും അത്യാഗ്രഹത്തിന്റെയും രാഷ്ട്രീയത്തിന് ഉടൻ അന്ത്യമുണ്ടാകുമെന്നും വരാനിരിക്കുന്ന തിരഞ്ഞെടുപ്പ് ബംഗാളിൽ വലിയ മാറ്റം കൊണ്ടുവരുമെന്നും അവർ പ്രത്യാശ പ്രകടിപ്പിച്ചു. നുഴഞ്ഞുകയറ്റക്കാരുടെ പിന്നിൽ ഒളിക്കാൻ മമത ബാനർജിക്ക് സാധിക്കുമെങ്കിലും പൊതുജനങ്ങളുടെ പ്രതിഷേധ സ്വരത്തെ അടിച്ചമർത്താൻ കഴിയില്ലെന്നും രേഖ ഗുപ്ത ഓർമ്മിപ്പിച്ചു. നാലാം തവണയും മുഖ്യമന്ത്രിയാകാനുള്ള മമതയുടെ സ്വപ്നം ബിജെപി തകർക്കുമെന്നും രേഖ ഗുപ്ത വ്യക്തമാക്കി.
The post “ഭയ്യ പോയി, ഇനി ദീദിയുടെ ഊഴം”; മമതയ്ക്കും കെജ്രിവാളിനുമെതിരെ ആഞ്ഞടിച്ച് ബിജെപി appeared first on Express Kerala.