മുഖ്യമന്ത്രി പിണറായി വിജയനും മലയാളത്തിന്റെ പ്രിയനടൻ മോഹൻലാലും ഒന്നിക്കുന്ന ‘കണ്ടും മിണ്ടിയും ഇരുവർ’ എന്ന പ്രത്യേക അഭിമുഖത്തിന്റെ ടീസർ പുറത്തിറങ്ങി. രാഷ്ട്രീയവും സിനിമയും വ്യക്തിജീവിതവും ഇഴചേരുന്ന ഈ അഭിമുഖം ഇതിനോടകം തന്നെ സോഷ്യൽ മീഡിയയിൽ തരംഗമായിക്കഴിഞ്ഞു. മുഖ്യമന്ത്രിയുടെ ഔദ്യോഗിക വസതിയായ ക്ലിഫ് ഹൗസിൽ വെച്ചാണ് ഈ അപൂർവ്വ സംഗമം ചിത്രീകരിച്ചിരിക്കുന്നത്. രണ്ട് വ്യത്യസ്ത മേഖലകളിലെ കരുത്തരായ വ്യക്തിത്വങ്ങൾ ഒന്നിക്കുന്നു എന്ന പ്രത്യേകതയോടെ ‘രണ്ട് ലെഗസികൾ’ എന്നാണ് ടീസറിൽ ഇവരെ വിശേഷിപ്പിക്കുന്നത്.
സിനിമയെക്കുറിച്ചുള്ള രസകരമായ ചോദ്യങ്ങളാണ് ടീസറിലെ പ്രധാന ആകർഷണം. തനിക്ക് ആക്ഷൻ സിനിമകളോടാണ് കൂടുതൽ താൽപ്പര്യമെന്ന് മുഖ്യമന്ത്രി മോഹൻലാലിനോട് വെളിപ്പെടുത്തുന്നുണ്ട്. രജനീകാന്ത് ചിത്രങ്ങളോടുള്ള മുഖ്യമന്ത്രിയുടെ താൽപ്പര്യത്തെക്കുറിച്ച് മോഹൻലാൽ ചോദിക്കുമ്പോൾ ചിരിച്ചുകൊണ്ടായിരുന്നു അദ്ദേഹത്തിന്റെ മറുപടി. മോഹൻലാലിന്റെ ഏതെങ്കിലും സിനിമാ ഡയലോഗ് ഓർമ്മയുണ്ടോ എന്ന ചോദ്യത്തിന് ‘ദാസനെയും ദിനേശനെയും’ എന്ന് മുഖ്യമന്ത്രി മറുപടി നൽകുന്നത് ഇരുവരും തമ്മിലുള്ള സൗഹൃദത്തിന്റെ ആഴം വ്യക്തമാക്കുന്നതായിരുന്നു.
Also Read: ഭരണഘടനയെ സാക്ഷിനിർത്തി റാപ്പർ വേടനും നവമി ലതയും വിവാഹിതരായി
കേരളത്തിന്റെ വികസന കാര്യങ്ങളും വ്യക്തിപരമായ ചില ഗൗരവമേറിയ ചോദ്യങ്ങളും അഭിമുഖത്തിൽ കടന്നുവരുന്നുണ്ട്. ജീവിതത്തിൽ എന്തിന്റെയെങ്കിലും പേരിൽ പശ്ചാത്തപിക്കേണ്ടി വന്നിട്ടുണ്ടോ എന്ന മോഹൻലാലിന്റെ ചോദ്യത്തിന് മുഖ്യമന്ത്രി നൽകുന്ന മറുപടി ടീസറിൽ സസ്പെൻസായി നിലനിർത്തിയിരിക്കുകയാണ്. “എന്റെ കേരളം, അങ്ങയുടെ കേരളം, നമ്മുടെ കേരളം” എന്ന മോഹൻലാലിന്റെ വാക്കുകളോടെ അവസാനിക്കുന്ന ഈ അഭിമുഖത്തിന്റെ പൂർണ്ണരൂപം ഫെബ്രുവരി 26-ന് പ്രേക്ഷകരിലേക്ക് എത്തും.
The post ദാസനെയും ദിനേശനെയും ഓർത്ത് മുഖ്യമന്ത്രിയും ലാലേട്ടനും! ‘ഇരുവർ’ അഭിമുഖത്തിന്റെ ടീസർ പുറത്ത് appeared first on Express Kerala.