മെക്സിക്കൻ ലഹരിമരുന്ന് മാഫിയയുടെ കരുത്തനായ തലവൻ നെമെസിയോ ‘എൽ മെൻചോ’ ഒസെഗുവേരയെ (59) സൈന്യം വധിച്ചു. മെക്സിക്കൻ സൈന്യവുമായുണ്ടായ കടുത്ത ഏറ്റുമുട്ടലിലാണ് ഒസെഗുവേരയ്ക്ക് പരിക്കേറ്റത്. തുടർന്ന് വിദഗ്ധ ചികിത്സയ്ക്കായി വിമാനമാർഗ്ഗം തലസ്ഥാനമായ മെക്സിക്കോ സിറ്റിയിലേക്ക് കൊണ്ടുപോകുന്നതിനിടെയാണ് ഇയാൾ മരിച്ചതെന്ന് സൈന്യം ഔദ്യോഗികമായി സ്ഥിരീകരിച്ചു. അമേരിക്കൻ രഹസ്യാന്വേഷണ ഏജൻസികളുടെ സഹായത്തോടെ നടത്തിയ ഈ സൈനിക നീക്കത്തിൽ മറ്റ് ആറ് അക്രമികൾ കൂടി കൊല്ലപ്പെടുകയും മൂന്ന് സൈനികർക്ക് പരിക്കേൽക്കുകയും ചെയ്തു.
എൽ മെൻചോയുടെ മരണത്തിന് പിന്നാലെ പശ്ചിമ ഹാലിസ്കോ ഉൾപ്പെടെയുള്ള വിവിധ സംസ്ഥാനങ്ങളിൽ ലഹരി മാഫിയ സംഘങ്ങൾ വ്യാപകമായ അക്രമങ്ങൾ അഴിച്ചുവിട്ടു. ഇരുപതിലധികം പ്രധാന പാതകൾ വാഹനങ്ങൾ കത്തിച്ച് തടഞ്ഞ സംഘം പരിഭ്രാന്തി സൃഷ്ടിച്ചതോടെ പല നഗരങ്ങളും വിജനമായി. കടകളും പെട്രോൾ പമ്പുകളും അടഞ്ഞുകിടക്കുകയാണ്. സംഘർഷാവസ്ഥ കണക്കിലെടുത്ത് രാജ്യത്തെ പൗരന്മാർ ശാന്തരായിരിക്കണമെന്ന് മെക്സിക്കൻ പ്രസിഡന്റ് ക്ലാഡിയ ഷെയ്ൻബോം അഭ്യർത്ഥിച്ചു. സിനലോവ കാർട്ടൽ തലവൻമാരായ ‘എൽ ചാപ്പോ’ ഗുസ്മാൻ, സാംബാഡ എന്നിവരുടെ പതനത്തിന് ശേഷം മെക്സിക്കോയിൽ കൊല്ലപ്പെടുന്ന ഏറ്റവും വലിയ ലഹരിമരുന്ന് രാജാവാണ് ഒസെഗുവേര.
Also Read: കോടതി പൂട്ടിയപ്പോൾ പുതിയ വഴി തേടി ട്രംപ്! താരിഫ് പിരിക്കുന്നത് നിർത്തും; അടുത്ത നീക്കം?
അതിക്രൂരനായ ലഹരിമരുന്ന് രാജാവായി അറിയപ്പെട്ടിരുന്ന ഒസെഗുവേരയെ പിടികൂടാൻ സഹായിക്കുന്നവർക്ക് അമേരിക്ക 1.5 കോടി ഡോളർ പാരിതോഷികം പ്രഖ്യാപിച്ചിരുന്നു. ഇയാളുടെ വധത്തെ അമേരിക്കൻ അധികൃതർ സ്വാഗതം ചെയ്തു. സൈനിക നടപടിക്കിടെ റോക്കറ്റ് ലോഞ്ചറുകൾ അടക്കമുള്ള മാരകായുധങ്ങൾ സൈന്യം പിടിച്ചെടുത്തിട്ടുണ്ട്. നിലവിൽ ഗ്വാഡലഹാര ഉൾപ്പെടെയുള്ള നഗരങ്ങളിൽ കർശന സുരക്ഷയാണ് ഏർപ്പെടുത്തിയിരിക്കുന്നത്.
The post അമേരിക്ക കാത്തിരുന്ന വേട്ട; 1.5 കോടി ഡോളർ തലയ്ക്ക് വിലയുള്ള ഒസെഗുവേര ഏറ്റുമുട്ടലിൽ കൊല്ലപ്പെട്ടു appeared first on Express Kerala.