രാജ്യത്തെ പൗരത്വ വിഷയങ്ങളിൽ പലവിധ ആശങ്കകൾ നിലനിൽക്കുന്നുണ്ടെങ്കിലും കേരളത്തിലെ ജനങ്ങൾ ഭയപ്പെടേണ്ടതില്ലെന്ന് മുഖ്യമന്ത്രി നിയമസഭയിൽ ഉറപ്പുനൽകി. ചരിത്രപരമായ തീരുമാനങ്ങൾ എടുത്ത സഭയായിരുന്നു ഇതെന്നും എന്നാൽ പ്രതിപക്ഷം ഒട്ടും ക്രിയാത്മകമായിരുന്നില്ലെന്നും അദ്ദേഹം കുറ്റപ്പെടുത്തി. സാധാരണഗതിയിൽ ഭരണപക്ഷത്തെ പ്രതിക്കൂട്ടിലാക്കേണ്ട പ്രതിപക്ഷം, വസ്തുതകളെയും ചർച്ചകളെയും ഭയന്നോടുകയായിരുന്നു. ഈ സർക്കാരിനെതിരെ ഉന്നയിക്കാൻ ഒരു ചെറിയ ആക്ഷേപം പോലും പ്രതിപക്ഷത്തിന്റെ പക്കലില്ലെന്ന് അദ്ദേഹം പരിഹസിച്ചു.
കേരളത്തിന്റെ വികസനത്തിന് തുരങ്കം വെക്കുന്ന നിലപാടാണ് പ്രതിപക്ഷം സ്വീകരിച്ചതെന്ന് മുഖ്യമന്ത്രി ആരോപിച്ചു. കിഫ്ബിയെയും ദേശീയപാത വികസനത്തെയും എതിർത്ത യുഡിഎഫ്, നാടിന്റെ വളർച്ച ഒരിഞ്ചു പോലും മുന്നോട്ട് കൊണ്ടുപോകാൻ ആഗ്രഹിച്ചിട്ടില്ല. എൽഡിഎഫിനോടുള്ള രാഷ്ട്രീയ വിരോധം കാരണം സംസ്ഥാനത്തെ ശ്വാസംമുട്ടിക്കുന്ന സമീപനമാണ് അവർ സ്വീകരിക്കുന്നത്. സർക്കാർ നടപ്പിലാക്കിയ ലൈഫ് പദ്ധതി അട്ടിമറിക്കാനാണ് പ്രതിപക്ഷം മുൻഗണന നൽകുന്നതെന്നും നുണകൾ പ്രചരിപ്പിച്ച് സർക്കാരിനെ താഴ്ത്തിക്കെട്ടാൻ ആസൂത്രിത നീക്കം നടക്കുന്നുണ്ടെന്നും അദ്ദേഹം വ്യക്തമാക്കി.
Also Read: പറവൂരിൽ കോൺഗ്രസിന് തിരിച്ചടി; മുൻ നഗരസഭ കൗൺസിലർ വത്സല പ്രസന്നകുമാർ ബിജെപിയിൽ ചേർന്നു
ന്യൂനപക്ഷങ്ങളോട് എൽഡിഎഫ് സ്വീകരിക്കുന്ന കരുതൽ മൂലമാണ് കേരളത്തിൽ വർഗീയ കലാപങ്ങൾ ഉണ്ടാകാത്തതെന്ന് മുഖ്യമന്ത്രി അവകാശപ്പെട്ടു. ആർഎസ്എസിനെ പിണക്കാതിരിക്കാൻ ശ്രദ്ധിക്കുന്ന യുഡിഎഫ്, പലപ്പോഴും വർഗീയ ശക്തികളോട് ചേർന്നുനിൽക്കുകയാണ്. എല്ലാവിധ പ്രതിസന്ധികൾക്കിടയിലും നാടിനെ ഉയർത്താനും വളർത്താനും സാധിച്ചുവെന്ന പൂർണ്ണ സംതൃപ്തിയും ആത്മവിശ്വാസവും സർക്കാരിനുണ്ടെന്ന് സഭയുടെ അവസാന ഘട്ടത്തിൽ അദ്ദേഹം കൂട്ടിച്ചേർത്തു.
The post പൗരത്വഭീതി വേണ്ടെന്ന് ഉറപ്പ്; ആകാവുന്ന വിധം കേരളത്തെ ഉയർത്തിയെന്ന് ആത്മവിശ്വാസത്തോടെ മുഖ്യമന്ത്രി appeared first on Express Kerala.