ബുമ്ര ഒരു ചീറ്റ് കോഡാണ്, പക്ഷേ സുന്ദറിനെ ഉപയോഗിച്ചത് പിഴച്ചു; തുറന്നടിച്ച് ആർ. അശ്വിൻ

ചെന്നൈ: ടി20 ലോകകപ്പിന്റെ സൂപ്പർ-8 പോരാട്ടത്തിൽ ദക്ഷിണാഫ്രിക്കയോടേറ്റ കനത്ത തോൽവിക്ക് പിന്നാലെ ഇന്ത്യൻ ടീമിന് ഉപദേശവുമായി മുൻ താരം രവിചന്ദ്രൻ അശ്വിൻ. ഗ്രൂപ്പ് ഘട്ടത്തിൽ അപരാജിതരായി മുന്നേറിയ ഇന്ത്യക്ക് സൂപ്പർ-8 ലെ ആദ്യ മത്സരത്തിൽ 76 റൺസിന്റെ തോൽവിയാണ് വഴങ്ങേണ്ടി വന്നത്. ടീം മാനേജ്‌മെന്റിന്റെ ഭാഗത്തുനിന്നുണ്ടായ തന്ത്രപരമായ പിഴവുകളാണ് തോൽവിക്ക് കാരണമായതെന്ന് അശ്വിൻ ചൂണ്ടിക്കാട്ടി.

വാഷിംഗ്ടൺ സുന്ദറിനെ ഉപയോഗിച്ചതിൽ പിഴവ്

വാഷിംഗ്ടൺ സുന്ദറിനെ പ്ലേയിംഗ് ഇലവനിൽ ഉൾപ്പെടുത്തിയ രീതിയെ അശ്വിൻ വിമർശിച്ചു. “നമ്മുടെ ഭാഗത്തുനിന്നുണ്ടായ പിഴവുകൾ കാരണമാണ് മത്സരം കൈവിട്ടുപോയത്. വാഷിംഗ്ടൺ സുന്ദറിനെ കളിപ്പിക്കുമ്പോൾ അവനെ എതിർ ടീമിലെ ഇടംകൈയ്യൻ ബാറ്റർമാർക്കെതിരെ കൃത്യമായി ഉപയോഗിക്കണമായിരുന്നു. ആ തന്ത്രം നടപ്പിലാക്കുന്നതിൽ പരാജയപ്പെട്ടു,” അശ്വിൻ പറഞ്ഞു. ഇഷാൻ കിഷൻ പൂജ്യത്തിനും തിലക് വർമ ഒരു റണ്ണിനും പുറത്തായതിലൂടെ ടോപ് ഓർഡർ തകർന്നതും ഇന്ത്യക്ക് തിരിച്ചടിയായതായി അദ്ദേഹം നിരീക്ഷിച്ചു.

Also Read:സെമി പ്രതീക്ഷകൾ തുലാസിൽ; സഞ്ജുവിനെ ഇറക്കുന്നത് ‘ചൂതാട്ടമോ’?

ബുമ്രയെന്ന ‘ചീറ്റ് കോഡ്’

തോൽവിക്കിടയിലും തിളങ്ങിയ ജസ്പ്രീത് ബുമ്രയെ അശ്വിൻ വാനോളം പുകഴ്ത്തി. നാല് ഓവറിൽ 15 റൺസ് മാത്രം വഴങ്ങി മൂന്ന് വിക്കറ്റെടുത്ത ബുമ്രയെ ഒരു ‘ചീറ്റ് കോഡ്’ എന്നാണ് അശ്വിൻ വിശേഷിപ്പിച്ചത്. “ബുമ്രയെപ്പോലൊരു ബൗളർ ഉള്ളപ്പോൾ ഇതിനപ്പുറം എന്ത് അത്ഭുതമാണ് വേണ്ടത്? പലപ്പോഴും ഒരു താരത്തിന്റെ മഹത്വം അദ്ദേഹം വിരമിച്ച ശേഷമാണ് നാം തിരിച്ചറിയാറുള്ളത്,” ബുമ്രയെ പ്രശംസിച്ച് അശ്വിൻ കൂട്ടിച്ചേർത്തു.

ഇന്ത്യയുടെ നെറ്റ് റൺറേറ്റ് കുറഞ്ഞതിനെക്കുറിച്ച് താൻ ആശങ്കപ്പെടുന്നില്ലെന്നും യുവനിര സമ്മർദ്ദം കൈകാര്യം ചെയ്യാൻ പഠിക്കണമെന്നും അശ്വിൻ വ്യക്തമാക്കി. സിംബാബ്‌വെക്കെതിരായ മത്സരത്തിൽ ഇന്ത്യ ശക്തമായി തിരിച്ചുവരുമെന്നും സാഹചര്യങ്ങളെ ബഹുമാനിച്ചു കളിച്ചാൽ വിജയം ഉറപ്പാണെന്നും അദ്ദേഹം പ്രത്യാശ പ്രകടിപ്പിച്ചു.

The post ബുമ്ര ഒരു ചീറ്റ് കോഡാണ്, പക്ഷേ സുന്ദറിനെ ഉപയോഗിച്ചത് പിഴച്ചു; തുറന്നടിച്ച് ആർ. അശ്വിൻ appeared first on Express Kerala.