ട്വന്റി-20 ക്രിക്കറ്റിന്റെ അതിവേഗ പരീക്ഷണഘട്ടങ്ങളിൽ പാകിസ്ഥാൻ താരം ബാബർ അസം നേരിടുന്നത് കരിയറിലെ ഏറ്റവും വലിയ പ്രതിസന്ധി. ഇംഗ്ലണ്ടിനെതിരായ നിർണ്ണായകമായ സൂപ്പർ എട്ട് പോരാട്ടത്തിൽ 24 പന്തിൽ നിന്ന് കേവലം 25 റൺസ് മാത്രം നേടിയ ബാബറിന്റെ ഇന്നിങ്സ് ടീമിന് വലിയ തിരിച്ചടിയായി. ഹാരി ബ്രൂക്കിന്റെ വെടിക്കെട്ട് ബാറ്റിംഗിൽ ഇംഗ്ലണ്ട് ജയം തട്ടിയെടുത്തപ്പോൾ, ബാബർ അസം ഒരു പത്ത് റൺസെങ്കിലും അധികം നേടിയിരുന്നെങ്കിൽ ഫലം മാറുമായിരുന്നു എന്ന് ആരാധകർ വിശ്വസിക്കുന്നു. “ഈ ഫോർമാറ്റ് നിങ്ങൾക്ക് അനുയോജ്യമല്ല” എന്ന ഇതിഹാസ താരം ഷോയിബ് അക്തറുടെ വാക്കുകൾ ശരിവെക്കുന്ന പ്രകടനമാണ് ബാബർ കാഴ്ചവെക്കുന്നത്.
തലമുറയിലെ പ്രതിഭയെന്ന വിശേഷണത്തിൽ നിന്നും ടീമിന്റെ ബാധ്യതയെന്ന പരിഹാസത്തിലേക്കാണ് ബാബറിന്റെ വീഴ്ച. ഇംഗ്ലണ്ടിനെതിരെ ജോഫ്ര ആർച്ചറുടെ ഓവറിൽ രണ്ട് ബൗണ്ടറികളുമായി പോസിറ്റീവ് തുടക്കം കുറിച്ചെങ്കിലും പവർപ്ലേയ്ക്ക് ശേഷം താരം വീണ്ടും മെല്ലെപ്പോക്കിലേക്ക് മാറി. ശേഷിച്ച 19 പന്തിൽ നേടിയത് വെറും 15 റൺസ് മാത്രം. ഒടുവിൽ ജേമി ഓവർട്ടണിന്റെ പന്തിൽ പുറത്താകുമ്പോൾ ടി20 ലോകകപ്പ് ചരിത്രത്തിൽ 500-ലധികം റൺസ് നേടിയ താരങ്ങളിൽ ഏറ്റവും മോശം സ്ട്രൈക്ക് റേറ്റ് (111.5) എന്ന നാണക്കേടിന്റെ റെക്കോർഡും ബാബറിന്റെ പേരിലായി.
Also Read: തിലക് പുറത്തേക്ക്, സഞ്ജു അകത്തേക്ക്; റെയ്നയുടെ തന്ത്രം ഇന്ത്യ പരീക്ഷിക്കുമോ?
കണക്കുകൾ പരിശോധിച്ചാൽ പവർപ്ലേ ഓവറുകളിലും ബാബർ പരാജയമാണെന്ന് വ്യക്തമാകും. ലോകകപ്പുകളിൽ പവർപ്ലേയിൽ 200-ലധികം പന്തുകൾ നേരിട്ട ബാറ്റർമാരിൽ 90-ന് താഴെ സ്ട്രൈക്ക് റേറ്റുള്ള ഏക താരമാണ് ഇദ്ദേഹം. ഈ ലോകകപ്പിലെ ബാബറിന്റെ സ്കോറുകൾ പരിശോധിച്ചാൽ നെതർലൻഡ്സിനെതിരെ 15 (18), യുഎസ്എയ്ക്കെതിരെ 46 (32), ഇന്ത്യക്കെതിരെ 5 (7) എന്നിങ്ങനെയാണ് സമ്പാദ്യം. ആകെ ആറ് കളികളിൽ നിന്ന് നേടിയത് 91 റൺസ് മാത്രം. ഫഖർ സമാനെപ്പോലെയുള്ള വെടിക്കെട്ട് താരങ്ങളെ പുറത്തിരുത്തിയാണ് ബാബറിന് ടീം അവസരം നൽകുന്നത് എന്നത് വിമർശനങ്ങളുടെ ആക്കം കൂട്ടുന്നു.
അഗ്രസീവ് ക്രിക്കറ്റിലൂടെ ലോകകപ്പ് നേടുകയെന്നതാണ് ടീമിന്റെ ഫിലോസഫിയെന്ന് നായകൻ സൽമാൻ അഗ വ്യക്തമാക്കുമ്പോഴും ബാബറിന്റെ ബാറ്റിംഗ് സമീപനം ടീമിനെ പിന്നോട്ട് വലിക്കുകയാണ്. മധ്യ ഓവറുകളിൽ ഇന്നിങ്സ് നയിക്കാൻ നിയോഗിക്കപ്പെട്ട താരം മറുവശത്തുള്ള ബാറ്റർമാർക്ക് സമ്മർദ്ദം നൽകുന്ന കാഴ്ചയാണ് പലപ്പോഴും കാണുന്നത്. ഫോമിലല്ലാത്തതിനാൽ ഏഷ്യ കപ്പ് ടീമിൽ നിന്ന് പോലും ഒഴിവാക്കപ്പെട്ടിരുന്ന ബാബർ, തന്റെ കളിശൈലിയിൽ അടിയന്തര മാറ്റങ്ങൾ വരുത്തിയില്ലെങ്കിൽ മറ്റൊരു ലോകകപ്പിൽ പാക് ജേഴ്സിയിൽ ഇടംപിടിക്കുക എന്നത് അസാധ്യമായിരിക്കും.
The post ടി20യിലെ ‘ടെസ്റ്റ് കളി’; ബാബർ അസം പാക്കിസ്ഥാന് ബാധ്യതയാകുന്നോ? റെക്കോർഡുകളിൽ നാണക്കേട്! appeared first on Express Kerala.